ޕާކިސްތާނު ސަފީރު ތާލިބާން މަންދޫބަކާ ބައްދަލުކުރީ ދިވެހި ސަރުކާރުގެ ހުއްދަ ނެތި: ފޮރިން މިނިސްޓްރީ

ރާއްޖެއިން ޕާކިސްތާނަށް ކަނޑައަޅާފައި ހުންނަވާ ސަފީރު މުހައްމަދު ތޯހާ، އެ ގައުމުގައި ހުރި އަފްގާނިސްތާނުގެ ތާލިބާނުންގެ މަންދޫބަކާ ބައްދަލުކުރީ ދިވެހި ސަރުކާރުގެ ހުއްދަ ނެތި ކަމަށް މިއަދު ފޮރިން މިނިސްޓްރީން ބުނެފި އެވެ.

ވީކިހިނެއް؟ - ޕާކިސްތާނުގައި ހުންނަ ތާލިބާނުންގެ މަންދޫބު ސަރުދާރު އަހުމަދު ޝަކީބާއި ސަފީރު ތޯހާއާ ޕާކިސްތާނުގައި ބައްދަލުކުރައްވާ މަންޒަރުގެ ފޮޓޯތަކެއް ބައިނަލްއަގުވާމީ މީޑިއާތަކުގައި މިދިޔަ ދެ ދުވަހު ރިޕޯޓުކޮށްފައިވެ އެވެ.

ދިވެހި ސަރުކާރުން ތާލިބާނުން ބަލައިގަތް ކަމާ މެދު ސުވާލު އުފައްދާފައިވެ އެވެ.

ތަފްސީލް - ފޮރިން މިނިސްޓްރީން އިނގިރޭސި ބަހުން ނެރުނު ބަޔާނުގައި ބުނެފައިވަނީ އެއީ ސަރުކާރުގެ ހުއްދައާ އެކު ކުރިއަށް ގެންގޮސްފައިވާ ބައްދަލުވުމެއް ނޫން ކަމަށެވެ. އަދި އެ ކަމާ ގުޅިގެން ދިވެހި ސަރުކާރުގެ ފަރާތުން އަޅަން ޖެހޭ ފިޔަވަޅު އަޅާފައިވާނެ ކަމަށް ބުންޏެވެ.

ނަމަވެސް އެޅި ފިޔަވަޅެއް ބަޔާނުގައި ބުނެފައެއް ނެތެވެ.

"ރާއްޖޭން ގައުމުތަކުގެ ސަރުކާރުތައް ބަލައިގަތުމުގައި ސުވާލެއް އުފެދޭ ހާލަތެއްގައި އަބަދުވެސް ބަލަނީ އދ. އިން ކަނޑައަޅާފައިވާ މިންގަޑުތަކާއި އުސޫލުތަކަށެވެ. މި އުސޫލުތަކާ އެއްގޮތްވާ ގޮތުގެ މަތީން، އދ.ގައި އަފްގާނިސްތާނު ތަމްސީލުކުރާ ފަރާތަކީ އަފްގާނިސްތާނުގެ ސަރުކާރުގެ ގޮތުގައި ދިވެހި ސަރުކާރުން ބަލައިގަންނަ ފަރާތް ކަމުގައި ދެންނެވީމެވެ."