ސައުދީ އަރަބިއާގެ ފޮރިން މިނިސްޓަރ ފައިސަލް ބިން ފަރްހާން އާދީއްތަ ދުވަހު އިސްލާމީ-އަރަބި ސަމިޓުގެ އެޖެންޑާ މަޝްވަރާކުރުމަށް ބޭއްވުނު ތައްޔާރީ މިނިސްޓީރިއަލް ބައްދަލުވުމުގެ ރިޔާސަތު ބަލަހައްޓަވަނީ.
އިޒްރޭލުގެ އަނިޔާވެރި އުދުވާނާ ގުޅިގެން މުސްލިމް އަދި އަރަބި ލީޑަރުން ސައުދީ އަރަބިއާގައި މިއަދު ބައްދަލުކުރައްވަނީ
އިޒްރޭލުން ގާޒާ އަދި ލުބުނާނަށް ދެމުންދާ ހަމަލާތަކާ ގުޅޭގޮތުން މަޝްވަރާކުރުމަށް އަރަބި އަދި އިސްލާމީ ގައުމުތަކުގެ އިސްވެރިން ހޯމަދުވަހު ސަައޫދީ އަރަބިއާގެ ރިޔާޒުގައި ބައްދަލުކުރުއްވާނެ އެވެ.
ސައުދީ ޕްރެސް އެޖެންސީ (އެސްޕީއޭ) އިން ބުނާ ގޮތުގައި، އާދީއްތަ ދުވަހު ބޭއްވި ތައްޔާރުވުމުގެ ބައްދަލުވުމުގެ ރިޔާސަތު ބެލެހެއްޓެވީ ސައުދީ ފޮރިން މިނިސްޓަރ ފައިސަލް ބިން ފަރްހާން އެވެ. މި ބައްދަލުވުމުގައި އެންމެ ފަހުގެ ކަންތައްތައް މުރާޖައާކޮށް، ސަމިޓުގެ އެޖެންޑާ އެކުލަވާލެވުނެވެ.
-
"ފަލަސްތީނާއި ލުބުނާނުގެ ސަރަހައްދުތަކުގައި އިތުރުވަމުންދާ އަނިޔާވެރިކަމާއި، އިޒްރޭލުގެ އަނިޔާވެރި އުދުވާނުގެ ސަބަބުން އަރަބި އަދި އިސްލާމީ ލީޑަރުން އަވަސް ފިޔަވަޅުތަކެއް އަޅަން މަޖުބޫރުވެފައިވޭ،" އެސްޕީއޭގެ ބަޔާނުގައި ބުނެފައިވެއެވެ.
މި ސަމިޓު ބިނާވެފައިވަނީ، ކުރިން 2023 ވަނަ އަހަރުގެ ނޮވެމްބަރ 11 ގައި ރިޔާޒުގައި ބޭއްވި އަރަބި-އިސްލާމީ ސަމިޓުގެ މައްޗަށެވެ. މިއީ ގާޒާ އަދި ފަލަސްތީނުގެ އެހެނިހެން ސަރަހައްދުތަކުގައި ކުރިމަތިވެފައިވާ ނުރައްކާތެރި އަދި މިހާތަނަށް ދުވަހަކުވެސް ނުދެކޭފަދަ ހާދިސާތަކާ ގުޅިގެން، ސައުދީ ރަސްގެފާނު ސަލްމާންގެ އިރުޝާދުގެ ދަށުން ބޭއްވޭ ބައްދަލުވުމެކެވެ.
-
"މި ގޮންޖެހުންތަކާ ކުރިމަތިލުމަށާއި އޭގެ ނޭދެވޭ އަސަރުތައް ކުޑަކުރުމަށް އަރަބި އަދި އިސްލާމީ ގައުމުތަކުގެ އެއްބައިވަންތަކަން މުހިންމު،" އެސްޕީއޭ އިން އިތުރަށް ބުނެފައިވެ އެވެ.
ސައުދީ އަރަބިއްޔާ، ޖޯޑަން، މިޞްރު، ގަޠަރު، ތުރުކީ، އިންޑޮނޭޝިއާ، ނައިޖީރިއާ، އަދި ފަލަސްތީނުގެ ފޮރިން މިނިސްޓަރުންނާއި، އަރަބި ލީގު އަދި އިސްލާމިކް ކޯޕަރޭޝަންގެ ސެކްރެޓަރީ ޖެނެރަލް މަސައްކަތް ކުރައްވަނީ ގާޒާ ދެމުންދާ ހަމަލާތައް ވަގުތުން ހުއްޓުވައި، ދެމެހެއްޓެނިވި އަދި ފުރިހަމަ ސުލްހައެއް ގާއިމްކުރުމަށެވެ.
ތައްޔާރީ ބައްދަލުވުމުގެ އަރިމަތީގައި، ޕްރިންސް ފައިސަލް ވަނީ ފަލަސްތީނުގެ ބޮޑުވަޒީރު މުހައްމަދު މުސްތަފާއާ ބައްދަލުކުރައްވައި، ގާޒާގެ އެންމެ ފަހުގެ ހާލަތާއި އެކަމަށް އެޅިދާނެ ފިޔަވަޅުތަކާ ބެހޭގޮތުން މަޝްވަރާކުރައްވާފަ އެވެ.
-
ކުރީގެ އަރަބި-އިސްލާމީ ސަމިޓުގައި އެކުލަވާލެވުނު މިނިސްޓީރިއަލް ކޮމިޓީން ވަނީ ގާޒާގައި ވަގުތުން ހަނގުރާމަ ހުއްޓުވުމަށާއި، އާންމު ރައްޔިތުން ރައްކާތެރިކުރުމަށާއި، އަސާސީ ޚިދުމަތްތައް އަލުން ފޯރުކޮށްދިނުމަށް ދުނިޔޭގެ ލީޑަރުންނާއެކު ޑިޕްލޮމެޓިކް މަސައްކަތްތަކެއް ފަށާފަ އެވެ.
މި އަހަރު ތެރޭގައި ބޭއްވުނު ބައްދަލުވުންތަކުގައި، ކޮމިޓީގެ މެންބަރުން ވަނީ ފަލަސްތީނުގެ ރައްޔިތުން ގާޒާއިން ނުކުމެދިއުމަށް މަޖުބޫރުކުރުވައި، އިންފްރާސްޓްރަކްޗާ ހަލާކުކުރަމުންދާ އިޒްރޭލުގެ އަސްކަރީ އަމަލުތައް ހުއްޓުވުމަށާއި، އިންސާނީ އެހީ ފޯރުކޮށްދިނުމަށް ރައްކާތެރި މަގުތަކެއް ހޯދުމަށް ގޮވާލާފަ އެވެ.
ކޮމިޓީގެ މެންބަރުން ވަނީ ފެނާއި، ކަރަންޓާއި، އަދި ދަތުރުފަތުރުގެ ޚިދުމަތްތަކަށް އިޒްރޭލުން ހުރަސްއަޅަމުންދާ ގޮތް ކުށްވެރިކޮށް، މިއީ ބައިނަލްއަގްވާމީ ގާނޫނާ ޚިލާފު ކަންކަން ކަމުގައި ބުނެފަ އެވެ.
-
އެމީހުން އިތުރަށް ވަނީ ފަލަސްޠީނުގެ މިނިވަންކަމާއި، 1967 ވަނަ އަހަރުގެ ބޯޑަރުތަކުގެ މައްޗަށް ބިނާކޮށް އިރުމަތީ ޖެރޫސަލަމް ވެރިކަން ކުރާ ރަށްކަމުގައި ހަމަޖެހިފައިވާ މިނިވަން ދައުލުތެއް ގާއިމްކުރުމުގެ ހައްގަށް ތާއީދުކޮށްފައެވެ.
އިޒްރޭލުގެ އުދުވާން ހުއްޓުވުމަށް އޯއައިސީ-އަރަބި ލީގު ސަމިޓުން ނަތީޖާތަކެއް ނުކުންނާނެކަމަށް އީރާނުގެ ރައީސް ވިދާޅުވޭ
އީރާނުގެ ރައީސް މަސްއޫދު ޕެޒެޝްކިއަން އޯއައިސީ އަދި އަރަބި ލީގުގެ ކުއްލި ބައްދަލުވުމުން ގާޒާ އާއި ލުބުނާނުގައި އިޒްރޭލުން ހިންގަމުންދާ އުދުވާން ހުއްޓުވުމަށް "ފެންނަ އަދި އަމަލީ" ނަތީޖާތަކެއް ނުކުންނާނެކަމުގެ ޔަގީންކަން ފާޅުކުރައްވައިފިއެވެ.
ޕެޒެޝްކިއަން މިހެން ވިދާޅުވެފައިވަނީ އާދީއްތަ ދުވަހު ސައުދީގެ ވަލީ އަހުދު މުހައްމަދު ބިން ސަލްމާންއާއެކު ކުރެއްވި ފޯނު މަޝްވަރާއެއްގަ އެވެ. މި މަޝްވަރާ ކުރެއްވީ ގާޒާއާއި ލުބުނާނުގައި އިޒްރޭލުން ހިންގަމުންދާ ހަނގުރާމަތަކާ ގުޅޭގޮތުން މަޝްވަރާކުރުމަށް ހޯމަދުވަހު ރިޔާޒުގައި ބާއްވާ އަރަބި އަދި މުސްލިމު ގައުމުތަކުގެ ލީޑަރުންގެ ސަމިޓާ ދިމާކޮށެވެ.
-
"މި ސަމިޓުން ޒައޮނިސްޓު ވެރިކަމުގެ ޖަރީމާތަކާއި ގާޒާއާއި ލުބުނާނުގައި ހިނގަމުންދާ ހަނގުރާމައާއި ލޭއޮހޮރުވުން ހުއްޓުވުމަށް ނަތީޖާތަކެއް ނުކުންނާނެކަމާމެދު އަޅުގަނޑަށް ޝައްކެއްނެތް،" ޕެޒެޝްކިއަން ވިދާޅުވިއެވެ.
އިތުރަށް އޭނާ ވިދާޅުވީ، އިދާރީ މަސައްކަތްތަކުގެ ބުރަކަމާ ހެދި ސައުދީ ރަސްގެފާނުގެ ދައުވަތު ގަބޫލުކުރައްވައި ސަމިޓުގައި ބައިވެރިވެވަޑައިނުގަނެވުނު ނަމަވެސް، އީރާނުގެ ފުރަތަމަ ނައިބު ރައީސް މުހައްމަދު ރިޒާ އާރިފް ސަމިޓުގައި ބައިވެރިވެވަޑައިގަންނަވާނެ ކަމަށެވެ.
އީރާނުގެ ރައީސް އުއްމީދު ފާޅުކުރެއްވީ ދެ ގައުމުން ދެއްކެވި އަޒުމުގެ ސަބަބުން ތެހެރާނާއި ރިޔާޒުގެ ދެމެދުގައިވާ ގުޅުންތައް ހުރިހާ ދާއިރާއަކުން އިތުރަށް ރަނގަޅުވެގެންދާނެ ކަމަށެވެ.
ސައުދީ ވަލީއަހުދު ތެހެރާނާއި ރިޔާޒުގެ ގުޅުންތަކުގައި އައި ތާރީޚީ ބަދަލު ފާހަގަކުރައްވައި، އެކިއެކި ދާއިރާތަކުން ދެ ގއއުމުގެ ގުޅުންތައް އެންމެ މަތީ ފެންވަރަކަށް ދާނެކަމުގެ އުއްމީދު ފާޅުކުރެއްވި އެވެ.
ސަލްމާން އިތުރަށް ވިދާޅުވީ، އީރާނުގެ ނައިބު ރައީސް ރިޔާޒުގައި ހުންނަވާއިރު ދެ ގައުމުގެ ގުޅުންތައް ފުޅާކުރުމުގެ ގޮތްތަކާމެދު މަޝްވަރާކުރައްވާނެ ކަމަށެވެ. އަދި އޭނާ އަލުން އީރާނުގެ ރައީސް ސައުދީއަށް ވަޑައިގަތުމަށް ދައުވަތު ދެއްވައި، ވީ އެންމެ އަވަހަކަށް މިކަމަށް މަގު ތަނަވަސްވާނެކަމުގެ އުއްމީދު ފާޅުކުރެއްވި އެވެ.
ކޮމެންޓް