ޖަލަށް ޑްރަގު ވެއްދުމުގެ ތުހުމަތުގައި ދައުވާ އުފުލާފައިވާ މުހައްމަދު ފަތޫހު އަބްދުﷲ
ޖަލަށް ޑްރަގް ވެއްދި އޮފިސަރުންގެ މައްސަލަ: ފަތޫހު ވެސް އިއުތިރާފު އަނބުރާ ގެންގޮސްފި
މާފުށީ ޖަލުގައި ގައިދީންނަށް ފޯނާއި މަސްތުވާތަކެތި ފޯރުކޮށްދިނުމަށް އެހީތެރިވުމުގެ ތުހުމަތުގައި ދައުވާ އުފުލާފައިވާ މުހައްމަދު ފަތޫހު އަބްދުﷲ ވެސް އޭނާގެ އިއުތިރާފު އެއްބަސްވުން މިއަދު އަނބުރާ ގެންގޮސްފި އެވެ.
ވީ ކިހިނެއް؟ - މި މައްސަލާގައި ކަރެކްޝަންސްގެ 13 އޮފިސަރަކަށް ދައުވާކޮށްދޭން އެދި ފުލުހުން ޕީޖީ އޮފީހަށް ފޮނުވި ނަމަވެސް، ދައުވާކޮށްފައިވަނީ ފަސް އޮފިސަރެއްގެ މައްޗަށެވެ.
އެ ފަސް މީހުންނަކީ:
-
ޖިނާހު އަބްދުއްރަހީމް، އައިވަރީ ހައުސް/ރ.އުނގޫފާރު
-
އަލީ ހިޝާމް، ބީޗްހައުސް/ ކ. މާފުށި
-
އަލީ ނާޒިމް، ތަރާނާގެ/ހދ. ނޭކުރެންދޫ
-
މުހައްމަދު ފަތޫހު އަބްދުﷲ، ކުއްޅަވައްގެ/ގއ. ވިލިނގިލި
-
އަލީ އަޝްފާގު، ކާމިނީގެ/ނ.ލަންދޫ
-
ފަތޫހު، ކުއްޅަވައްގެ/ގއ. ވިލިނގިލި
ދައުވާތަކަށް އެއްބަސްވެ އިއުތިރާފުގެ އެއްބަސްވުމެއް ދައުލަތާ އެކު ހަދާފައިވަނީ މި މައްސަލާގައި ހިމެނޭ ތިން މީހެކެވެ. އެ ތިން މީހުންނަކީ:
-
އަލީ ނާޒިމް
-
ފަތޫހު
-
އަލީ އަޝްފާގު
އޭގެތެރެއިން ފަތޫހު ފިޔަވައި ދެން ތިބި ދެމީހުން މިދިޔަ މަސްތެރޭ ވަނީ އިއުތިރާފު އެއްބަސްވުން އަނބުރާ ގެންގޮސްފަ އެވެ.
ތަފްސީލް - ދައުވާތަކާ މެދު ފަތޫހުގެ ބައި ކުރިއަށް ގެންދިއުމަށް މިއަދު ބޭއްވި އަޑުއެހުމުގައި އޭނާ ވަނީ އޭނާގެ އިއުތިރާފުގެ އެއްބަސްވުމުން އަނބުރާ ގެންގޮސްފަ އެވެ. އެއްބަަސްވުން އުވޭ ހާލަތުގައި އެ އެއްބަސްވުމުން ދީފާއިވާ ލުއިތަަކަށް ވެސް ބަދަލު އަންނާނެ އެވެ.
މީގެ ކުރިން އެއްބަސްވުމުން ރުޖޫއަވި ދެމީހުންގެ މައްޗަށް ވެސް އުފުލާފައިވާ ދައުވާތައް ބާތިލުކޮށް މައްސަލަަ އަލުން ހުށަހަޅަން މި މައްސަލަ ބައްލަވާ ގާޒީ އިސްމާއިލް ޝަފީއު އޮތީ ފުރުސަތު ދެއްވައިފަ އެވެ. ފަތޫހުގެ ބައިގައި ވެސް މައްސަލަ އަލުން ހުށަހަޅަން ގާޒީ މިއަދު ވަނީ ފުރުސަތު ދެއްވާފަ އެވެ.
އެނގުން މުހިންމު - އިއުތިރާފުގެ އެއްބަސްވުން އުވާލި ސަބަަބަކަށް މި މައްސަލާގައި ހިމެނޭ މީހުން ބުނަނީ ދައުލަތުން އެއްބަސްވެފައިވާ ގޮތަށް ބަންދަށް ލުއިދީފައި ނުވާ ކަމަށެވެ.
މި މައްސަލާގައި ދެން ހިމެނޭ ހިޝާމް އާއި ޖިނާހު މިހާތަނަށް ކުށަށް އިއުތިރާފުވެފައެއް ނުވެ އެެވެ. މައްސަލާގައި ހިމެނޭ އެންމެން ވެސް މިހާރު ތިބީ ބަންދުން ދޫކޮށްލާފަ އެވެ.
ކޮމެންޓް