ދުންފަތް އެކުލެވޭ ތަކެތިން ޑިއުޓީ އިނާޔަތް ދިނުން ހުއްޓާލައިފި

ދުންފަތް ނުވަތަ ނިކޮޓިން އެކުލެވޭ ބާވަތްތަކާއި އެފަދަ ތަކެތި ބުއިމަށް ބޭނުންކުރާ އާލާތްތަކުން ޑިއުޓީ އިނާޔަތް ދިނުން ހުއްޓާލައިފި އެވެ.

ވީ ކިހިނެއް؟ - ކޮމިޝަނާ ޖެނެރަލް އޮފް ކަސްޓަމްސް ފާތިމަތު ދިޔާނާ ކަސްޓަމްސްގެ މުވައްޒަފުންނަށް ފޮނުއްވި އުސޫލެއްގައި ބުނެފައިވަނީ ޑިއުޓީ އިނާޔަތް ދިނުން އިސްތިސްނާވާ ތަކެތީގެ ތެރޭގައި ދުންފަތް ނުވަތަ ނިކޮޓިން އެކުލެވޭ ބާވަތްތަކާއި އެތަކެތި ބުއިމަށް ބޭނުންކުރާ އާލާތްތައް ހިމެނޭނެ ކަމަށެވެ.

ފާހަގަ ކުރެވޭ - ދުންފަތާއި ނިކޮޓިން އެކުލެވޭ ބާވަތްތަކާއި ޝީޝާ އަދި އީ-ސިނގިރޭޓުން ޑިއުޓީ އިނާޔަތް ދިނުން ހުއްޓާލަން މީގެ ކުރިން ދެ ފަހަރަކު ތާރީހު ކަނޑައެޅި ނަމަވެސް އެ ސުންގަޑި ފަސްކުރި އެވެ.

ތަފްސީލް - 'ދަތުރުވެރިން ގެންނަ ތަކެއްޗާއި އަމިއްލަ ފަރާތްތަކުން ކުދިކުދި ބޭނުންތަކަށް ގެންނަ ތަކެއްޗާއި ވިޔަފާރި ސާމްޕަލްގެ ގޮތުގައި ގެންނަ ތަކެތިން ޑިއުޓީ މައާފު ކުރުމުގެ އުސޫލު'ގެ ދަށުން ދަތުރުވެރިން ރާއްޖެ އަަންނައިރު ގެންނަ ތަކެއްޗާއި އަމިއްލަ ފަރާތްތަކުގެ ކުދިކުދި ބޭނުންތަކަށް ގެންނަ ތަކެތިން ޑިއުޓީ މައާފްވާ މިންވަރު 10،000 ރުފިޔާއަށް ވަނީ މިހާރު ބޮޑުކޮށްފަ އެވެ.

އެނގުން މުހިއްމު - އިނާޔަތް ދިނުން ހުއްޓާލުމާ އެކު ރާއްޖޭން ބޭރުން އަންނަ ދަތުރުވެރިން ގެންނަ ނިކޮޓިން އެކުލެވޭ ބާވަތްތަައް ކަސްޓަމްސްއަށް ޑިކްލެއާ ކުރަން ޖެހޭނެ އެވެ. އަދި މި ބަދަލާ އެކު ރާއްޖެ އަންނަ ފަތުރުވެރިންނަށް ސިނގިރޭޓު ކާޓޫނު އެތެރެއެއް ނުކުރެވޭނެ އެވެ.

ސިނގިރޭޓު ކާޓޫނާ އެކު ރާއްޖެ އަންނަ ފަތުރުވެރިން އެ ތަކެތި ކަސްޓަމްސްއާ ހަވާލު ކުރަންޖެހޭނެ އެވެ. އެ މީހުން ރާއްޖެއިން ފުރާއިރު ކަސްޓަމްސްއިން އަނބުރާ އެ ތަކެތި ހަވާލު ކުރާނެ އެވެ.

ގުޅުންހުރި - މި މަހުގެ 1 އިން ފެށިގެން ސިނގިރޭޓާއި ބިޑިން ނަގާ ޓެކްސް ބޮޑުކޮށް، އެ ތަކެތިން ނަގާ އިމްޕޯޓު ޑިއުޓީ ވެސް ބޮޑު ކުރުމަށް އިމްޕޯޓު އެކްސްޕޯޓުގެ ގާނޫނަށް ވަނީ އިސްލާހު ގެނެސްފަ އެވެ. މީގެ އިތުރުން، ވޭޕްކުރުމަށް ބޭނުންކުރާ ތަކެއްޗާއި އެ ތަކެތީގެ ވަކިވަކި ބައިތައް ރާއްޖެއަށް އެތެރުކުރުން މި މަހުގެ 15 އިން ފެށިގެން މަނާކުރަން ނިންމައި ދުންފަތް ކޮންޓްރޯލް ކުރުމާ ބެހޭ ގާނޫނަށް އިސްލާހު ގެނައުމުގެ މަސައްކަތް ދަނީ ކުރަމުންނެވެ.