ރާއްޖޭން ޑޮކްޓަރުކަން ކިޔެވި 21 ދަރިވަރުން ދަސްވެނި ވެއްޖެ

ރާއްޖޭގައި ޑޮކްޓަރުކަން ކިޔެވި ދަރިވަރުންގެ ފުރަތަމަ ބެޗު މިއަދު ގްރެޖުއޭޓް ވެއްޖެ އެވެ.

ވީ ކިހިނެއް؟ - ރާއްޖޭގައި މެޑިސިން ކިޔަވައިދޭން ފެށީ، 2018 ވަނަ އަހަރު ގައުމީ ޔުނިވަސިޓީ އިންނެވެ. އޭރު އެތަނުން ފުރުސަތު ހުޅުވާލީ 40 ދަރިވަރުންނަށް ނަމަވެސް، ޖާގަ ލިބުނީ 21 ދަރިވަރުންނަށެވެ. އެ ހުރިހާ އެންމެން ވެސް ފާސްވެ، މިއަދު ވަނީ ގްރެޖުއޭޓްވެފަ އެވެ.

މިހާރު ކުރިއަށް ދާ އެމްއެންޔޫގެ ގްރެޖުއޭޝަނުގައި، ޑޮކްޓަރުކަން ކިޔަވައިގެން ސެޓްފިކެޓް ލިބިފައިވަނީ ދެ ފިރިހެން ދަރިވަރުންނާއި 19 އަންހެން ދަރިވަރުންނަށެވެ.

ތަފްސީލު- އެމްއެންޔޫއިން ބުނިގޮތުގައި ޑޮކްޓަރުކަން ކިޔެވުމަށް އެތަނުން ފުރުސަތު ދިނީ ވަރަށް މަތީ ނަތީޖާ ހޯދި ދަރިވަރުންނަށެވެ. އެގޮތުން ކޯހަށް ނެގީ، އޭ ލެވެލް އިން ހުރިހާ މާއްދާއަކުން އޭ ފާސް ހޯދައި، އަދި އޭގެ ފަހުން ކުރި އިންޓަވިއުއިން އެންމެ މަތިން ނަތީޖާ ހޯދި ދަރިވަރުން ކަމަށް އެތަނުން ބުންޏެވެ.

އޭގެ އިތުރުން، އޭރު ދަރިވަރުން ކިޔެވުމަށް ވަސީލަތްތައް ލިބެން އޮތް މިންވަރަށް ވެސް، ދަރިވަރުން ހޮވުމުގައި ބަލާފައިވާ ކަމަށް އެތަނުން ބުންޏެވެ.

ގްރެޖުއޭޓްވި ހުރިހާ ދަރިވަރުން ވެސް މިއަދު ވަނީ ޑޮކްޓަރުކަމުގެ ހުވާކޮށްފަ އެވެ. އަދި އެ ދަރިވަރުން މިހާރު އަންނަނީ މާލެ އާއި ރަށްރަށުގެ ބައެއް ހޮސްޕިޓަލްތަކުގައި އިންޓާނުންގެ ގޮތުގައި މަސައްކަތްކުރަމުންނެވެ.

ދަރުމަވަންތަ ހޮސްޕިޓަލުގައި ކުރިއަށް ގެންދާ، އެމްއެންޔޫގެ މެޑިސިން ސްކޫލުގައި މިހާރު، ހަތް ބެޗެއްގައި 222 ދަރިވަރުން އަންނަނީ ޑޮކްޓަރުކަން ކިޔަވަމުންނެވެ.

މިއަދު ބޭއްވި ގްރެޖުއޭޝަނުގައި އެމްއެންޔޫގެ އެކި ކޯސްތަކުން 311 ދަރިވަރުން ގްރެޖުއޭޓްވި އެވެ. އޭގެ ތެރޭގައި ހިމެނެނީ ސިއްހީ ދާއިރާ އާއި ސައިންސާއި ޓެކްނޮލޮޖީގެ ކޯސްތަކުގެ އިތުރުން ޕޮލިޓިކަލް ސައިންސް ކިޔެވި ދަރިވަރުންނެވެ.