މާލޭގެ މަގު ހަދަން ފެށުން އަންނަ އަހަރަށް ފަސްވެއްޖެ

މާލޭގެ މަގުތައް ޒަމާނީ ފެންވަރަކަށް މިއަހަރު ހަދަން ފަށާނެ ކަމަށް ރައީސް މުހައްމަދު މުއިއްޒު ވިދާޅުވި މަޝްރޫއު އަންނަ އަހަރަށް ފަސްވެއްޖެ އެވެ.

އެނގުން މުހިންމު - މިދިޔަ ޖެނުއަރީގައި ރައީސް މުއިއްޒު ޗައިނާއަށް ކުރެއްވި ދަތުރުފުޅުގައި އެ ގައުމުން ރާއްޖެއަށް ދޭން ނިންމި 130 މިލިއަން ޑޮލަރުގެ ބޮޑު ބަޔެއް ހޭދަކުރާނީ، މާލޭ މަގު ހަދާ މަޝްރޫއަށް ކަމަށް އެމަނިކުފާނު މީގެ ކުރިން ވަނީ ވިދާޅުވެފަ އެވެ.

އޭގެ ފަހުން މިއަހަރަށް މަޖިލިސް ހުޅުވުމަށް މިދިޔަ ފެބްރުއަރީގައި ބޭއްވި ޖަލްސާގައި ރައީސް އިއްވެވި ރިޔާސީ ބަޔާނުގައި ވިދާޅުވީ މި އަހަރުގެ ތެރޭގައި އެ މަޝްރޫއުގެ މަސައްކަތް ފެށޭނެ ކަމަށެވެ.

މާލޭގެ މަގުތައް ރަނގަޅު ފެންވަރުގައި ހެދުމުގެ މަސައްކަތް މި އަހަރު އިރާދަކުރެއްވިއްޔާ ފެށިގެންދާނެ. މި މަޝްރޫއަށް ހިނގާނެ ހަރަދުގެ ބޮޑުބައި ޗައިނާގެ ހިލޭއެހީގެ ދަށުން ހަމަޖެހިގެންދާނެ،" ރައީސް ވިދާޅުވި އެވެ.

މާޗުގެ ތެރޭގައި އެ މަޝްރޫއުގެ މަޝްވަރާތަކަށް ޗައިނާގެ ޓީމެއް ވެސް ރާއްޖެއަށް ވަނީ އައިސްފަ އެވެ.

ވީ ކިހިނެއް؟ - މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ވަނީ އެ މަޝްރޫއު ނުފެށި ލަސްވާތީ، އެކަމާ ބެހޭގޮތުން ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބާ ސުވާލުކޮށްފަ އެވެ.

ބުނީ ކީކޭ؟ - އެ ސުވާލަށް ޖަވާބުދެއްވަމުން މުއްތަލިބު ވިދާޅުވީ ސަރުކާރުން ބުނެފައިވާނީ މި އަހަރުގެ ތެރޭގައި މަސައްކަތް ފަށަން މަސައްކަތް ކުރާ ކަމަށެވެ.

އެހެން ނަމަވެސް މި މަޝްރޫއަކީ ޗައިނާ ސަރުކާރުގެ ހިލޭ އެހީގެ ދަށުން ކުރިއަށްގެންދާ މަޝްރޫއެއްކަން ފާހަގަކުރައްވައި މުއްތަލިބު ވިދާޅުވީ މިފަދަ މަޝްރޫއުތައް ކުރިއަށްގެންދަނީ ވަކި މަރުހަލާތަކެއް ފުރިހަމަކުރުމަށްފަހު ކަމަށެވެ.

އެގޮތުން ޓެންޑަރިންއާ ހަމައަށް ދާނީ، މުއްތަލިބު ވިދާޅުވި ގޮތުގައި ދިވެހި ސަރުކާރުން ޕްރޮޕޯސަލް ހުށަހެޅުމުން އެ ޕްރޮޕޯސަލް އެޕްރޫވްކުރުމަށްފަހު ފީސިބިލިޓީ ހަދައި، އެއަށް ބިނާކޮށް ޕްރޮޖެކްޓް ޑިޒައިން ކުރުމަށްފަހު ކަމަށެވެ.

މުއްތަލިބު ވިދާޅުވީ ޗައިނާ ސަރުކާރުން ކުރިއަށްގެންދާ މަރުހަލާތަކަކަށް ވާތީ، އެ ކަންކަމަކީ ސީދާ ދިވެހި ސަރުކާރުގެ ކޮންޓްރޯލް އޮތް ކަންކަމެއް ނޫން ކަމަށެވެ.

"މަގު ހެދުމުގެ މަޝްރޫއުގައި އަންނަ މަހުގެ 4 ވަނަ ދުވަހު ފީސިބިލިޓީ ޓީމު މާލެ އަންނާނެ. މާލެ އައިސް އެ ބޭފުޅުން 20 ދުވަސް ވަންދެން މަސައްކަތް ކުރައްވާނެ، ބޭނުންވާ މައުލޫމާތާއި ރިކުއަމަންޓް ހޯދުމަށްޓަކައި،" މުއްތަލިބު ވިދާޅުވި އެވެ.

"އަޅުގަނޑުމެން މަސައްކަތް ކުރަނީ މިހާރު އެ ފެށުމާ އެއްކޮށް [ފީސިބިލިޓީ ފެށުމާ އެއްކޮށް] ވީހާ ވެސް ބާރު ސްޕީޑެއްގައި ގެންގޮސް، އަންނަ އަހަރުގެ މެދުތެރެއަށް ދާންވާއިރަށް އަމަލީ މަސައްކަތް ފެށޭތޯ."

ތަފްސީލު - މުއްތަލިބު ވިދާޅުވީ ސަރުކާރުގެ އަމާޒަކީ އަންނަ އަހަރުގެ ތެރޭގައި މި މަޝްރޫއު ފަށައިގެން ކުރިއަށް ހަތަރު އަހަރަށް ބަހާލައިގެން އެ މަޝްރޫއު ނިންމުން ކަމަށެވެ.

އެހެން ނަމަވެސް އޭނާ ވިދާޅުވީ މާލެއަކީ ވަރަށް ބޮޑަށް ތޮއްޖެހިފައި އޮތް ތަނަކަށް ވުމުން އާންމުންނަށް ދަތިނުވާނެ ގޮތަކަށް ވިސްނައިގެން ކުރިއަށްގެންދަންޖެހޭ ކަމަށާއި އެހެންކަމުން މަޝްރޫއަށް ދާނެ މުއްދަތު ދަންނަވަން އުނދަގޫ ކަމަށެވެ.

"އެހެން ނަމަވެސް މާލޭގެ މަގުތަކަކީ ރަނގަޅު ފެންވަރަކަށް ހަދަންޖެހޭ މަޝްރޫއުއަކަށް ވާތީ އަޅުގަނޑުމެން އަވަސްއަރުވާލަކަށް ބޭނުމެއް ނޫން. ހިލޭ އެހީގެ ދަށުން ހަމަޖެހިފައި އޮތް މަޝްއޫރަކަށް ވާތީ ވީހާ ވެސް ރަނގަޅަށް، ވީހާ ވެސް ރައްޔިތުންނަށް އުނދަގޫ ކުޑަވާނެ ގޮތަކަށް މަޝްރޫއު ކުރިއަށްގެންދަން އަޅުގަނޑުމެން ސަމާލުކަން ދޭނީ،" މުއްތަލިބު ވިދާޅުވި އެވެ.

މާލޭގެ މަގުތަކުގައި ފެންބޮޑުވާ މައްސަލައަށް ދާއިމީ ހައްލެއް ހޯދުމަށް ހަމަޖެހިފައިވަނީ ވެސް މަގުހަދާ މަޝްރޫއުގެ ތެރެއިންނެވެ.