ޓެކްސް އެޕީލް ޓަރައިބިއުނަލް. (ފޮޓޯ/މިނިވަން ނިއުސް)
ޓެކްސް އެޕީލް ޓްރައިބިއުނަލަށް ހަތަރު މެންބަރުން އައްޔަންކޮށްފި
ރައީސް މުހައްމަދު މުއިއްޒު މިއަދު ޓެކްސް އެޕީލް ޓްރައިބިއުނަލަށް ހަތަރު މެންބަރުން އައްޔަންކުރައްވައިފި އެވެ.
ވީކިހިނެއް؟ - އެ ޓްރައިބިއުނަލްގައި ހުސްވެފައިވާ ހަތަރު މެންބަރުންގެ މަގާމަށް ރައީސް މުއިއްޒު ފޮނުއްވި ނަންތަކުގެ ތެރެއިން ހަތަރު ނަމެއް ރައްޔިތުންގެ މަޖިލީހުން ފާސްކުރީ މިއަދެވެ.
ތަފްސީލް - ރައީސް ފޮނުއްވި ނަންތައް ދިރާސާކޮށް އިންޓަވިއުކުރުމަށް ފަހު، %75އަށް ވުރެ މަތިން މާކްސް ލިބުނު ހަތް ނަމަކަށް މިއަދުގެ ޖަލްސާގައި ވޯޓަށް އެހި އެވެ.
އޭގެ ތެރެއިން މެންބަރުން ރުހުން ލިބި އަދި އޭގެ ފަހުން އެ މަގާމަށް ރައީސް މުއިއްޒު އައްޔަންކުރެއްވި ހަތަރު ބޭފުޅުންނަކީ:
-
އަބްދުލް ގަނީ މުހައްމަދު (ލިބުނީ %93 މާކްސް) - 68 ވޯޓު؛ ނުފެންނަ ކަމަށް އެއްވެސް މެމްބަރަކު ވޯޓެއް ނުދެއްވާ
-
އިބްރާހިމް ޝަރީފް (ލިބުނީ %84 މާކްސް) - 68 ވޯޓު؛ ނުފެންނަ ކަމަށް އެއްވެސް މެމްބަރަކު ވޯޓެއް ނުދެއްވާ
-
ހަސަން ޒުހޭރު (ލިބުނީ %83 މާކްސް) - 68 ވޯޓު؛ ނުފެންނަ ކަމަށް އެއްވެސް މެމްބަރަކު ވޯޓެއް ނުދެއްވާ
-
ޝިފްޒާ އަބްދުލްގައްޔޫމް (ލިބުނީ %75 މާކްސް) - 68 ވޯޓު؛ ނުފެންނަ ކަމަށް އެއްވެސް މެމްބަރަކު ވޯޓެއް ނުދެއްވާ
ކީކޭ ބުނީ؟ - ރައީސް އޮފީހުން ބުނީ މަޖިލީހުން ރުހުން ދިން ހަތަރު ބޭފުޅުން އެ މަގާމުތަކަށް މިހާރު އައްޔަންކުރައްވާފައިވާ ކަމަށެވެ.
ފަސްމަންޒަރު - ޖުމްލަ ފަސް މެންބަރުންގެ މައްޗަށް އެކުލެވިގެންވާ ޓެކްސް އެޕީލް ޓްރައިބިއުނަލްގެ ރައީސް އާއި ނައިބު ރައީސް ހިމެނޭ ގޮތަށް ހަތަރު މެމްބަރަކު މިދިޔަ އޮގަސްޓް މަހު ރައީސް މުއިއްޒު ވަކިކުރެއްވީ، މަޖިލީހުން އެ މީހުން ވަކިކުރަން ފާސްކުރުމާ ގުޅިގެންނެވެ.
އޭގެ ތެރޭގައި ހިމެނެނީ:
-
ރައީސް މުހައްމަދު މުނައްވަރު އަލީ
-
ނައިބު ރައީސް ހުސެއިން ޒައިދާން ޖަލީލު
-
އަހްމަދު އަޝްރަފް
-
ހަދީޖާ ނައީމް
އެނގުން މުހިންމު - ޓެކްސް އެޕީލް ޓްރައިބިއުނަލްގެ ހަތަރު މެންބަރަކު ވަކިކުރުމުން އެ ތަނުގެ މެންބަރަކަށް ހުންނެވީ އިސްމާއީލް ސާޖިދު އެކަންޏެވެ.
ވަކިކުރި މެންބަރުންގެ ތެރޭގައި ސާޖިދު ހިމަނާފައި ނުވަނީ، ޓްރައިބިއުނަލްގައި ހުރި މައްސަލަތައް ރައްޔިތުންގެ މަޖިލިހާ ހިސާބަށް ގެންނެވީ އޭނާ ކަމަށް ވާތީ ކަމަށް ކޮމިޓީގެ ނިންމުމުގައި ބުނެފައިވެ އެވެ.
ދެން ތިބި މެމްބަރުން ވަކިކުރަން ހުށަހެޅި ސަބަބެއް ކަމަށް މަޖިލީހުން ބުނެފައިވަނީ ޓެކްސް ނެގުމާ ބެހޭ އިދާރީ ގާނޫނުގެ 59 ވަނަ މާއްދާގެ (ހ)ގެ ހަތަރުވަނަ ނަންބަރާ އެ މެމްބަރުން ހިލާފުވެފައިވާތީ ކަމަށެވެ.
މެމްބަރުން ވަކިކުރުމާ ގުޅޭ މި މާއްދާގެ ހަތަރު ވަނަ ނަންބަރުގައި ބުނަނީ، ބޯޑުގެ މެންބަރެއްގެ ހައިސިއްޔަތުން އަދާކުރަން ޖެހޭ މަސްއޫލިއްޔަތުތައް އަދާކުރުމުގައި އިހުމާލުވުން ނުވަތަ އެކަމަށް ދޭންވާ ސަމާލުކަން ނުދޭކަމަށް ބޯޑަށް ފެނިއްޖެ ނަމަ ނުވަތަ ރައްޔިތުންގެ މަޖިލީހުގެ ކަމާ ބެހޭ ކޮމިޓީއަށް ފެނިއްޖެ ނަމަ އެ މީހަކު ވަކިކުރެވޭނެ ކަމަށެވެ.
ކޮމެންޓް