ބުރާސްފަތި ދުވަހު ކޯޓަށް މައްސަލަ ހުށަހެޅުއްވުމަށް ފަހު ރާގިބް ނޫސްވެރިންނާ ވަހަކަދައްކަވަނީ (ފޮޓޯ/ޕީޕީއެމް)
ތިނަދޫން ސިޓީގެ ދަރަޖަ އުވާލުމަށް ކޯޓަށް މައްސަލަ ހުށަހެޅުއްވި ޑެޕިއުޓީ މިނިސްޓަރު ރާގިބު މަގާމުން ވަކިކޮށްފި
ގދ. ތިނަދުއަށް ސިޓީގެ ލަގަބު ދިނުމަށް ކުރީގެ ރައީސް އިބްރާހީމް މުހައްމަދު ސޯލިހު ނިންމެވި އިރު އެ ރަށުގައި 10،000 މީހުން ހަަމަނުވާ ކަމަށް ބުނެ، ސިޓީގެ ދަރަޖަ އަތުލަން އެދި، ހައި ކޯޓަށް ދުސްތޫރީ މައްސަލައެއް ހުށަހެޅުއްވި އެންވަޔަރަމަންޓް މިނިސްޓްރީގެ ޑެޕިއުޓީ މިނިސްޓަރު އަދި ގާނޫނީ ވަކީލު މުހައްމަދު ރާގިބު އަހުމަދު މިއަދު އެ މަގާމުން ރައީސް މުހައްމަދު މުއިއްޒު ވަކިކުރައްވައިފި އެވެ.
ވީ ކިހިނެއް؟ - ހައި ކޯޓުގެ ރަޖިސްޓްރީން ދައްކާ ގޮތުގައި، ރައީސް އޮފީހަށް ރައްދުވާ ގޮތަށް ރާގިބު އެ މައްސަލަ ހުށަހެޅުއްވީ މިދިޔަ ބުރާސްފަތި ދުވަހު އެވެ.
ތަފްސީލް - ރައީސް އޮފީހުގެ ޗީފް ސްޕޯކްސްޕާސަން ހީނާ ވަލީދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ "ތިނަދޫއަށް ސިޓީއެއްގެ ދަރަޖަ ދިނުން އުވާލުމަށް ދައުލަތާ ދެކޮޅަށް ކޯޓަށް ދިއުމާ ގުޅިގެން، މިނިސްޓްރީ އޮފް ކްލައިމެޓް ޗޭންޖު، އެންވަޔަރަމަންޓް އެންޑް އެނާޖީގެ ޑެޕިއުޓީ މިނިސްޓަރު އަލްއުސްތާޒު މުހައްމަދު ރާގިބު އަހުމަދު މިއަދު މަގާމުން ރައީސުލްޖުމްހޫރިއްޔާ ވަކި ކުރައްވައިފި" ކަމަށެވެ.
ރާގިބު 'ދައުރު' ނޫހަށް ހިއްސާކުރެއްވި އެ މައްސަލައިގެ ލިޔެކިޔުމުގައިވާ ގޮތުން، އެއީ ތިނަދޫގައި 10،000 މީހުން ހަމަވާ ކަމަށް ދައްކާފައިވަނީ ސައްހަ ނޫން ލިޔެކިޔުންތަކުގެ މައްޗަށް ކަމަށް ބުނެ ހައި ކޯޓަށް ހުށަހަޅާފައިވާ މައްސަލައެކެވެ. އެގޮތުން:
-
ތިނަދޫގެ އާބާދީއަށް 10،000 މީހުން ހަމަކުރުމަށްޓަކައި ކައުންސިލްގެ ދަފްތަރުގައި މަރުވެފައިވާ 115 މީހަކު ހިމަނާފައިވާ ކަމަށް ބުނެފައިވޭ
-
ކައުންސިލްގެ ލިސްޓުގައި ތަކުރާރުވާ އައިޑީ ކާޑުތައް ގިނަ ކަމަށް ވެސް ބުނެފައިވޭ
-
ޑިޕާޓްމަންޓް އޮފް ނެޝަނަލް ރަޖިސްޓްރޭޝަން (ޑީއެންއާރު)ގެ ރަޖިސްޓްރީ ލިސްޓާއި ކައުންސިލްގެ ލިސްޓު އަޅައިކިޔުމުން ގާނޫނީ ގިނަ މައްސަލަތަކެއް ފާހަގަވޭ
-
މައުލޫމާތު ހޯދުމާއި ލިބިގަތުމުގެ ގާނޫނުގެ ދަށުން ޑީއެންއާރުން ހޯދި ލިސްޓުން ފެންނަނީ މި މަހުގެ 17ގެ ނިޔަލަށް ވެސް ތިނަދޫގެ އާބާދީއަކީ 7،924 ކަމަށް
ދުސްތޫރީ މައްސަލާގައި އެދިފައިވަނީ ތިނަދުއަކީ ސިޓީއެއްގެ ގޮތުގައި ކަނޑައެޅި ނިންމުމާއި އެ ނިންމުމާ ގުޅިގެން އަޅާފައިވާ އެންމެހާ އިދާރީ ފިޔަވަޅުތައް ބާތިލްކުރުމަށެވެ.
މި މައްސަލަ ބަލައިގަތުމާ މެދު ހައި ކޯޓުން އަދި ވަކި ގޮތެއް ނުނިންމާ ކަމަށް އެ ކޯޓުގެ ރަޖިސްޓްރީން ދައްކަ އެވެ.
ފަސްމަންޒަރު - ތިނަދުއަށް ސިޓީއެއްގެ ދަރަޖަ ދިނީ 31 އޮގަސްޓް 2023ގަ އެވެ. އެކަން ކުރީގެ ރައީސް އިބްރާހިމް މުހައްމަދު ސޯލިހު އިއުލާން ކުރެއްވީ އެ މަނިކުފާނުގެ ރިޔާސީ ކެމްޕެއިންގެ ތެރެއިން ތިނަދުއަށް ވަޑައިގެން ބޭއްވި ޕާޓީ ޖަލްސާއެއްގަ އެވެ.
އެނގުން މުހިންމު - ސޯލިހު ތިނަދުއަށް ސިޓީއެއްގެ ދަރަޖަ ދެއްވި އިރު ވެސް ޑީއެންއާރުގެ މައުލޫމާތުން ދެއްކީ ރަށުގެ ރަޖިސްޓްރީގައި ހިމެނެނީ 7،906 މީހުން ކަމަށެވެ.
ނަމަވެސް އޭގެ ފަހުން އިލެކްޝަންސް ކޮމިޝަން (އީސީ) އިން 20 ވަނަ ރައްޔިތުންގެ މަޖިލީހުގެ އިދާރީ ދާއިރާތައް ކަނޑައެޅުމަށް އެކުލަވާލި ރިޕޯޓުގައިވާ ގޮތުން ތިނަދޫގެ ރަޖިސްޓްރީ އާބާދީއަކީ 10،150 އެވެ. އެއީ އެ ރަށުގެ އުތުރު ދާއިރާގައި 5،076 މީހުން އަދި ދެކުނު ދާއިރާގައި 5،074 މީހުން ކަމަށް އެ ރިޕޯޓުގައިވެ އެވެ.
ކުރު މުއްދަތެއްގެ ތެރޭގައި އެ ރަށުގެ އާބާދީ އެހާ އަވަހަށް އިތުރުވި ގޮތަކާ މެދު އޭރު ވެސް ގިނަ ބަޔަކު ދިޔައީ ސުވާލު އުފައްދަމުންނެވެ.
ކޮމެންޓް (1)
ރާގުބެ