ދުންފަތުގެ އިސްތިއުމާލުކުރުން މަނާކަން އަންގާ ނިޝާނެއް. (ދައުރު ފޮޓޯ/ އަބްދުﷲ އަނޫފް ޖުނައިދް)
ދުންފަތް ކޮންޓްރޯލްކުރަން މާސްޓާ ޕްލޭނެއް ހަދަނީ
ދުންފަތް ކޮންޓްރޯލްކުރަން ހަދާފައިވާ ގާނޫނުތައް ތަންފީޒުކޮށް ދުންފަތުގެ އިސްތިއުމާލު ކުރުމުގެ މައްސަލައަށް ދާއިމީ ހައްލެއް ހޯދަން މާސްޓާ ޕްލޭނެއް އެކުލަވާލަން ރައީސް މުހައްމަދު މުއިއްޒު ނިންމަވައިފި އެވެ.
ވީ ކިހިނެއް؟ - ކުރިއަށް އޮތް ހަތަރު އަހަރު ތެރޭ ފާހަގަކުރެވޭ ރަނގަޅު ނަތީޖާއެއް ދުންފަތް ކޮންޓްރޯލްކުރުމުގައި ހޯދޭނެ ފަދަ ރިއަލިސްޓިކް މާސްޓާ ޕްލޭނެއް އެކުލަވާލަން ރައީސް ނިންމެވީ އިއްޔެ ބޭއްވި ވަޒީރުންގެ މަޖިލީހުގެ ޖަލްސާގައި ވަޒީރުންގެ ލަފާފުޅާ އެކު ކަމަށް ރައީސް އޮފީހުން ބުންޏެވެ.
ރައީސް ނިންމަވާފައިިވަނީ އެ މާސްޓާޕްލޭން މި މަހުގެ 27ގައި އޮންނަ ވަޒީރުންގެ މަޖިލީހުގެ ޖަލްސާއަށް ހުށަހެޅުއްވުމަށެވެ.
ތަފްސީލް - އިއްޔެގެ ވަޒީރުންގެ މަޖިލީހުގެ ބައްދަލުވުމުގައި، ދުންފަތާ ދުރު މުޖުތަމައެއް ބިނާކުރަން އެކުލަވާލާ ޕްލޭނުގައި ހިމަނާނެ ބައެއް ކަންތައް ވަނީ ނިންމަވައިފަ އެވެ.
އެގޮތުން:
-
ދުންފަތާ ދުރު މުޖުތަމައެއް ބިނާކުރަން އިޖުތިމާއީ ގޮތުން ހަރަކާތްތެރިވާ ފަރާތްތަކާއި، ދުންފަތުގެ އިސްތިއުމާލުނުކުރާ ރަށްރަށް ފާހަގަކުރަން އިނާމެއް ތައާރުފުކުރުން
-
އެ އިނާމު ލިބޭ ރަށެއްގެ އިޖުތިމާއީ ކަމަކަށް މާލީ އެހީތެރިކަން ދިނުން
-
ދުންފަތާ ދުރުހެލިވާން ބޭނުންވާ ފަރާތްތަކަށް ހާއްސަ ފަރުވާ، ކޮންމެ ރަށެއްގެ ސިއްހީ ހިދުމަތް ދޭ މަރުކަޒަކުން ހިލޭ ފޯރުކޮށްދިނުން
އެނގުން މުހިއްމު - މި ސަރުކާރުން ވަނީ ސިނގިރެޓާއި ބިޑިން ނަގާ ޓެކްސް ބޮޑުކޮށް، އެ ތަކެތިން ނަގާ އިމްޕޯޓު ޑިއުޓީ ވެސް ބޮޑުކުރަން ނިންމައިފަ އެވެ.
އެގޮތުން ނިންމާފައި ވަނީ:
-
ސިނގިރޭޓާއި ބިޑިން ނަގާ އިމްޕޯޓް ޑިއުޓީގެ ސްޕެސިފިކް ރޭޓާއި އެޑްވަލޮރެމް ރޭޓް އަންނަ މަހުން ފެށިގެން ބޮޑުކުރުން
-
ސިނގިރޭޓާއި ބިޑިއަށް ނަގާ އިމްޕޯޓު ޑިއުޓީގެ ސްޕެސިފިކް ރޭޓު 3ރ. އިން 8ރ.އަށް މަތިކުރުން؛ މިއާ އެކު ކޮންމެ ސިނގިރޭޓަކުން 5ރ. ބޮޑުވާނެ
-
މި ބަދަލާ އެކު މިހާރު ސިނގިރޭޓު ފޮއްޓެއް ގަންނަން ލިބޭ އަގަށް ވުރެ 100ރ. ބޮޑުވާނެ؛ މިހާރު ފޮއްޓެއް ވިއްކަނީ 100ރ.އަށް ވުރެ ބޮޑު އަގެއްގައި
-
ސިނގިރޭޓާއި މުދަލުން ނަގާ އެޑްވަލޮރަމް ރޭޓު %50 އިން %100އަށް މަތިކުރުން
މީގެ އިތުރުން ވޭޕްކުރަން ބޭނުންކުރާ ތަކެތި އަންނަ މަހުގެ 15 އިން ފެށިގެން ރާއްޖެއަށް އެތެރުކުރުން ވެސް ވަނީ މަނާކޮށްފަ އެވެ.