ރިލްވާން މަރުގެ މައްސަލައިގައި ދައުވާ ކުރި ތިން މީހުން(ކ-ވ): އަހްމަދު މުއާޒު (ގަޓު މުއާ)، އަހުމަދު އިސްމާއިލް (އަހަނދު) އަދި އިސްމާއިލް އަބްދުލްރަހީމް އާދަމް (އިސޫ): ގެއްލުމުގެ ބަދަލު ހޯދަން މުއާ ކޯޓަށް ދިޔަ.
މުއާޒުއަށް ޓެރަރިޒަމްގެ ދައުވާކުރި މައްސަލާގައި ކޯޓުން ގެއްލުމުގެ ބަދަލު ނަގައިނުދިން
ނޫސްވެރިޔާ އަހްމަދު ރިލްވާން އާއި ބްލޮގަރު ޔާމީން ރަޝީދުގެ މަރާ ގުޅިގެން އަހުމަދު މުއާޒު (ގަޓު މުއާ) ގެ މައްޗަށް ޓެރަރިޒަމްގެ އަމަލެއް ކުރަން އުޅުމުގެ ދައުވާކުރި މައްސަލާގައި އޭނާއަށް ގެއްލުމުގެ ބަދަލު ނަގައިނުދެވޭނެ ކަމަށް ސިވިލް ކޯޓުން މިއަދު ހުކުމްކޮށްފި އެވެ.
ކަމުގެ ފެށުން - ކުރީގެ ރައީސް އިބްރާހިމް މުހައްމަދު ސޯލިހް އެކުލަވާލެއްވި މަރު ކޮމިޝަނުން ތަހުގީގު ކުރަމުން އައި މިނިވަން ނޫހުގެ ނޫސްވެރިޔާ ރިލްވާން ގެއްލުވާލުމާއި ބްލޮގަރު ޔާމީން މަރާލުމުގެ މައްސަލާގައި 26 ޖޫން 2023ގައި މުއާ ހިމެނޭހެން ތިން މީހަކު ހައްޔަރުކުރި އެވެ.
ތިން މީހުނަށް 1 ސެޕްޓެމްބަރު 2023ގައި ދައުވާކުރި ނަމަވެސް ތިން މީހުންގެ މައްޗަށް ދައުވާ ސާބިތުނުވާ ކަމަށް ނޮވެމްބަރު 2023ގައި ކްރިމިނަލް ކޯޓުން ހުކުމްކުރި އެވެ.
ދައުލަތުން އޭރު ކުރި ދައުވާތަކަކީ:
-
އަހުމަދު އިސްމާއިލް (އަހަނދު)، މއ. ފާގަފިލާގެ - ޓެރަރިޒަމްގެ އަމަލެއް ކުރުމަށް އެހީތެރިވުން އަދި ޓެރަރިޒަމްގެ އަމަލެއް ކުރުމަށް ރޭވުން
-
އިސްމާއިލް އަބްދުއްރަހީމް އާދަމް (އިސޫ)، މ. ލެގޫންވިއު - ޓެރަރިޒަމްގެ އަމަލެއް ކުރުމަށް އެހީތެރިވުމުގެ ދެ ދައުވާ
-
އަހްމަދު މުއާޒު (ގަޓު މުއާ)، މާލޭ ދަފްތަރު އާރުއެސް 8499 - ޓެރަރިޒަމްގެ އަމަލެއް ކުރުމަށް ރޭވުން
ވީކިިހިނެއް؟ - މުއާޒު ވަނީ އޭނާ ނުކުރާ ކުށެއްގައި ބަންދުކޮށް އަސާސެއް ނެތް ދައުވާއެއް ކުރީ ކަމަށް ބުނެ ގެއްލުމުގެ ބަދަލު ހޯދަން ސިވިލް ކޯޓަށް މައްސަލައެއް ހުށަހަޅައިފަ އެވެ.
ތަފްސީލް - މުއާޒު އެދިފައިވަނީ ގެއްލުމުގެ ބަދަލުގެ ގޮތުގައި ގާތްގަނޑަކަށް 5 މިލިއަން ރ. ދިވެހި ދައުލަތުން ނަގައިދިނުމަށެވެ. އޭނާކުރާ ދައުވާ ރައްދުކުރަނީ:
-
ޕްރޮސެކިއުޓަ ޖެނެރަލް އޮފީސް
-
މަރުތައް ބެލުމަށް އެކުލަވާލި ރިޔާސީ ކޮމިޝަން
-
ކޮމިޝަންގެ ރައީސަކަށް ހުންނެވި ފަރީޝާ އަބްދުﷲ
-
ކޮމިޝަންގެ މެންބަރަކަށް ހުންނެވި މިސްބާހު އައްބާސް
-
ކޮމިޝަންގެ މެންބަރަކަށް ހުންނެވި އަހުމަދު ނާޝިދު
ހުކުމް - ސިވިލް ކޯޓުގެ ގާޒީ އަބްދުﷲ އިހުސާން ކުރެއްވި ހުކުމުގައި ވަނީ މުއާ ކޮށްްފައިވާ ދައުވާތައް ކުރިއަށް ގެންދެވޭނެ ތަނެއް ނެތް ކަމަށެވެ. އެ ގޮތުން:
-
ހެޔޮ ނިޔަތެއް ނެތި ތަހުގީގެއް ހިންގައި ދައުވާކޮށްފައިވާ ކަމަށް ބަލާނެ ނުވަތަ ކަނޑައަޅާނެ މިންގަނޑެއް ރާއްޖޭގެ ގާނޫނުތަކުގައި ނެތް
-
ގާނޫނެއްގައި އުސޫލެއް ނެތަސް ދައުވާއެއް ކުރުމުގައި ނުރަނގަޅު ނިޔަތެއް ފެށުމުގައި ވެސް އޮތް ކަން ސާބިތުކޮށްދީފިނަމަ ގެއްލުމުގެ ބަދަލު ނަގައިދެވޭނެ
-
މުއާއަށް ދައުވާކުރުމުގައި ނުރަނގަޅު ނިޔަތެއް މުއައްސަސާތަކުގެ ތެރޭގައި އޮތް ކަން ސާބިތުކޮށްދެވޭ ވަރުގެ ހެއްކެއް ހުށަހަޅައިފައެއް ނެތް
ކޮމެންޓް