ގާނޫނު އަސާސީ ބިލަށް ހިޔާލު ހުށަހަޅަން ވަގުތު ލިބޭ ގޮތަށް ކުރިއަށްގެންދަން ބާ ކައުންސިލުން ގޮވާލައިފި

ރައްޔިތުންގެ މަޖިލީހުގެ މެންބަރަކު ޕާޓީން ވަކިވާ ހާލަތުގައި، މެންބަރުކަމުގެ ގޮނޑި ގެއްލޭ ގޮތަށް ސަރުކާރުގެ ފަރާތުން ގާނޫނުއަސާސީއަށް ގެންނަން އުޅޭ އިސްލާހަށް ހިޔާލު ހުށަހަޅަން އެކަށީގެންވާ ފުރުސަތު ލިބޭގޮތަށް ބިލުގެ ކަންކަން ކުރިއަށް ގެންދިއުމަށް ބާ ކައުންސިލުން މިއަދު ގޮވާލައިފި އެވެ.

ވީ ކިހިނެއް؟ - މެންބަރުންގެ ގޮނޑި ގެއްލޭނެ ހަތަރު ހާލަތެއް ބަޔާންކޮށް، ގާނޫނު އަސާސީއަށް އިސްލާހު ގެންނަން ހުށަަހަޅާފައިވަނީ ސަރުކާރުގެ ފަރާތުން ޕީއެންސީގެ ޕާލިމަންޓްރީ ގްރޫޕުގެ ޑެޕިއުޓީ ލީޑަރު، ހުޅުދޫ ދާއިރާގެ މެންބަރު މުހައްމަދު ޝާހިދު (ޝާޑު) އެވެ.

ކުއްލި ގޮތަކަށް ރޭ ހުށަހެޅި އެ ބިލުގެ ފުރަތަމަ ކިއުން އިއްވައި އިބްތިދާއީ ބަހުސްގެ މަރުހަލާ ވެސް މިއަދުގެ މަޖިލީހުގައި ވަނީ ނިންމައިފަ އެވެ. އެއަށް ފަހު އަވަސް އަރުވާލައިގެން މުޅި މަޖިލީހުގެ ކޮމިޓީއަށް މި ބިލު މިއަދު ފޮނުވި އިރު ދެ ގަޑިއިރު ތެރޭ އެ ބިލު ފާސްކުރަން އެ ކޮމިޓީން ވެސް ވަނީ ނިންމައިފަ އެވެ.

ތަފްސީލް - ބާ ކައުންސިލުން މީގެ ކުޑައިރުކޮޅެއްކުރިން ނެރުނު ބަޔާނެއްގައި ބުނީ އެ ބިލާ ގުޅިގެން ބާ ކައުންސިލުގެ އާންމު މެންބަރުންނާއި ގާނޫނީ ދާއިރާގެ ބޭފުޅުންގެ ކަންބޮޑުވުންތައް އެބަހުރި ކަމަށެވެ. އެ ބިލާ ގުޅޭގޮތުން ބާ ކައުންސިލުގެ އާންމު މެންބަރުންގެ ހިޔާލާއި މަޝްވަރާ މަޖިލީހަށް ހުށަހެޅުމަކީ މުހިންމު ކަމެއް ކަމަށް އެ ކައުންސިލުގެ އެގްޒެކްޓިވް ކޮމިޓީއަށް ފެންނަ ކަމަށް ވެސް އެ ބަޔާނުގައި ބުނެފައިވެ އެވެ.

އެހެންވެ، އެ ބިލަށް ހިޔާލު ހުށަަހަޅަން ފުރުސަތު ދިނުމަށް މަޖިލީހަށް ހުށަހަޅާފައިވާނެ ކަަމަށް ބުންޏެވެ.

ބާ ކައުންސިލުން ބުނީ:

ފާހަގަކޮށްލެވޭ ކަމެއްް - ބިލަށް ހިޔާލު ހުށަހަޅަން އެކަށީގެންވާ ފުރުސަތު ދިނުމަށް ބާ ކައުންސިލުން މަޖިލީހަށް ގޮވާލި އިރު، އެ ބިލަށް ބަހުސްކުރުމާ އެކު ވޯޓަށް އެހުމަށް މިއަދު 5:30 އަށް ޖަލްސާއެއް މިހާރު ވަނީ އެޖެންޑާ ކޮށްފަ އެވެ.