އަރަބި އަދި އިސްލާމީ ލީޑަރުންގެ ސަމިޓްގައި ފަލަސްތީނާއި ލުބުނާނުގެ ރައްޔިތުންނަށް ދޭ އަނިޔާ ކުށްވެރިކޮށް ސައޫދީ ވަލީއަހުދު ވާހަކަފުޅު ދައްކަވައިފި

 ގާޒާއާާއި ލުބުނާނަށް އިޒްރޭލުން ދެމުންދާ ހަމަލާތައް ވަގުތުން ހުއްޓާލަންޖެހޭ ކަމަށް ސައޫދީ އަރަބިއްޔާގެ ވަލީއަހުދު މުހައްމަދު ބިން ސަލްމާން ވިދާޅުވެއްޖެ އެވެ.

ރިޔާޒުގައި މިއަދު ފެށި އަރަބި ލީގާއި އޯގަނައިޒޭޝަން އޮފް ދަ އިސްލާމިކް ކޯޕަރޭޝަން (އޯއައިސީ) ގެ އެކުއެކީގައި ބޭއްވޭ ސަމިޓްގައި ވާހަކަފުޅު ދައްކަވަމުން، އެމްބީއެސް ގެ ނަމުންވެސް މަޝްހޫރު ވަލީއަހުދު، "ފަލަސްތީނާއި ލުބުނާނުގެ ރައްޔިތުންނަށް ދެމުންދާ އަނިޔާވެރި ގަތުލުއާންމު" ކުށްވެރިކުރެއްވި އެވެ.

އެމަނިކުފާނު ވަނީ "އިތުރު އެއްވެސް އަނިޔާވެރި އަމަލެއް" ހިންގުމުން ދުރުހެލިވުމަށް އިޒްރޭލަށް ގޮވާލައްވާ، ދުނިޔޭގެ ގައުމުތަކަށް ފަލަސްތީން ދައުލަތް ބަލައިގަތުމަށްވެސް ގޮވާލައްވާފަ އެވެ.

އަރަބި ލީގުގެ ސެކްރެޓަރީ ޖެނެރަލް އަހްމަދު އަބޫލް ޣައިތުވެސް ވަނީ ގާޒާއާއި ލުބުނާނުގައި އިޒްރޭލުން ހިންގަމުންދާ ހަނގުރާމަވެރި އަމަލުތައް ކުށްވެރިކުރައްވައި، "ފަލަސްތީނު ރައްޔިތުންގެ ހާލު ބަޔާންކުރާނެ ބަހެއް ނެތް" ކަމަށް ވިދާޅުވެފަ އެވެ.

"އިޒްރޭލުން ފަލަސްތީނު ރައްޔިތުންނާ މެދު ކުރަމުންދާ އަނިޔާވެރި އަމަލުތަކުން ދެމެހެއްޓެނިވި ސުލްހަ ހޯދުމުގެ މަސައްކަތްތައް ނަގާލަނީ. ދެމެހެއްޓެނިވި ސުލްހައެއް ގާއިމްކުރެވޭނީ އިންސާފުގެ މަގުން" ކަމަށް އަބޫލް ޣައިތު ވިދާޅުވި އެވެ.

އެމަނިކުފާނު އިތުރަށް ވިދާޅުވީ "އިޒްރޭލުގެ އަނިޔާވެރިކަމަށް ދުނިޔެއަށް ލޯމަރާލައިގެން ތިބެވޭކަށް ނެތް" ކަމަށެވެ.

ސަޢޫދީ ޕްރެސް އޭޖެންސީން ބުނެފައިވަނީ ގާޒާއާއި ލުބުނާނަށް އިޒްރޭލުން ދެމުންދާ "ހަމަލާތަކުގެ" ސަބަބުން އަރަބި އަދި އިސްލާމީ ލީޑަރުން ކުއްލި ފިޔަވަޅުތަކެއް އަޅަން މަޖުބޫރުވެފައިވާ ކަމަށެވެ.

"[ސަމިޓްގެ] އެންމެ މުހިންމު އިސްކަންދޭ ކަންތައްތަކުގެ ތެރޭގައި ހަމަލާތައް ހުއްޓުވުމާއި، އާންމުން ރައްކާތެރިކުރުމާއި، ފަލަސްތީނާއި ލުބުނާނުގެ ރައްޔިތުންނަށް އެހީތެރިކަން ފޯރުކޮށްދިނުމާއި، މިމައްސަލަތަކާމެދު އެކި ގައުމުތަކުން ދެކޭގޮތް އެއްގޮތް ކުރުމާ އެއްބައިވަންތަކަން އިތުރުކުރުމާއި، ހިނގަމުންދާ ހަމަލާތައް ހުއްޓުވައި ސަރަހައްދުގައި ދެމެހެއްޓެނިވި ސުލްހަ ގާއިމްކުރުމަށް ހަރުދަނާ ފިޔަވަޅުތަކެއް އެޅުމަށް ބައިނަލްއަގްވާމީ މުޖުތަމައުގެ މައްޗަށް ބާރުއެޅުން ހިމެނޭ" ކަމަށް އޭޖެންސީން ބުނެފައިވެ އެވެ.

މި ސަމިޓްގައި ފަލަސްތީނުގެ ރައީސް މަހްމޫދު އައްބާސް، ތުރުކީގެ ރައީސް ރެޖަބް ތައްޔިބް އުރްދޫޣާން އަދި ޕާކިސްތާނުގެ ބޮޑުވަޒީރު ޝަހްބާޒް ޝަރީފްވެސް ބައިވެރިވެވަޑައިގެންނެވިއެވެ.

އީރާނުގެ ރައީސް މަސްއޫދު ޕެޒެޝްކިއަން ވަނީ "އެގްޒެކެޓިވް މައްސަލަތަކެއް" ހުރުމުގެ ސަބަބުން މި ބައްދަލުވުމުގައި ބައިވެރިނުވެވޭނެ ކަމަށް ވިދާޅުވެފަ އެވެ. ނަމަވެސް އެމްބީއެސްއާ ކުރެއްވި ފޯނު މަޝްވަރާއެއްގައި ޕެޒެޝްކިއަން ވިދާޅުވީ އީރާނުގެ ފުރަތަމަ ނައިބު ރައީސް މުހައްމަދު ރިޟާ އާރިފް މި ސަމިޓްގައި ބައިވެރިވެވަޑައިގަންނަވާނެ ކަމަށެވެ.

2023 ވަނަ އަހަރުގެ ނޮވެމްބަރުގައި ބޭއްވުނު ބައްދަލުވުމުގައި އީރާނުގެ އޭރުގެ ރައީސް އިބްރާހިމް ރައީސީ ބައިވެރިވެވަޑައިގެންނެވި އެވެ.

ފަންސާސް ހަތް މެންބަރުން ހިމެނޭ އޯއައިސީ އަދި 22 މެންބަރުން ހިމެނޭ އަރަބި ލީގްގައި އިޒްރޭލް ބަލައިގަންނަ ގައުމުތަކާއި، އިޒްރޭލް މި ސަރަހައްދުގައި އެއްވެސް ދައުރެއް އަދާކުރުމަށް ހަރުކަށި ގޮތެއްގައި ދެކޮޅުހަދާ ގައުމުތައް ހިމެނެއެވެ. މިދިޔަ އަހަރު ރިޔާޒުގައި ބޭއްވި ސަމިޓްގައި އިޒްރޭލާއެކު އޮންނަ އިގްތިސާދީ އަދި ޑިޕްލޮމެޓިކް ގުޅުންތައް ކަނޑާލުމާއި، އިޒްރޭލަށް ތެޔޮ ސަޕްލައިކުރުން ހުއްޓާލުން ފަދަ ފިޔަވަޅުތަކާ މެދު ދެބަސްވުންތައް އުފެދުނެވެ.