ވެރިކަމަށް ފައްޔާޒު ޝައުގުވެރިވޭ، އެކަމަކު 2028 އަށް ގޮތެއް ނުނިންމާ

ރިޔާސީ އިންތިހާބުގައި ވާދަކުރެއްވުމަށް ޝައުގުވެރިވެވަޑައިގަންނަވާކަން އެމްޑީޕީގެ ޗެއާޕާސަން ފައްޔާޒު އިސްމާއީލް މިރޭ ހާމަކުރައްވައިފި އެވެ.

ތަފްސީލް - 'އަދަދު'ގެ އިންޓަވިއުއެއްގައި ފައްޔާޒު ވިދާޅުވީ ރާއްޖޭގެ ވެރިކަން ކުރުމުގެ ޝައުގުވެރިން މިހާރު އެބަހުރި ކަމަށެވެ. ނަމަވެސް 2028ގެ ރިޔާސީ އިންތިހާބުގައި ވާދަކުރެއްވުމާ މެދު ވަކި ގޮތެއް އަދި ނުނިންމަވާ ކަމަށް ވިދާޅުވި އެވެ.

ބުނީ ކީކޭ؟ - "ވަރަށް ގިނަ ބޭފުޅުން ވިދާޅުވާނެ ތިމަންނާ އެކަހަލަ އިންޓްރެސްޓެއް ނެތޭ އިނގޭތޯ؟ އަޅުގަނޑުގެ އިންޓްރެސްޓް އެބަހުރި. އެކަމަކު އޭގެ މާނައަކީ 2028ގައި އެކަން ކުރަން ނިންމައިގެން އަޅުގަނޑު ހުރި ވާހަކައެއް ނޫން،" ފައްޔާޒު ވިދާޅުވި އެވެ.

އޭނާ ވިދާޅުވީ އެމްޑީޕީގައި ރަނގަޅު ލީޑަރުން އެބަ ތިބި ކަމަށާއި ޑިމޮކްރެޓިކް ޕްރައިމަރީއެއް ބާއްވައިގެން އެންމެ ރަނގަޅު ލީޑަރު ހޯދޭނެ ކަމަށެވެ.

މިދިޔަ އަހަރުގެ ރިޔާސީ ޕްރައިމަރީން ކުރީގެ ރައީސް މުހައްމަދު ނަޝީދު ނާކާމިޔާބުވެވަޑައިގެންނެވުމުން އެމަނިކުފާނާ އެކު ގިނަ އަދަދެއްގެ ސަޕޯޓަރުން ޕާޓީން ވަކިވި ނަމަވެސް ދެން އެ މާޒީ ތަކުރާރުވާނެ ކަމަށް ގަބޫލު ނުކުރައްވާ ކަމަށް ފައްޔާޒު ވިދާޅުވި އެވެ.

"ރައީސް ނަޝީދަކީ ވަރަށް ވަރުގަދަ ލީޑަރެއް. އޭރު އެކަން އެހެން ދިމާވިއަސް ދެން ގަބޫލެއް ނުކުރެވޭ. މިހާރު މިއީ ވަކި މާ ވަރުގަދަ އެއް ލީޑަރަކަށް ބަރޯސާވާ ޕާޓީއެއް ނޫން. ސިޔާސަތުތަކަކަށް ބަރޯސާވާ ޕާޓީއެއް،" ފައްޔާޒު ވިދާޅުވި އެވެ.

ފާހަގަކޮށްލެވޭ - ފައްޔާޒުގެ އިތުރުން އެމްޑީޕީގެ ރައީސް އަދި ކުރީގެ ފޮރިން މިނިސްޓަރު އަބްދުﷲ ޝާހިދާއި ކުރީގެ ނައިބު ރައީސް ފައިސަލް ނަސީމް ވެސް ރިޔާސީ އިންތިހާބަށް ކުރިމަތިލައްވަން މަސައްކަތް ކުރައްވާ ކަމަށް އަޑުތައް އިވެ އެވެ.