ވޭޕް އާއި ދުންފަތުގެ ޑިޔުޓީ އިނާޔަތް ކަނޑާލުން ފަސްކުރީ ޑިކްލަރޭޝަން ފަސޭހަކުރަން: ކަސްޓަމްސް

ދުންފަތް ނުވަތަ ނިކޮޓިން އެކުލެވޭ ބާވަތްތަކާއި އެތަކެތި ބުއިމަށް ބޭނުންކުރާ އާލާތްތަކުން ޑިއުޓީ އިނާޔަތް ދިނުން ހުއްޓާލާ ސުންގަޑި ފަސްކުރީ އިންތިޒާމުތައް ފުރިހަމަކޮށް ގަވައިދަށް ބައެއް ބަދަލު ގެންނަން ކަމަށް ކަސްޓަމްސް އިން މިއަދު ބުނެފި އެވެ.

ވީ ކިހިނެއް؟ - ކަސްޓަމްސް އިން މީގެ ކުރިން އޮތީ، ދުންފަތް އެކުލެވޭ ބާވަތްތަކާއި ނިކޮޓިން އެކުލެވޭ ތަކެތި ބުއިމަށް ބޭނުންކުރާ ޑިވައިސްތަކުން ޑިއުޓީ އިނާޔަތް ދިނުން މިއަދުން ފެށިގެން ހުއްޓާލާނެކަން އިއުލާންކޮށްފަ އެވެ.

ތަފްސީލް - ނަމަވެސް މިހާރު ކަސްޓަމްސް އިން ނިންމާފައިވަނީ އަންނަ 1 ނޮވެމްބަރުން ފެށިގެން އެ ބަދަލު ގެނައުމަށެވެ.

ކަސްޓަމްސްގެ ޑެޕިއުޓީ ޗީފް ސުޕްރިންޓެންޑެންޓް އަހުމަދު ނިޔާޒް މިއަދު 'ދައުރު' އަށް ވިދާޅުވީ ރާއްޖޭން ބޭރުން އަންނަ ދަތުރުވެރިން ގެންނަ ނިކޮޓިން އެކުލެވޭ ބާވަތްތަކުން ޑިއުޓީ ނަގާއިރު ކަސްޓަމްސްގައި އެ ތަކެތި ޑިކްލެއާ ކުރަން ޖެހޭނެ ކަމަށާއި މަސައްކަތް ކުރަނީ ފަސޭހައިން އެ ތަކެތި ޑިކްލެއާ ކުރެވޭނެ އިންތިޒާމު ހަމަޖެއްސުމަށް ކަމަށެވެ.

"ދެވަނަ ފަހަރަށް އަޅުގަނޑުމެން މި ތާރީހު ފަސްކުރީ. އެއީ ޑިކްލެއާ ކުރުމުގެ އިންތިޒާމުތައް ފުރިހަމަ ކުރަން،" ނިޔާޒު ވިދާޅުވި އެވެ.

އޭނާ އިތުރަށް ވިދާޅުވީ ރާއްޖެއަށް އެތެރެކޮށް ވިއްކާ ދުންފަތުގެ ބާވަތްތަކުގައި ލޭބަލް ޖެހުމުގެ ގަވައިދަށް ވެސް ބަދަލު ގެންނަން ޖެހޭ ކަމަށާއި އާ އުސޫލަށް އަމަލު ކުރުން ފަސްކުރި އަނެއް ސަބަބަކީ ގަވައިދު އިސްލާހު ކުރުން ކަމަށެވެ.

'ދަތުރުވެރިން ގެންނަ ތަކެއްޗާއި އަމިއްލަ ފަރާތްތަކުން ކުދިކުދި ބޭނުންތަކަށް ގެންނަ ތަކެއްޗާއި ވިޔަފާރި ސާމްޕަލްގެ ގޮތުގައި ގެންނަ ތަކެތިން ޑިއުޓީ މައާފު ކުރުމުގެ އުސޫލު' އަށް ގެނައި ބަދަލުގެ ދަށުން، ބައެއް ބާވަތްތަކުން ޑިއުޓީ އިނާޔަތް ދިނުން ދަންމާލި އިރު އޭގެ ތެރޭ ހިމެނެނީ:

އެ އުސޫލުގެ ދަށުން ގެނައި އެހެން ބަދަލުތަކަށް މިހާރު ވަނީ އަމަލު ކުރަން ފަށައިފަ އެވެ. އެގޮތުން، ދަތުރުވެރިން ރާއްޖެ އަަންނައިރު ގެންނަ ތަކެއްޗާއި އަމިއްލަ ފަރާތްތަކުގެ ކުދިކުދި ބޭނުންތަކަށް ގެންނަ ތަކެތިން ޑިއުޓީ މައާފްވާ މިންވަރު 10،000 ރުފިޔާއަށް ވަނީ ބޮޑުކޮށްފަ އެވެ.