ތާލިބާންގެ މަންދޫބާ ބައްދަލު ކުރެއްވި ދިވެހި ސަފީރު މަގާމުން ވަކިކުރަން ނިންމައިފި

ރާއްޖެއިން ޕާކިސްތާނަށް ކަނޑައަޅާފައި ހުންނަވާ ސަފީރު މުހައްމަދު ތޯހާ، އެ ގައުމުގައި ހުންނެވި އަފްގާނިސްތާނުގެ ތާލިބާނުންގެ މަންދޫބަކާ ބައްދަލުކުރި މައްސަލައިގައި އޭނާ ސަފީރު ކަމުން ވަކިކުރަން ފޮރިން މިނިސްޓްރީން ނިންމައިފި އެވެ.

ވީކިހިނެއް؟ - ޕާކިސްތާނުގައި ހުންނަވާ ތާލިބާނުންގެ މަންދޫބު ސަރުދާރު އަހުމަދު ޝަކީބާއި ސަފީރު ތޯހާ ޕާކިސްތާނުގައި ބައްދަލުކުރައްވާ ފޮޓޯތަކެއް އާންމުވެ އެކަމާ ގުޅިގެން އާންމުންގެ ކަންބޮޑުވުން ބޮޑުވި އެވެ. 

އެއާއެކު، ދިވެހި ސަރުކާރުން ތާލިބާނުން ބަލައިގަތީތޯ އާންމުން ސުވާލު އުފައްދަން ފެށި އެވެ.

އެކަމާ ގުޅިގެން ފޮރިން މިނިސްޓްރީން ވަނީ ތާލިބާނުންގެ މަންދޫބާ ރާއްޖޭގެ ސަފީރު ބައްދަލުކުރީ ދިވެހި ސަރުކާރުގެ ހުއްދަނެތި ކަމަށް ބުނެފަ އެވެ. އަދި ފިޔަވަޅު އަޅާނެ ކަމަށް ބުންޏެވެ.

ތަފްސީލު - އިތުބާރު ހުރި މަސްދަރަކުން 'ދައުރު'އަށް އެނގިފައިވާ ގޮތުގައި އެ މައްސަލައާ ގުޅިގެން ތޯހާ ސަފީރު ކަމުން ވަކިކުރަން ވަނީ ނިންމާފަ އެވެ. އަދި ތޯހާ އެނބުރި ގައުމަށް ވަޑައިގަތުމަށް ސަރުކާރުން އޭނާއަށް މިހާރު ވަނީ އަންގާފަ އެވެ.

މިހާތަނަށް ރަސްމީކޮށް އަދި އެޅި ފިޔަވަޅެއް އެ މިނިސްޓްރީން ހާމަކޮށްފައެއް ނުވެ އެވެ.

ގުޅުން ހުރި - ތޯހާ ޕާކިސްތާން ސަފީރަކަށް އައްޔަން ކުރުމުގެ ކުރިން މިދިޔަ މެއި މަހު އޭނާ ސައުދީ ސަފީރަކަށް ވެސް އައްޔަން ކުރި އެވެ. ނަމަވެސް ފަހުން، ޖޫން މަސް ތެރޭ އޭނާ ޕާކިސްތާން ސަފީރަކަށް އައްޔަންކުރީ އެވެ.