ހުޅިމެންދޫ: ޕިކްނިކް އައިލެންޑަކުން 5 ތަރީގެ ޓްރޭނިން ރިސޯޓަކަށް

ލ. ހުޅިމެންދޫގައި ފަސްތަރީގެ ރިސޯޓަކާއެކު އެތަނުގައި ހޮޓެލް ސްކޫލެއް ގާއިމު ކުރުމަށް، ގައުމީ ޔުނިވަސިޓީއާ އެކު ޓޫރިޒަމް މިނިސްޓްރީން މިއަދު ސޮއިކޮށްފި އެވެ.

ވީ ކިހިނެއް؟ - ލ. މާމެންދޫ ކައިރީގައި އޮންނަ ހުޅިމެންދޫއަކީ މިހާތަނަށް، މީހުން ދަތުރުގޮސް އުޅޭ ޕިކްނިކް އައިލެންޑެކެވެ. އެކަމަކު ރައީސް މުހައްމަދު މުއިއްޒުގެ ރިޔާސީ ވައުދާ އެއްގޮތަށް، ދެން އެ ރަށް ތަރައްގީ ކުރާނީ ތަމްރީނާ އެކު ކުރިއަށް ގެންދާ، ރާއްޖޭގެ ފުރަތަމަ ފަސްތަރީގެ ރިސޯޓުގެ ގޮތަށެވެ.

ޔުނިވަސިޓީގައި ބޭއްވި ރަސްމިއްޔާތެއްގައި މި ބޮޑު ޕްރޮޖެކްޓުގެ އެއްބަސްވުމުގައި ސޮއިކުރެއްވީ، ޓޫރިޒަމް މިނިސްޓަރު އިބްރާހިމް ފައިސަލް އާއި އެމްއެންޔޫގެ ވައިސް ޗާންސެލަރު ޑރ. އައިޝަތު ޝެހެނާޒް އާދަމް އެވެ.

ތަފްސީލް - އެ ރަސްމިއްޔާތުގައި ވާހަކަ ދައްކަވަމުން މިނިސްޓަރު ވަނީ، ރަށް ތަރައްގީ ކުރުމަށް ހަމަޖެހިފައިވާ ގޮތުގެ ކުރު ހުލާސާއެއް ދެއްވާފަ އެވެ. އޭނާ ވިދާޅުވި ގޮތުގައި:

"ރާއްޖޭގެ ފަތުރުވެރިކަމުގެ ސިނާއަތަށް އެތަކެއް އަހަރުތަކެއް ވެއްޖެ. އެކަމަކު އެ ސިނާއަތުގައި މަސައްކަތް ކުރާ މުވައްޒަފުންނަށް ތަމްރީނު ވުމުގެ ފުރުސަތުތަކެއް، މިހާތަނަށް ސަރުކާރަކުން ފަހިކޮށްދީފައެއް ނުވޭ. އެކަމަކު މިއަދުގެ ސަރުކާރުން އެކަން ފަހިކޮށްދޭނެ،" އޭނާ ވިދާޅުވި އެވެ.

އެ ރަސްމިއްޔާތުގައި ވާހަކަ ދައްކަވަމުން ޝެހެނާޒް ވިދާޅުވީ ހުޅިމެންދޫގައި ތަރައްގީ ކުރާ މި ރިސޯޓާއި ޓްރެއިނިން ސްކޫލާ އެކު، ރާއްޖޭގެ ޓޫރިޒަމް ދާއިރާއަށް ބޭނުންވާ ފަންނީ މީހުން އުފެއްދުމަށް ކުރާ މަސައްކަތަށް ބޮޑު ކުރިއެރުމެއް ލިބޭނެ ކަމަށެވެ.

އޭނާ ވިދާޅުވި ގޮތުގައި، މި މަޝްރޫއު ކުރިއަށް ގެންދާނީ، ތިމާވެއްޓަށް ކުރާ ނޭދެވޭ އަސަރު ކުޑަކޮށް، ރަށުގެ ގުދުރަތީ މާހައުލުގެ ރައްކާތެރިކަމަށް އިސްކަން ދީގެން ކަމަށެވެ. އަދި މި މަޝްރޫއުގެ ސަބަބުން ވަޒީފާތައް އުފެދި، ދާއިރާގެ އަމަލީ ތަޖުރިބާ އާއި ޒަމާނީ ހުނަރު ތަރައްގީވެގެންދާނެ ކަމަށް އޭނާ ވިދާޅުވި އެވެ.

"އަމާޒަކީ ބައިނަލްއަގްވާމީ ފެންވަރުގެ ތައުލީމީ މަރުކަޒަކަށް މިތަން ހެދުން. ފަތުރުވެރިކަމުގެ ދާއިރާގެ ހާއްސަ ދިރާސާތައް ވެސް މަރުކަޒުގައި ކުރިއަށް ގެންދާނެ،" ޝެހެނާޒް ވިދާޅުވި އެވެ.