އެމްއެމްސީ އިން ބޭއްވި 11 ވަނަ ނޫސްވެރިންގެ އިނާމު ހަފްލާގައި ފަނޑިޔާރުންގެ ފަރާތުން މުހައްމަދު ސަލީމް ވާހަކަދައްކަވަނީ. (ދައުރު ފޮޓޯ/ އަބްދުﷲ އަނޫފް ޖުނައިދު)
އެވޯޑުގެ ފަނޑިޔާރުން ނެރުނު ބަޔާން މީޑިއާ ކައުންސިލުން ކުށްވެރިކޮށްފި
މިދިޔަ ހަފްތާގައި ބޭއްވި މޯލްޑިވްސް މީޑިއާ ކައުންސިލް (އެމްއެމްސީ)ގެ 11 ވަނަ ނޫސްވެރިކަމުގެ އެވޯޑާ ގުޅޭ ގޮތުން އެ އެވޯޑަށް ހުށަހަޅާފައިވާ ހުށަހެޅުންތަކަށް އިންސާފުކުރި ފަނޑިޔާރުންގެ ޓީމުން ނެރުނު ނޫސްބަޔާން މީޑިއާ ކައުންސިލުން ރޭ ކުށްވެރިކޮށްފި އެވެ.
ވީ ކިހިނެއް؟ - ތަހުގީގީ ވީޑިއޯ ކެޓަގަރީން އެވޯޑު ދީފައިވަނީ އުސޫލުތަކާ ހިލާފަށް ކަމަށް ބުނެ ފަނޑިޔާރުން މިދިޔަ ހަފްތާގައި ވަނީ ބަޔާނެއް ނެރެފަ އެވެ. އެ ބަޔާނުގައި ބުނެފައިވަނީ:
-
އެ އުފެއްދުން ބަަލައިގަނެ އެވޯޑަށް ނޮމިނޭޓްކޮށް ފަނޑިޔާރުންގެ ބެންޗަށް ހުށަހަޅާފައިވަނީ އެމްއެމްސީން ބަލަންވާ ވަރަށް ނުބަލާ؛ އެހެންވެ އެ އުފެއްދުން ކައުންސިލުން ބަލައިގަތް ނިޔަތާ މެދު ސުވާލު އުދެފޭ
-
އެކަމާ ގުޅިގެން ފަނޑިޔާރުން އެމްއެމްސީއާ ސުވާލުކޮށްފައިވާނެ؛ ނަމަވެސް ޒިންމާދާރުކަމާ އެކީ އެ ކަމަށް ޖަވާބުދާރީވެފައެއް ނުވޭ
-
އެ ކެޓަގަރީއަށް އިންސާފުކުރަން ފަނޑިޔާރުންނަށް ދީފައިވާ ރުބްރިކްގައި ތަހުގީގީ ނަޒަރަކުން އުފެއްދުމަށް އިންސާފުކުރެވޭނެ ގޮތް ވަރަށް ބޮޑަށް ހަނިކޮށްފައިވޭ
ބުނީ ކީކޭ؟ - ފަނޑިޔާރުންގެ ނޫސްބަޔާނުގައި ހަގީގަތް އޮޅޭ ގޮތަށް ވާހަކަތަކެއް ހިމަނާފައިވާ ކަމަށް ބުނެ އެކަން ސާފުކޮށްދިނުމަށް އެމްއެމްސީން ރޭ ނެރުނު ނޫސްބަޔާނުގައި ބުނީ އެއްވެސް ދާއިރާއަކުން އެވޯޑު ދިނުމުގައި އިނާމު ދިނުމުގެ އުސޫލާ ހިލާފަށް އެއްވެސް ކަމެއް އެ ކައުންސިލުން ކޮށްފައި ނުވާނެ ކަމަށެވެ.
އެ ބަޔާނުގައި ބުނީ:
-
އިނާމަށް ހުށަހެޅުންތައް ލިބުމުން އެޕްލިކޭޝަނާ އެކު ހުށަހަޅަން ޖެހޭ ތަކެތި ހަމަ ނަމަ، އެ ތަކެތި ފޮނުވަނީ އެ ދާއިރާއަކާ ގުޅޭ ފަނޑިޔާރުންގެ ޕެނަލަށް
-
އިނާމަށް ހުށަހަޅާފައިވާ އެެއްވެސް ލިޔެކިއުމެއް ކައުންސިލުގެ ރައީސް، އެސްޖީ އަދި މެމްބަރުންނަށް ހިއްސާއެއް ނުކުރާނެ
-
މިނިވަންކަމާ އެކު މަސައްކަތްކުރުމުގެ ޖާގަ ފަނޑިޔާރުންނަށް ދިނުމުގެ ގޮތުން ހުށަހެޅުންތަކަކީ ޝަރުތު ހަމަނުވާ ހުށަހެޅުމެއް ކަމަށް ކަނޑައެޅުމާއި ޑިސްކޮލިފައި ކުރުމުގެ ފުރިހަމަ ބާރު އިނާމު ދިނުމުގެ އުސޫލުގެ ދަށުން ދީފައިވަނީ ހަމައެކަނި ފަނޑިޔާރުންނަށް
-
އިޖްތިމާއީ ދާއިރާ އާއި ޝަރުއީ އަދި ގާނޫނީ ދާއިރާއަށް ހުށަހަޅާފައިވާ ބައެއް ހުށަހެޅުންތައް އެކަމާ ގުޅޭ ފަނޑިޔާރުންގެ ޕެނަލުން ވަނީ ޑިސްކޮލިފައި ކޮށްފައި
-
އެވޯޑުތައް ހަވާލުކުރުމާ ހަމައަށް ފަނޑިޔާރުންގެ ފަރާތުން އެެއްވެސް ކަންބޮޑުވުމެއް އަދި ޝަކުވާއެއް ހުށަހަޅާފައެއް ނުވޭ
-
'އަދަދު' ނޫހުން ހެދި ތަހުގީގީ ވީޑިއޯ ރިޕޯޓާ ގުޅޭ ގޮތުން ފަނޑިޔާރުން އުފެއްދި ސުވާލުތަކަށް ކައުންސިލުން ޒިންމާދާރުކަމާ އެކު ޖަވާބުދީފައި ނުވާ ކަމަށް ފަނޑިޔާރުންގެ ނޫސްބަޔާނުގައި ބުނެފައި ވިޔަސް އެފަދަ އެއްވެސް ސުވާލެއް އުފައްދައި ކައުންސިލަށް ހުށަހަޅާފައެއް ނުވޭ
-
އިނާމަށް ހުށަހެޅި ހުށަހެޅުންތަކާ މެދު އެއްވެސް ގޮތެއް ނިންމަން ކައުންސިލާ މަޝްވަރާ ކުރާކަށް ނުޖެހޭނެ؛ އެކަން ނިންމުމުގެ ބާރު އޮންނާނީ ހަމައެކަނި ފަނޑިޔާރުންނަށް
-
ތަހުގީގީ ދާއިރާގެ ވީޑިއޯ ކެޓަގަރީން ތަހުގީގީ ނަޒަރަކުން އިންސާފުކުރަން ހަނިކޮށްފައިވާ ކަމަށް ފަނޑިޔާރުން ބުންޏަސް އެފަދަ ކަންބޮޑުވުމެއް މީގެ ކުރިން ފަނޑިޔާރުންގެ ފަރާތުން ހުށަހަޅާފައެއް ނުވޭ
-
އެ ވީޑިއޯ ރިޕޯޓަށް އެވޯޑް ދީފައިވަނީ އެކަމާ ގުޅޭ ޕެނަލްގައި ހިމެނޭ ހުރިހާ ފަނޑިޔާރުން ސޮއިކޮށް ހުށަހެޅި މާކްސް ޝީޓުތަކުން އެވޯޑް ލިބޭ މިންވަރަށް މާކްސް ލިބިފައިވާތީ
އެ އެވޯޑް ދީފައިވާ އުފެއްދުމަކީ ދިވެހި މީޑިއާގެ އަހުލާގީ މިންގަނޑުގައި ބަޔާންކޮށްފައިވާ އުސޫލުތަކަށް ބެލުމެއް ނެތި ޝާއިއުކޮށްފައިވާ އުފެއްދުމެއްކަން ފާހަގަވެ، އެކަން އެގޮތަށް ނުކުރަން އެމްއެމްސީއިން ބަޔާނެއް ވެސް ނެރެފައިވާ އުފެއްދުމެއް ކަމަށް ފަނޑިޔާރުންގެ ނޫސްބަޔާނުގައި ބުނެފައިވާތީ ކައުންސިލުން ރޭ ނެރުނު ބަޔާނުގައި ވަނީ އެކަން ވެސް ދޮގުކޮށްފަ އެވެ.
ކައުންސިލުން ބުނީ އެ ބަޔާނަކީ ވަކި މީޑިއާކަށް ނިސްބަތްކޮށް ނެރެފައިވާ ނޫސްބަޔާނެއް ނޫން ކަމަށާއި އެއީ ރިޔާސީ އިންތިހާބާ ދިމާކޮށް އެ ދުވަސްވަރު ބައެއް މީޑިއާތަކުން ޝާއިއުކުރަމުންދިޔަ ލިޔުންތަކާ ގުޅިގެން ޖުމްލަކޮށް ނެރެފައިވާ ބަޔާނެއް ކަމަށެވެ.
އެނގުން މުހިންމު - ބުދަ ދުވަހު އޮތް އެވޯޑް ހަފްލާގައި އިނާމު ދިން ގޮތާ މެދު މައްސަލަ ޖެހިފައިވަނީ އޯޑިއޯ ވީޑިއޯ ކެޓަގަރީގެ ތަހުގީގީ ނޫސްވެރިކަމުގެ ދާއިރާއިން ދީފައިވާ އެވޯޑާ ގުޅިގެންނެވެ. މި އެވޯޑު ލިބިފައިވަނީ 'އަދަދު' ނޫހުން އުފައްދާފައިވާ 'ސްކީލާން' ޑޮކިއުމެންޓަރީއަށެވެ.
އެ ޑޮކިއުމެންޓްރީއަކީ ރައީސް މުހައްމަދު މުއިއްޒުގެ މައްޗަށް ކުރި ތުހުމަތުތަކެއްގެ މައްޗަށް، ރިޔާސީ އިންތިހާބުގެ ކެމްޕެއިން ތެރޭގައި ތައްޔާރުކުރި ޑޮކިއުމެންޓްރީއެކެވެ.
މި މައްސަލަ ބޮޑުވުމުން އެމްއެމްސީން މިހާރު ވަނީ ނޫސްވެރިކަމުގެ އެވޯޑާ ގުޅިގެން ކުރެވޭ ތުހުމަތުތައް ބަލައި ރިޕޯޓެއް އެކުލަވާލަން ވެސް ނިންމާފަ އެވެ.
ކޮމެންޓް