ސިޔާސީ މަގާމުގައި ތިބެ ވަކާލާތު ނުކުރެވޭ މައްސަލަ ސުޕްރީމް ކޯޓަށް

ސިޔާސީ މަގާމުތަކުގައި ތިބެގެން ދައުލަތާ ދެކޮޅަށް ވަކާލާތު ނުކުރެވޭނެ ކަމަށް ހައި ކޯޓުން ނިންމި ނިންމުމެއް ސުޕްރީމް ކޯޓުގައި އިސްތިއުނާފުކޮށްފި އެވެ.

ވީކިހިނެއް؟ - އެއީ އިތުބާރު ކުރެވޭ މަގާމެއްގައި ހުރެ ކުޑަކުއްޖަކާ މެދު ޖިންސީ އަމަލެއް ހިންގި މައްސަލައެއް ރައްދުވާ މީހެއްގެ ވަކީލަކަށް އޭރު އެންވަޔަރަމަންޓުގެ ޑެޕިއުޓީ މިނިސްޓަރަކަށް ހުންނެވި މުހައްމަދު ރާގިބު ވަޑައިގަތުމުން ހައި ކޯޓުން ނިންމި ނިންމުމެކެވެ.

ތަފްސީލް - ސުޕްރީމް ކޯޓުގެ ރަޖިސްޓްރީން ދައްކާ ގޮތުގައި، އެޓާނީ ޖެނެރަލްގެ އޮފީހަށް ރައްދުވާ ގޮތަށް ހައި ކޯޓުގެ ނިންމުން އިސްތިއުނާފުކޮށްފައިވަނީ މިދިޔަ ބުދަ ދުވަހު އެވެ. ރާގިބުގެ އިސްތިއުނާފު ބަލައިގަންނަން ކޯޓުން އަދި ވަކި ގޮތެއް ނުނިންމަ އެވެ.

ފާހަގަކޮށްލެވޭ - ރައީސް އޮފީހާ ދެކޮޅަށް، ގދ. ތިނަދޫގައި 10،000 މީހުން ހަމަނުވަނީސް ސިޓީއެއްގެ ދަރަޖަ ދިނުމަށް ނިންމާފައިވާ ނިންމުން ބާތިލްކުރަން އެދި ރާގިބު ހައި ކޯޓަށް ދުސްތޫރީ މައްސަލައެއް ހުށަހެޅުއްވުމުން އިއްޔެ އޭނާ ވަނީ މަގާމުން ވަކިކޮށްފަ އެވެ.

ގުޅުން ހުރި - ސިޔާސީ މަގާމެއްގައި ހުރެގެން ދައުލަތާ ދެކޮޅަށް މައްސަލައެއްގައި ވަކާލާތު ނުކުރެވޭނެ ކަމަށް ހައި ކޯޓުން ނިންމި ފަހުން، ކޭ-ޕާކް ރެސިޑެންސްގެ ފްލެޓްތައް މަކަރާއި ހީލަތުން ވިއްކާފައިވާ ކަމަށް ތުހުމަތުކުރެވޭ މައްސަލާގައި ދައުވާކޮށްފައިވާ ހަސަން މަމްދޫހުގެ ވަކީލަކަށް ވެސް ކްރިމިނަލް ކޯޓަށް ރާގިބު ވަޑައިގަތެވެ. ކްރިމިނަލް ކޯޓުން ވަނީ ހައި ކޯޓުގެ ނިންމުމެއް އޮތް ނަމަވެސް ރާގިބަށް ފުރުސަތު ދީފަ އެވެ.