ޒަކިއްޔާ މޫސާގެ ހަށިގަނޑު ކައިރިން ފެނުނު ވަޅި ފުލުހުން ނޫސްވެރިންނަށް ދައްކާލަނީ. (ދައުރު ފޮޓޯ/އަބްދުﷲ އަނޫފް ޖުނައިދު)
ޒަކިއްޔާގެ ހަށިގަނޑުން އެހެން މީހަކު ފަރާތުން ލިބޭ ޒާތުގެ އަނިޔާއެއް ނުފެނޭ: ފުލުހުން
ނ. ހޮޅުދޫގައި މިދިޔަ ސެޕްޓެމްބަރު މަހު ޒަހަމްތަކަކާ އެކު މަރުވެފައި އޮއްވާ ފެނުނު ޒަކިއްޔާ މޫސާގެ ހަށިގަނޑުން އިތުރު މީހެއްގެ ފުށުން ލިބޭ ޒާތުގެ އަނިޔާއެއްގެ ނިޝާން ނުފެންނަ ކަމަށް ފުލުހުން މިއަދު ބުނެފި އެވެ.
މައްސަލައިގެ ފެށުން - ޒަކިއްޔާ މުސާ، 50، މާރަނގަ/ހޮޅުދޫ މަރުވެފައި އޮއްވާ ފެނުނީ އޭނާ ދިރިއުޅޭ ގޭގެ ގުދަން ތެރޭގަ އެވެ. ޒަކިއްޔާގެ މަރާ މެދު ޝައްކުތަކެއް އުފެދުނީ:
-
އޭނާ މަރުވެފައި އޮތްއިރު ކަރުގައި ޒަހަމްތަކެއް ހުރުމުން
-
ކައިރީގައި ވަޅިއެއް އޮތް
ވީކިހިނެއް؟ - މިއަދު ހަވީރު ބޭއްވި ނޫސްވެރިންގެ ބައްދަލުވުމެއްގައި ޗީފް އިންސްޕެކްޓާ އޮފް ޕޮލިސް މުހައްމަދު ސާމިހު ވަނީ މިހާތަނަށް ފުލުހުންގެ ތަހުގީގުން ހޯދިފައިވާ ބައެއް ކަންކަން ހާމަކުރައްވައިފަ އެވެ.
ތަފްސީލް - ސާމިހު ވިދާޅުވި ގޮތުގައި ޒަކިއްޔާ މަރުވީ އަމިއްލައަށްކަން ނުވަތަ ނޫންކަން ތަހުގީގުން އަދި ނުނިންމަ އެވެ. ނަމަވެސް މިހާތަަނަށް ބެލި ބެލުމުން އެހެން މީހެއްގެ ބައިވެރިވުން ފާހަގަ ނުކުރެވޭ ކަމަށް އޭނާ ވިދާޅުވި އެވެ. އެ މައްސަލައިގައި:
-
ޒަކިއްޔާގެ ހަށިގަނޑު މާލެ ގެނެސް، ޕެތޮލޮޖިސްޓް ޑޮކްޓަރަކަށް ވަނީ ދައްކާފައި
-
ޑޮކްޓަރު ބެލި ބެލުމުން އެހެން މީހެއްގެ ފުށުން ލިބޭ ޒާތުގެ އަނިޔާއެއް ނުފެންނަ ކަމަށް ޑޮކްޓަރު ލަފާ ދިން
-
ހަށިގަނޑުން ހެސިޓޭޝަން މާކްސް ނުވަތަ އަޅަން ނުކެރިގެން ވަޅި އަޅާފައި ހުންނަ ޒާތުގެ ނިޝާންތަކެއް ފެނުނު
-
އެކަން ހިނގި ތަނުގައި އިތުރު މީހެއް އުޅެފައިވާކަން ފާހަގަވާ ފަދަ ކަމެއް ނޫނީ ނިޝާނެއް ނުފެނޭ
-
ޒަކިއްޔާގެ ކަރުގެ ދެ ފަރާތުގައި ގިނަ ޒަހަމްތަކެއް ހުރި؛ ވާތު ފަޅީގައި ފުން ތިން ޒަހަމެއް، ކަނާތު ފަޅީގައި ފުން ދެ ޒަހަމެއް
-
މޭ މަތީ ވަތްކެއްގެ ނިޝާން ފާހަގަވި؛ ނަމަވެސް ޑޮކްޓަރު ލަފާ ދިނީ އެއީ މީހެއްގެ ފުށުން ލިބޭ އަނިޔާއަކާ އެއްވަރުގެ ވަތްކެއް ނޫން ކަމަށް
ޒަކިއްޔާގެ ހަށިގަނޑުގެ އޮޓޮޕްސީއެއް ހަދައިފައެއް ނުވެ އެވެ. ޗީފް ސުޕްރިޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ އޭރު މާލޭގައި ޕެތޮލޮޖިސްޓެއް ހުރުމުން ބޭރަށް ފޮނުވައިގެން އޮޓޮޕްސީއެއް ހެދުމުގެ ބޭނުމެއް ނެތް ކަމަށެވެ.
"ޕެތޮލޮޖިސްޓަކު ހަށިގަނޑު ބެލުމުން މަރުވި ސަބަބާއި މަރުވި ގޮތް ދެނެގަނެވެން އެބައޮތް. އޮޓޮޕްސީއަކުން ދެނެގަނެވޭނީ ހަމަ އެ މިންވަރަށް. އެއަކުން އިތުރަކަށް ހޯދޭނެ ކަމެއް ނެތް،" އޭނާ ވިދާޅުވި އެވެ.
ސީން އިން ފެނުނު ވަޅިއާ ގުޅޭ ގޮތުން ސާމީ ދެއްވި މައުލޫމާތަކީ އޭގައި ހުރީ ޒަކިއްޔާގެ ލޭ ކަމަށާއި އެއީ ބަދިގޭގައި ގެންގުޅޭ ވަޅިއެއް ކަމަށެވެ.
ނަމަވެސް އިނގިލީގެ ނިޝާނުގެ ތަހުލީލު އަދި ނުނިމޭތީ، އެ ވަޅީގައި އިނގިލީގެ ނިޝާން ހުރި މީހުން އަދި ދެނެގަނެވިފައި ނުވާ ކަމަށް އޭނާ ވިދާޅުވި އެވެ.
ފުލުހުން ގޮސް ސީން ބަންދުކުރީ މާ ލަހުން ކަމަށް ރަށު ތެރޭގައި ދެކެވޭ ވާހަކަތަކާ ގުޅޭ ގޮތުން ނޫސްވެރިން ސުވާލުކުރުމުން ޝަފީއު ވިދާޅުވީ ހެކި ނައްތާލެވޭ ފަދަ މާހައުލެއް ރަށުގައި ނެތް ކަމަށާއި ފުލުހުންނަށް މައުލޫމާތު ލިބުނުތާ ހަތަރު މިނެޓު ވެސް ނުވަނީސް ސީންއަށް ގޮސް ސީން ރައްކާތެރި ކުރި ކަމަށެވެ.
ކޮމެންޓް (2)
މޫނިސް
ހިރިގާ