ފެނަކައިގެ ނުހަދާ ހުރި މާލީ ހިސާބުތައް ފެބްރުއަރީގެ ކުރިން ނިންމަނީ

ވޭތުވެދިޔަ އަހަރުތަކުގައި ފެނަކައިގެ އޮޑިޓު ރިޕޯޓު ތައްޔާރު ނުކުރެވި އޮތީ އެ ކުންފުނީގެ މާލީ ހިސާބުތައް ވެސް ތައްޔާރުނުކުރާތީ ކަމަށާއި އެ ހިސާބުތައް އަންނަ ފެބްރުއަރީގެ ކުރިން ލިބޭނެ ކަމުގެ ޔަގީންކަން އޮޑިޓަ ޖެނެރަލް ހުސައިން ނިޔާޒީ ދެއްވައިފި އެވެ.

ވީ ކިހިނެއް؟ - މިއަދު ބޭއްވި ބަޖެޓް ދިރާސާކުރާ ކޮމެޓީގައި ފެނަކައިގެ މާލީ ހާލަތާއި ކުންފުނީގައި ހުރި ބޮޑެތި މައްސަލަތަކާ ގުޅޭ ގޮތުން ބައެއް މެމްބަރުން ވަނީ ސަރުކާރުގެ އިސް ބޭފުޅުންނާ ސުވާލުކުރައްވާފަ އެވެ.

މިއަދުގެ ބައްދަލުވުމުގައި ފިނޭންސް މިނިސްޓަރު މޫސާ ޒަމީރާއި އޮޑިޓަ ޖެނެރަލް ހުސައިން ނިޔާޒީ އަދި އެމްއެމްއޭގެ ގަވަރުނަރު ޑރ. އަހްމަދު މުނައްވަރު ބައިވެރިވެވަޑައިގަތެވެ.

ބުނީ ކީކޭ؟ - އެ ބައްދަލުވުމުގައި ހަނިމާދޫ ދާއިރާގެ އެމްޑީޕީ މެމްބަރު އަބްދުލް ގަފޫރު މޫސާ ކުރެއްވި ސުވާލަކަށް ޖަވާބުދެއްވަމުން ޒަމީރު ވިދާޅުވީ ފެނަކައިގެ މައްސަލައިގެ ވާހަކަ ފަށަންވީ ހިސާބު ވެސް އެނގިވަޑައިނުގަންނަވާ ކަމަށެވެ.

"އޮޑިޓަ ޖެނެރަލްއާ އަޅުގަނޑާ އެންމެ ފުރަތަމަ މި މަގާމާ ހަވާލުވެފައި ބައްދަލުކޮށްފައި ދެންނެވިން މިކަމަށް ލަފަޔެއް ދެއްވާށޭ، ކިހިނެއްތޯ ކުރިއަށްގެންދެވޭނީ،" ޒަމީރު ވިދާޅުވި އެވެ.

"[އޮޑިޓަ ޖެނެރަލް] ވިދާޅުވީ 'ކިހިނެއްހޭ ހަދާނީ، ތިން އަހަރު ވެއްޖޭ ތިތަނުގައި އޮޑިޓެއް ނުކުރާތާ. އޮޑިޓު ކުރަން އެތެރެއަށް ދިޔައިމަ އެތާ ހުރި މީހާ ބުންޏޭ ތިހިރީ ސިސްޓަމޭ އޮޑިޓުކުރާށޭ.' މިއީ ހާލަތު ހުރި ގޮތް."

ތަފްސީލު - އެ ބައްދަލުވުމުގައި ތިނަދޫ އުތުރު ދާއިރާގެ ޕީއެންސީ މެމްބަރު ސައުދުﷲ ހިލްމީ ދެއްކެވި ވާހަކައިގައި ވިދާޅުވީ:

ކަންބޮޑުވުންތައް ހިއްސާކުރައްވައި އޭނާ އުފެއްދެވި ސުވާލަކީ މި ހިސާބަށް ކަންކަން ގޯސްވެގެން ގޮސް، ކުންފުނިތައް އޮޑިޓު ނުކޮށް އޮންނައިރު އޮޑިޓު އޮފީހަށް އަމިއްލައަށް  ކަންކަން ބެލޭނެ ގާނޫނީ ބާރެއް ނޯންނަނީތޯ އެވެ.

މެމްބަރުގެ ސުވާލަށް ނިޔާޒީ ދެއްވި ޖަވާބުން ދޭހަވަނީ، ފެނަކައިން މިވީ ތިން އަހަރުގެ މާލީ ހިސާބުތައް ތައްޔާރުނުކޮށް ހުރި ކަމެވެ.

އޭނާ ވިދާޅުވީ ސަރުކާރު ހިއްސާވާ ކުންފުނިތަކުގެ ހާއްސަ އޮޑިޓުތަކާއި ފައިނޭންޝަލް އޮޑިޓު ފަދަ ވަރަށް ގިނަ އޮޑިޓުތައް އެ އޮފީހުން އަބަދުވެސް ކުރަމުން އަންނަ ކަމަށެވެ.

އެ އޮޑިޓުތަކުން އިސްރާފާއި މަކަރާއި ހީލަތާއި މާލީ ހިސާބުތަކުގައި ހުންނަ މައްސަލަތައް ވެސް ފާހަގަކުރެ އެވެ.

ފެނަކައިގެ އޮޑިޓު މިހާރު ކުރަމުން އަންނަ ނަމަވެސް، ނިޔާޒީ ވިދާޅުވީ ކުންފުނީގެ ފައިނޭންޝަލް އޮޑިޓެއް ކުރިއަށް ގެންދެވޭނީ ކުންފުނީގެ މާލީ ހިސާބުތައް ވެސް ތައްޔާރުކޮށްގެން ކަމަށެވެ.

"ވަރަށް ގިނަ އޮޑިޓުތައް ލަސްވެފައި އެބަހުރި ބައެއް ކުންފުނިތަކުން މާލީ ހިސާބުތައް ތައްޔާރުކުރުން ލަސްވެގެން،" ނިޔާޒީ ވިދާޅުވި އެވެ.

"ވަރަށް ޔަގީންކަން ދެން، ފެނަކައިގެ އޮޑިޓު ވެސް އަޅުގަނޑުމެން އިންނާނީ މިހާރުގެ މެނޭޖްމަންޓާ އެއްކޮށް ވާހަކަ ދެކެވިފައި، ފެބްރުއަރީ ނިމުމުގެ ކުރިން އެއްކޮށް ވޭތުވެދިޔަ ތަނުގެ ނުނިމި ހުރި ހުރިހާ ހިސާބުތަކެއް ވެސް އެ ބޭފުޅުން ސަބްމިޓުކޮށް އަޅުގަނޑުމެންނަށް ނިންމާލެވޭނެ ކަމަށް،" ނިޔާޒީ ވިދާޅުވި އެވެ.

ގުޅުން ހުރި ކަމެއް - އޮޑިޓަ ޖެނެރަލްގެ އޮފީހުގެ ވެބްސައިޓުން ދައްކާ ގޮތުގައި ފެނަކައިގެ 2022 އާއި 2023ގެ އޮޑިޓް ހަދާފައެއްނުވެ އެވެ.