ކެޔޮދޫގެ ގެސްޓުހައުސްއެއް: ކުދި ގެސްޓުހައުސްތަކަށް އަންނަ ފަތުވެރިން އަތުން ނަގާ ގްރީން ޓެކްސް ބޮޑުނުކުރަން އިދިކޮޅުން ހުށަހެޅި ހުށަހެޅުން ފާހެއް ނުވި (ދައުރު ފޮޓޯ)
25 ކޮޓަރީގެ ކުދި ގެސްޓްހައުސްތަކުގެ ގްރީން ޓެކްސް ކުޑަ ކުރަން ފާހެއް ނުވި
އަންނަ އަހަރުން ފެށިގެން ގެސްޓުހައުސްތަކަށް އަންނަ ފަތުވެރިންގެ އަތުން ނަގާ ގްރީން ޓެކްސް ވެސް ބޮޑު ކުރަން ސަރުކާރުގެ ފަރާތުން ޓޫރިޒަމް ގާނޫނަށް އިސްލާހު ގެނައުމަށް ހުށަހެޅި ބިލުގައި 25 ކޮޓަރިއަށް ވުރެ ކުދި ގެސްޓުހައުސްތައް ނުހިމެނުމަށް އިދިކޮޅުން ހުށަހެޅި އިސްލާހު އެ ބިލު ދިރާސާ ކުރި މުޅި މަޖިލީހުގެ ބޭރުކޮށްލައިފި އެވެ.
ވީ ކިހިނެއް؟ - ޓޫރިޒަމް ގާނޫނު މިހާރު އޮންނަ ގޮތުން މީހުން ދިރިއުޅޭ ރަށްޓަކުގައި ހިންގާ 50 ކޮޓަރިއަށް ވުރެ ހޮޓާތަކާއި ގެސްޓްހައުސްތަކަށް އަންނަ ފަތުވެރިން އަތުން ނަގަނީ ދުވާލަކަށް 3 ޑޮލަރެވެ.
ސަރުކާރުން އިސްލާހު ހުށަހަޅާފައިވަނީ، ގެސްޓުހައުސްތަކާއި ރިސޯޓުތަކަށް އަންނަ ފަތުވެރިންގެ އަތުން މިހާރު ނަގަމުން އަންނަ ގްރީން ޓެކްސް ދެ ގުނަ ބޮޑު ކުރުމަށެވެ. އެއީ:
-
ގެސްޓްހައުސްތަކުން (50 ކޮޓަރިއަށް ވުރެ މަދު): 6 ޑޮލަރަށް ބޮޑުކުރުން
-
ރިސޯޓްތަކާއި ސިޓީ ހޮޓާ އަދި 50 ކޮޓަރިއަށް ވުރެ ގިނަ ޓޫރިސްޓުންނަށް ހިދުމަތް ދޭ ތަންތަނުން: 6 ޑޮލަރުން 12 ޑޮލަަރަށް ބޮޑުކުރުން
ތަފްސީލު - މި ބިލު ސަބްކޮމިޓީން ވެސް ނިންމާފައި އޮތީ، ސަރުކާރުން ހުށަހެޅި ގޮތަށް އިތުރު ބަދަލެއް ނުގެނެސް ފާސް ކުރުމަށެވެ. މިއަދު ކުރިއަށް ދިޔަ މި ބިލު ދިރާސާ ކުރާ މުޅި މަޖިލީހުގެ ކޮމިޓީ ބައްދަލުވުމުގައި ކެންދޫ ދާއިރާގެ އެމްޑީޕީ މެމްބަރު މައުރޫފް ޒާކިރު ހުށަހަޅުއްވީ:
-
މީހުން 25 ކޮޓަރި ނުވަތަ އެއަށް ވުރެ މަދު ކޮޓަރި ހުންނަ ހޮޓާތަކާއި ގެސްޓްހައުސްތަކަށް ގްރީން ޓެކްސް ބޮޑު ނުކޮށް، 3 ޑޮލަރުގައި ބޭއްވުމަށް
-
އެ ހުށަހެޅުމަށް ތާއީދު ކުރެއްވީ، އެމްޑީޕީގެ ޕީޖީ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް
އެ އިސްލާހު ފާސް ނުވީ 68 މެންބަރުން ދެކޮޅަށް ވޯޓު ދެއްވުމުންނެވެ. އެއްކޮޅަށް ވޯޓު ދެއްވީ އެމްޑީޕީގެ 11 މެންބަރުންނެވެ.
އިތުރު އިސްލާހެއް މި ބިލަށް ގެނަން ހުށަހަޅާފައި ނުވުމުން ސަބްކޮމިޓީން ނިންމި ގޮތަށް މުޅި ބިލު ފާސް ކުރަން ފެނޭތޯ އެހުމުން، 67 މެންބަރުން ވޯޓު ދެއްވި އެވެ. ދެކޮޅަށް ވޯޓު ދެއްވީ އެމްޑީޕީގެ 11 މެންބަރުންނެވެ.
މުޅި މަޖިލިސް ކޮމިޓިން ބިލު ފާސް ކުރުމުން ދެން މި ބިލު ދާނީ، މަޖިލީހުގެ ތަޅުމަށެވެ. އަދި ތަޅުން ފާސްކުރުމުން، މިއަށް އަމަލު ކުރަން ފަށާނީ ރައީސް ތަސްދީގު ކުރެއްވުމުންނެވެ.
ޓޫރިޒަމް ގާނޫނަށް އިސްލާހު ގެނައުމުގެ ބިލުގެ އިތުރުން، މިއަދުގެ މުޅި މަޖިލިސް ކޮމިޓީގައި އަންނަ އަހަރުގެ ޖޫން އިން ފެށިގެން ޓީޖީއެސްޓީ %17އަށް ބޮޑު ކުރަން ހިމެނޭ ގޮތަށް ސަރުކާރުން ދެން ހުށަހަޅާފައި އޮތް ޓެކްސް އާއި ޑިއުޓީ ބޮޑު ކުރުމާ ނެގުމާ ގުޅޭ ދެން އޮތް ތިން ބިލު ވެސް ވަނީ ފާސްކޮށްފަ އެވެ.
ކޮމެންޓް