މައްސަލަ ބޮޑުވި ނޫސްވެރިކަމުގެ އެވޯޑާ ގުޅޭ މައްސަލަ ބަލައި ރިޕޯޓެއް އެކުލަވާލަނީ

މިދިޔަ ބުދަ ދުވަހުގެ ރޭ ބޭއްވި މޯލްޑިވްސް މީޑިއާ ކައުންސިލް (އެމްއެމްސީ)ގެ 11 ވަނަ ނޫސްވެރިކަމުގެ އެވޯޑާ ގުޅިގެން ކުރެވޭ ތުހުމަތުތައް ބަލައި ރިޕޯޓެއް އެކުލަވާލަން އެ ކައުންސިލުން މިއަދު ނިންމައިފި އެވެ.

ވީ ކިހިނެއް؟ - ބުދަ ދުވަހު އޮތް އެވޯޑް ހަފްލާގައި އިނާމް ދިން ގޮތާމެދު މައްސަލަ ޖެހިފައިވަނީ އޯޑިއޯ ވީޑިއޯ ކެޓަގަރީގެ ތަހުގީގީ ނޫސްވެރިކަމުގެ ދާއިރާއިން ދީފައިވާ އެވޯޑާ ގުޅިގެންނެވެ. މި އެވޯޑު ލިބިފައިވަނީ 'އަދަދު' ނޫހުން އުފައްދާފައިވާ 'ސްކީލާން' ޑޮކިއުމެންޓަރީއަށެވެ.

އެ ޑޮކިއުމެންޓްރީއަކީ ރައީސް މުހައްމަދު މުއިއްޒުގެ މައްޗަށް ކުރި ތުހުމަތުތަކެއްގެ މައްޗަށް، ރިޔާސީ އިންތިހާބުގެ ކެމްޕެއިން ތެރޭގައި ތައްޔާރުކުރި ޑޮކިއުމެންޓްރީއެކެވެ. 

ބުނީ ކީކޭ؟ - އެމްއެމްސީން މިއަދު ބުނިގޮތުގައި:

ގުޅުންހުރި ކަމެއް - ނޫސްވެރިކަމުގެ އެވޯޑު އެ ޑޮކިއުމަންޓްރީއަށް ދިނުމުގެ އިތުރުން، އެ ހަފްލާގައި އެ ޑޮކިއުމަންޓްރީގެ ވީޑިއޯގެ ތަންކޮޅެއް ދައްކާފައިވާތީ ވެސް މައްސަލަ ޖެހިފައި ވެއެވެ. އެކަމާ ގުޅިގެން އެމްއެމްސީގެ ރައީސް އަހުމަދު މުސްތަފާ ޕީއެސްއެމްގައި އަދާކުރައްވަމުން ގެންދެވި ވަޒީފާއިން ވެސް ވަކިކުރި އެވެ. ނަމަވެސް މިހާރު ވަނީ އެ ވަޒީފާ އަނބުރާ ދީފަ އެވެ.

އެ އެވޯޑިއޯއަކީ ޕީއެސްއެމްގެ އެޑިޓޯރިއަލް ކޮންޓެންޓާއި ނޫސްވެރިކަމުގެ މިންގަނޑުތަކާ ހިލާފު ވީޑިއޯއެއް ކަމަށް ބުނެ، އެ މައްސަލަ ބަލައިދިނުމަށް ވެސް ޕީއެސްއެމްއިން ވަނީ ރައްޔިތުންގެ މަޖިލީހަށް ހުށަހަޅައިފަ އެވެ. ޕީއެސްއެމްއިން ބުނާގޮތުގައި އެވޯޑު ހަފްލާ އިންތިޒާމު ކުރި ފަރާތުން އެ ވީޑިއޯ ދައްކާފައިވަނީ ޕީއެސްއެމްއަށް ކުރިން އެންގުމަކާ ނުލަ އެވެ.

އެންގުން މުހިންމު -  އެ އެވޯޑް ދީފައިވާ އުފެއްދުމަކީ ދިވެހި މީޑިއާގެ އަހުލާގީ މިންގަނޑުގައި ބަޔާންކޮށްފައިވާ އުސޫލުތަކަށް ބެލުމެއް ނެތި ޝާއިއުކޮށްފައިވާ ކޮންޓެންޓެއްކަމަށް ބުނެ މިދިޔަ އަހަރުގެ ސެޕްޓެމްބަރު މަސްތެރޭ އެމްއެމްސީން ބަޔާނެއް ވެސް ނެރެފައިވާ އުފެއްދުމެކެވެ.

އެ އުފެއްދުން ބަލައިގަނެ ފަނޑިޔާރުންގެ ބެންޗަށް އެމްއެމްސީން ހުށަހަޅާފައިވަނީ ގޯސްކޮށް ކަމަށް ބުނެ އެ އެވޯޑަށް މާކްސް ދިން ފަނޑިޔާރުންގެ ބެންޗުން ވެސް ރޭ ވަނީ ބަޔާނެއް ނެރެފަ އެވެ. އެ ބަޔާނުގައި ބުނީ އެއީ ބަލަންވާ ވަރަށް ނުބަލާ އެމްއެމްސީން ކޮށްފައިވާ ކަމެއް ކަމަށެވެ. އަދި، އެ އުފެއްދުން ކައުންސިލުން ބަލައިގަތް ނިޔަތާ މެދު ވެސް ސުވާލު އުފައްދާފައި ވެއެވެ.