އެންމެ އިންޖެކްޝަނަކަށް އާސަންދައަށް ބިލްކުރީ 14،000ރ. ގެ ފައިދާއެއް ލާފައި

ލޮލުގެ ފަރުވާއަށް ދޭ އިންޖެކްޝަނެއް 500 ޑޮލަރަށް (7،710 ރުފިޔާ)އަށް ބޭރުން ގަނެގެން، ލޮލުގެ ހިދުމަތް ދޭ ތަނަކުން 14،000ރ.ގެ ފައިދާއަކާއެކު 23،000ރ.އަށް އާސަންދައަށް ބިލު ކުރާ މައްސަލައެއް ފެންމަތިވެއްޖެ އެވެ.

ވީ ކިހިނެއް؟ - މިކަން ތިލަވީ، މިއަދު އެންސްޕާގެ ސިއީއޯ އަދި ރައީސް އޮފީހުގެ ތަރުޖަމާނު ހީނާ ވަލީދު މިއަދު ފޭސްބުކްގައި ކުރެއްވި ޕޯސްޓެއްގަ އެވެ.

ތަފްސީލު - ޝޯޝަލް މީޑިއާގައި ދައުރުވާ ސްކްރީން ޝޮޓަކާއެކު ހީނާ ކުރެއްވި ދިގު މެސެޖްގައި ވިދާޅުވި ގޮތުގައި މި މައްސަލައަކީ، "އާސަންދައިން ވިޔަފާރިކޮށް ނާޖާއިޒު ބޮޑެތި ފައިދާ ނަގައި އުސޫލުތަކުން ބޭރުން ކަންކުރުމުގެ ލާމަސީލު މިސާލެއް" ކަމަށެވެ.

އެ ސްކްރީން ޝޮޓްގައި އާންމުންގެ މިހަކު ލިޔެފައިވާ ގޮތުގައި 2011އިން ފެށިގެން އޭނާގެ މަންމަގެ ލޮލުގެ ފަރުވާއަކަށް ދެމުން އައި އިންޖެކްޝަނެއް މިހާރު އާސަންދައިން ކަވާ ނުކުރެ އެވެ. އަދި އެ އިންޖެކްޝަން ލިބެނީ، 24،000ރ.އަށް ކަމަށް ވެސް އެ ސްކްެރީން ޝޮޓްގައި ލިޔެފައިވެ އެވެ.

މިކަމުގައި ހަގީގަތް އޮޅުން ފިލުވައިދިނުމަށް ހީނާ ކުރެއްވި ޕޯސްޓެއްގައި ވިދާޅުވީ، 'ލޫސެންޓިސް' ނަމަކަށް ކިޔާ އެ އިންޖެކްޝަން ބޭރުން ލިބެނީ 500 ޑޮލަރަށެވެ. އެއީ، 15.42ގެ ރޭޓުން ބަލާނަމަ، 7،710ރ. އެވެ.

"އާސަންދައިގެ ބޭހުގެ އަގު ރިވައިޒްކުރުމުގެ ތެރެއިން، އެންމެ ޚަރަދު ބޮޑު އެއް ބޭސްކަމުގައިވާ “Lucentis Injection” ގެ އަގު ޗެކްކުރުމުގެ ގޮތުން ލޮލުގެ ފަރުވާގެ ޚިދުމަތް ދޭ މި ފަރާތުން ބޭސް ގަންނަ އަގު ހޯދުމަށް އެދުމުން، ފޮނުވި އިންވޮއިސްތަކުން، މި ބޭސް އެ ފަރާތަށް ގަންނަން ލިބޭ އަގަށްވުރެ ބޮޑުތަނުން ބޮޑުކޮށް އާސަންދައަށް ބިލްކޮށްފައިވާކަން ފާހަގަކުރެވުނު،" ހީނާ ވިދާޅުވި އެވެ.

"މިގޮތުން  500 ޑޮލަރުގެ މި ބޭސް ގެނެސް 23،000ރ. އަށް އާސަންދަ އަށް ބިލްކޮށްފައިވޭ. މިއީ 18ރ. ރޭޓުން ޑޮލަރު ބެލިކަމުގައިވިޔަސް، އެންމެ އިންޖިކްޝަނަކުން 14،000ރ. ފައިދާއެއް."

އެނގިފައިވާ ގޮތުގައި މި ބޭސް އެތެރެކުރަން ރަޖިސްޓްރީކޮށްފައިވަނީ ހަމައެކަނި އޭޑީކޭއިންނެވެ. 

ވަކި ކުންފުންޏެއްގެ ނަމެއް ނުގެނެސް ހީނާ ވިދާޅުވީ، އެ ކުންފުނިން އެއްވެސް ވަރަކަށް މި ބޭސް ރާއްޖެއަށް އެތެރެކޮށްފައި ނުވާ ކަމަށެވެ.

"ލޮލުގެ ފަރުވާގެ ހިދުމަތްދޭ މި ފަރާތުން ބޭސް ވިއްކާފައިވަނީ ބޭސް އެތެރެކުރުމަށް ރަޖިސްޓަރީނުކޮށް ޕްރިސްކްރިޕްޝަންއަށް. އެކަމަކު ސްކީމްގެ ތެރެއިން މިއިންޖެކްޝަނަށް އެންމެ ގިނައިން ބިލްކޮށްފައިވަނީ މި ފަރާތުން،" އެއީ ކޮން ބައެއްކަން ހާމަ ނުކޮށް، ހީނާ އިތުރަށް ވިދާޅުވި އެވެ.

ހީނާ އިތުރަށް ވިދާޅުވީ:

"އެކި އަމިއްލަ ފަރާތްތަކުން ވިޔަފާރީގެ ފައިދާގެ ބޭނުމަށް އާސަންދަ ބޭނުންކުރުމުގެ ނަތީޖާއެއްގެ ގޮތުން، ރައްޔިތުންނަށް ބޮޑެތި ގެއްލުން ލިބޭކަމީ ހަގީގަތެއް. މިހެން ދިމާވަނީ ޒަމާނުއްސުރެ މިނިޒާމްގެ ތެރޭގައި ހުރި މިފަދަ އެތައް މައްސަލައަކަށް އެޓެންޑް ނުކުރެވި، އެއް ނިޒާމް އަނެއް ނިޒާމާ ވާހަކަ ނުދެކެވި ބޮއްސުންލާން ދޫކޮށްލެވިފައި އޮތުމުގެ ސަބަބުން،" ހީނާ ވިދާޅުވި އެވެ.

"ރައީސްގެ ލަފާފުޅުގެ ދަށުން، ﷲ ގެ އިރާދަފުޅާއެކު އަޅުގަނޑުމެން އެކަން ބަދަލުކޮށް އިސްލާހު ކުރާނަން."

ފާހަގަކޮށްލެވޭ ކަމެއް - މިދިޔަ ސެޕްޓެމްބަރުގައި ރައީސް މުހައްމަދު މުއިއްޒު ވަނީ، ރާއްޖެއަށް އެތެރެ ކުރާ ބޭސް ވިއްކާ އަގުތައް ހުރީ %200އިން ފެށިގެން %2،000އަށް ބޮޑު ކަމަށް ފާހަގަކޮށް، އެކަން ހުއްޓުވަން ފިޔަވަޅުތައް އަޅަން ނިންމިކަން އިއުލާން ކުރައްވާފަ އެވެ.