ޕީޖީ އޮފީސް. ކުރީގެ ނިންމުންތަކާ ގުޅޭ ގޮތުން 500 އަށް ވުރެ ގިނަ ޝަކުވާ ހުށަހެޅި - (ދައުރު ފޮޓޯ/ އަބްދުﷲ އަނޫފް ޖުނައިދް)
ޕީޖީގެ ކުރީގެ ނިންމުންތަކާ މެދު 500އަށް ވުރެ ގިނަ ޝަކުވާ
ޕްރޮސެކިއުޓަ ޖެނެރަލް (ޕީޖީ) އޮފީހުގެ ކުރީގެ ނިންމުންތަކާ މެދު ޝަކުވާ ހުށަހަޅަން ހުޅުވާލި ފުރުސަތުގައި 500އަށް ވުރެ ގިނަ ޝަކުވާ ލިބިފައިވާ ކަމަށް އެ އޮފީހުން މިއަދު ބުނެފި އެވެ.
ވީ ކިހިނެއް؟ - ޝަކުވާތައް ހުށަހެޅުމަށް އެ އޮފީހުން ވަނީ 20 ދުވަހުގެ މުއްދަތަަކަށް ހުޅުވާލައިފަ އެވެ. އެއީ އާ ޕީޖީ އައްބާސް ޝަރީފް މަގާމާ ހަވާލުވެވަޑައިގަތުމަށް ފަހު، ސީދާ އޭނާގެ ނިންމެވުމުގެ ދަށުން ޕީޖީ އޮފީހުން ހުޅުވާލި ފުރުސަތެކެވެ.
ތަފްސީލް - ޕީޖީ އޮފީހުން ފުރުސަތު ހުޅުވާލި މުއްދަތު މި މަހު 20ގައި ވަނީ ހަމަވެފަ އެވެ. އެ އޮފީހުގެ ތަރުޖަމާނު އަދި ޕަބްލިކް ޕްރޮސެކިއުޓަރު އަހުމަދު ޝަފީއު ވިދާޅުވީ އެ މުއްދަތުގައި ޖުމުލަ 539 ފޯމު ލިބިފައިވާ ކަމަށެވެ.
ޕީޖީން ފުރުސަތު ހުޅުވާލީ ދައުވާ ކުރުމާ މެދު ނިންމާފައިވާ ނިންމުންތަކުގެ އިތުރުން ޖިނާއީ މައްސަލަތަކުގައި ތުހުމަތުކުރާ މީހުން ބަންދު ކުރުމާ މެދު އެ އޮފީހުން ނިންމާފައިވާ ނިންމުންތައް ވެސް ހިމެނޭ ގޮތަށް ޝަކުވާ ހުށަހެޅުމަށެވެ.
ކީކޭ ބުނީ؟ - މަގާމާ ހަވާލުވެވަޑައިގަތުމަށް ފަހު، ފުރަތަމަ ފަހަރަށް ނޫސްވެރިންނާ ބައްދަލުކުރައްވައި އައްބާސް ވިދާޅުވީ އެގޮތަށް ނިންމެވީ ވަރަށް ގިނަ ޝަކުވާތައް މަގާމާ ހަވާލުވެވަޑައިގަތް ދުވަހުން ފެށިގެން ވެސް ލިބެމުންދާތީ ކަމަށެވެ.
އޭނާ ވިދާޅުވި ގޮތުގައި، ކުރީގެ ނިންމުންތަކާ ގުޅޭ ގޮތުން އެކި ފަރާތްތަކުން ހުށަހަޅާ ޝަކުވާތައް ބަލައި މައްސަލަތައް އަލުން ރިވިއުކުރުމާ މެދު ގޮތެއް ނިންމުމަށް ޕީޖީގެ އެތެރޭގެ ކޮމިޓީއެއް އެކުލަވާލާނެ އެވެ. އަދި ޝަކުވާތަކާ ގުޅޭ ގޮތުން ގޮތް ނިންމާނީ އެ ކޮމިޓީން ބެލުމަށް ފަހު ކަމަށް އޭނާ ވިދާޅުވި އެވެ.
"އެގޮތަށް ނިންމާ ނިންމުންތައް އެ ނިންމި ސަބަބުތަކާ އެކު އަޅުގަނޑުމެން ހާމަވެސް ކުރާނަން،" މި މަހު 1ގައި ބޭއްވި ނޫސްވެރިންގެ ބައްދަލުވުމުގައި އައްބާސް ވިދާޅުވި އެވެ.
އެނގުން މުހިންމު - ކުރީގެ ޕީޖީ ހުސައިން ޝަމީމް ވަކިކުރި ހުށަހެޅުމުގައި ހިމެނޭ މައްސަލަތަކަކީ:
-
ރޭޕްގެ ތުހުމަތުކޮށް ދައުވާ އުފުލި ކުރީގެ ޓޫރިޒަމް މިނިސްޓަރު އަލީ ވަހީދުގެ މައްސަލަ އެކަށީގެންވާ ސަބަބެއް ނެތި ދައުވާ ނުކުރަން ނިންމައި ފައިލްކުރުން
-
ކުރީގެ ޔޫތު މިނިސްޓަރު އަހުމަދު މަހުލޫފްގެ މައްޗަށް ކުރި އެމްއެމްޕީއާރުސީގެ ކޮރަޕްޝަންގެ ދައުވާގެ މައްސަލަ ފައިލްކުރުން
-
ސަފާރީގައި އަންހެނަކު ރޭޕްކުރި މައްސަލައިގައި ދަށު ކޯޓުގެ ނިންމުން ޕީޖީ ޝަމީމް އިސްތިއުނާފު ނުކުރަން ނިންމެވުން
-
މިލަންދޫ ދާއިރާގެ ކުރީގެ މެންބަރު އަލީ ރިޒާގެ މައްޗަށް އުފުލި މީހުން ޓްރެފިކް ކުރުމުގެ ދައުވާ އަނބުރާ ގެނައުން
-
ކޮވިޑް ތެރޭގައި ވެންޓިލޭޓަރުތަކެއް ގަތުމަށް ކުރި މުއާމަލާތުގެ ތެރޭގައި ހިމެނޭ ކޮރަޕްޝަންގެ މައްސަލައިގައި ދައުވާނުކުރުން
ސިޔާސީ ނުފޫޒުގައި ޖެހިގެން ނިންމި ނިންމުންތަކެއް ކަމަށް ކުރާ ތުހުމަތުތަކަށް ޝަމީމު ވަނީ އިންކާރުކުރައްވައި އެ ތުހުމަތު ކުރި ނިޔަތާ މެދު އޭނާ ވަނީ ސުވާލު އުފައްދަވައިފަ އެވެ.
ފާހަގަކޮށްލެވޭ - ކޮންމެ ސަރުކާރެއްގައި ވެސް އެ މުއްދަތުގައި ދައުވާ އުފުލާ ސިޔާސީ ބޭފުޅުންގެ މައްސަލަތަކުގައި އޭރުގެ އޮންނަ ޕީޖީއަށް ސިޔާސީ ނުފޫޒާއި ސަރުކާރުގެ އިސްވެރިން ބިރު ދެއްކުން ފަދަ ތުހުމަތުތައް އަމާޒުވެ އެވެ.
ކޮމެންޓް