ޝަކުވާއަކާ ގުޅިގެން ޝަރީއަތް ފަސްކޮށްދޭން އެދޭނީ ހުކުމާ ހަމައަށް ގޮސްފައިވާނަމަ: ޕީޖީ

ޕްރޮސެކިޔުޓާ ޖެނެރަލްގެ (ޕީޖީ) އޮފީހުން ކޯޓަށް ހުށަހަޅާ ހިނގަމުންދާ ދައުވާތަކާއި އިސްތިއުނާފަކާ ބެހޭ ޝަކުވާއަކާ ގުޅިގެން ހިނގަމުންދާ ޝަރީއަތެއް ފަސްކޮށްދިނުމަށް އެ އޮފީހުން ކޯޓުގައި އެދޭނީ އެ މައްސަލައެއްގެ ހުކުމަކާ ހަމައަށް ގޮސްފައިވާނަމަ ކަމަށް ބުނެފި އެވެ.

މައްސަލައިގެ ފެށުން - ޕީޖީ އޮފީހުން ކުރިން ނިންމި ނިންމުންތަކާ މެދު ހުރި ޝަކުވާތައް ހުށަހެޅުމަށް އެ އޮފީހުން ވަނީ 20 ދުވަހުގެ މުއްދަތަަކަށް ހުޅުވާލައިފަ އެވެ. އެއީ އާ ޕީޖީ އައްބާސް ޝަރީފް މަގާމާ ހަވާލުވެވަޑައިގަތުމަށް ފަހު، ސީދާ އޭނާގެ ނިންމެވުމުގެ ދަށުން ޕީޖީ އޮފީހުން ހުޅުވާލި ފުރުސަތެކެވެ.

ވީ ކިހިނެއް؟ - އޮފީހުން ކޯޓަށް ހުށަހަޅާ ހިނގަމުންދާ ދައުވާތަކާއި އިސްތިއުނާފަކާ ބެހޭ ޝަކުވާއަކާ ގުޅިގެން ހިނގަމުންދާ ޝަރީއަތެއް ފަސްކޮށްދިނުމަށް އެ އޮފީހުން ކޯޓުގައި އެދޭނެ ހާލަތާ ގުޅޭ ބަޔާނެއް ޕީޖީ އޮފީހުން ނެރެފައިވާއިރު ރައްޔިތުންގެ މަޖިލީހުގެ ކުރީގެ މެމްބަރު އަލްހާނު ފަހުމީ އާއި އޭނާގެ ދެ ކޮއްކޮގެ މައްޗަށް ދައުލަތުން އުފުލާފައިވާ ޓެކުމުގެ ދައުވާތައް މުރާޖައާކޮށްދޭން ޕީޖީ އޮފީހުގައި އެދުމަށް ނިންމާފައިވާކަން މިއަދު ކްރިމިނަލް ކޯޓުގެ ޝަރީއަތުގައި އަލްހާނުން ފަރާތުން ވަނީ ބުނެފަ އެވެ.

މިއަދު ކްރިމިނަލް ކޯޓުގައި ބޭއްވި އަޑުއެހުމުގައި އަލްހާންގެ ދިފާއީ ވަކީލު އަލީ ސައީދު ވަނީ ދައުވާ ރިވިއުކޮށްދިނުމަށް ޕީޖީ އޮފީހަށް ހުށަހަޅާތީ ޝަރީއަތުގެ އަޑުއެހުންތައް މި ވަގުތަށް މަޑުޖައްސާލަދިނުމަށް އެދިވަޑައިގެންފަ އެވެ. 

އެނގުން މުހިއްމު - ވަކި މައްސަލައެއްގެ ނަން ނުބުނެ ޕީޖީ އޮފީހުން މިއަދު ނެރުނު ނޫސްބަޔާނުގައި ބުނީ ދައުވާއަކާ ގުޅިގެން ހުށަހަޅާ ޝަކުވާއަކާ ގުޅިގެން ޝަރީއަތް މަޑުޖައްސާލަން އަންގާނީ ހަމައެކަނި ހުކުމަކާ ހަމައަށް ގޮސްފައިވާ މައްސަލަތަކުގައި ކަމަށެވެ. 

އެ ބަޔާނުގައި ބުނެފައިވާ ގޮތުގައި ޝަކުވާ ހުށަހަޅަން ހުޅުވާލި ފުުރުސަތުގެ ދަށުން ޝަކުވާ ހުށަހަޅާފަރާތް ތަކުން ހުށަހަޅާ ހުށަހެޅުންތައް މުރާޖައާކޮށް، ވީހާވެސް އަވަހަކަށް އެކަންތަކަށް ގޮތެއް ނިންމުމަށް ޕީޖީ އޮފީހުގެ މަސައްކަތަށް ގެންނަންޖެހޭ ބަދަލުތައް މިހާރު ވަނީ ގެނެސްފަ އެވެ. 

މީގެ އިތުރަށް ބުނީ މައްސަލަތަކުގައި ހައްޔަރުކޮށްފައި އަދި ބަންދުކޮށްފައި ތިބި މީހުންގެ ބަންދު މުރާޖައާކުރުމަށް ހުށަހަޅާ ހުށަހެޅުމަކާ ގުޅިގެން ބަންދުގެ ހާލަތަކަށް ބަދަލު ގެނެވިދާނެ ކަމަށް އެ އޮފީހަށް ފެންނަ މައްސަލަތަކުގައި ބަންދު މުރާޖައާ ކުރުމަށް ކޯޓުގެ ސަމާލުކަމަށް އެފަދަ މައްސަލަތައް ގެންނާނެ ކަމަށް ވަނީ ބުނެފަ އެެވެ.