ޖިހާދު ރާއްޖެއަކު ނެތް؛ މުއްދަތު އިތުރުކުރަން ޕީޖީން ކޯޓުގައި އެދިއްޖެ

ކުރީގެ ނައިބު ރައީސް އަބްދުﷲ ޖިހާދު މި ވަގުތު ރާއްޖޭގައި ނެތުމުން، އޭނާގެ މައްޗަށް އުފުލާފައިވާ ހިޔާނާތުގެ ދައުވާ ކްރިމިނަލް ކޯޓުން ބޭރުކޮށްލި ނިންމުމުގެ އިސްތިއުނާފު އަލުން ހައި ކޯޓަށް ހުށަހަޅަން ދިން މުއްދަތު އިތުރުކޮށްދިނުމަށް ޕްރޮސެކިއުޓަ ޖެނެރަލް (ޕީޖީ) އޮފީހުން މިއަދު އެދިއްޖެ އެވެ.

ވީ ކިހިނެއް؟ - ހައި ކޯޓަށް ހުށަހަޅާފައިވާ އިސްތިއުނާފު މައްސަލާގައި ހާޒިރުވާން އަންގަން ޖިހާދަށް ޗިޓު ރައްދު ނުކުރެވޭތީ އަނބުރާ ޕީޖީ އޮފީހަށް މައްސަލަ ފޮނުވާލީ، އެޑްރެސް ސާފުކޮށް ޗިޓު ރައްދު ކުރެވޭނެ ގޮތެއްގެ މައުލޫމާތު ކޯޓަށް ހުށަހަޅަން ޖެހޭ ގޮތަށް 15 ދުވަހުގެ މުއްދަތެއް ދީފަ އެވެ. އެ މުއްދަތު ހަމަވާ ތާރީހަކީ މިއަދެވެ.

ކީކޭ ބުނީ؟ - މުއްދަތު ހަމަވެފައިވާތީ 'ދައުރު'ން މިއަދު ސުވާލުކުރުމުން ޕީޖީ އޮފީހުގެ މީޑިއާ އޮފިޝަލް އަހުމަދު ޝަފީއު ވިދާޅުވީ ޖިހާދު ރާއްޖޭގައި މި ވަގުތު ނެތް ކަމަށް ފުލުހުން ބުނެފައިވާ ކަމަށެވެ. މި ވަގުތު ޗިޓު ރައްދު ކުރެވޭނެ ގޮތެއް ނޯންނާނެތީ، ރާއްޖެ ވަޑައިގަތުމުން އެކަން ހަމަޖައްސަން، މުއްދަތު އިތުރުކޮށްދޭން އެދިފައިވާނެ ކަމަށް ޝަފީއު ވިދާޅުވި އެވެ.

"އަޅުގަނޑުމެން މިއަދު ކޯޓަށް ހުށަހަޅާފައިވާނެ މުއްދަތު އިތުރުކުރަން. އެއީ ކޮންމެ ގޮތެއް ވިޔަސް މި ވަގުތު ޗިޓު ރައްދު ކުރެވޭނެ ގޮތެއް ނޯންނާނެތީ،" އޭނާ ވިދާޅުވި އެވެ.

ހައި ކޯޓުގެ ނިންމުމުން އެނގުނު ގޮތުގައި:

އެނގުން މުހިންމު - ޖިހާދު މި ވަގުތު ހުންނެވީ އޮފްޝޯ ފައިނޭންސިންގެ ހިދުމަތް ދިނުމަށް މި ސަރުކާރުން އުފެއްދި މޯލްޑިވްސް އިންޓަނޭޝަނަލް ފައިނޭންޝަލް ސާވިސަސް އޮތޯރިޓީގެ ޗެއާޕާސަން ކަމުގަ އެވެ.

ޖިހާދުގެ މައްޗަށް ދައުވާކޮށްފައިވަނީ ކުރީގެ ރައީސް މުހައްމަދު ވަހީދުގެ ވެރިކަމުގައި އޭރުގެ ފިނޭންސް މިނިސްޓަރުގެ މަގާމުގައި ހުންނެވި އިރު، ސްޕެޝަލް ޓޫރިސްޓް ޒޯނެއްގެ ގޮތުގައި ފުށިދިއްގަރު ފަޅު ތަރައްގީ ކުރުމަށް ސަރުކާރުގެ %50 ހިއްސާވާ ގޮތަށް ޖޮއިންޓް ވެންޗާ އެއްބަސްވުމެއް ހަދަން ވަޒީރުންގެ މަޖިލީހުން ނިންމާފައި ވަނިކޮށް، ދައުލަތުގެ %25 ހިއްސާ އޮންނަ ގޮތަށް ޖޮއިންޓް ވެންޗާ ކުންފުންޏެއް ހެދުމަށް ޕްރައިމް ކެޕިޓަލް މޯލްޑިވްސް ލިމިޓެޑާ އެކު އެއްބަސްވުމުގައި ސޮއިކުރެއްވި މައްސަލާގަ އެވެ.

ފަސް މަންޒަރު - ޖިހާދުގެ މައްޗަށް ދައުލަތުން އުފުލި ދައުވާ ކްރިމިނަލް ކޯޓުން ބޭރުކޮށްލީ މިދިޔަ 25 ޖުލައިގަ އެވެ. ހައި ކޯޓުގައި ދައުލަތުން އެ ނިންމުން އިސްތިއުނާފް ކުރީ މިދިޔަ މަހުގެ 29ގަ އެވެ. މި މަހުގެ 11ގައި، މައްސަލަ ބަލައި ވެސް ގަތެވެ. އެ ގޮތުން:

ގުޅުން ހުރި - ޖިހާދުގެ މައްޗަށް އުފުލި ދައުވާއަކީ ކުރީގެ ޕީޖީ ހުސައިން ޝަމީމްގެ ދައުރު އޭނާގެ މައްޗަށް އުފުލި ދައުވާއެކެވެ. 

އޭރު ޕީޖީން އުފުލި ދައުވާތައް ހިމެނޭ ގޮތަށް އެ އޮފީހުން ކުރިން ނިންމި ނިންމުންތަކާ ގުޅޭ ގޮތުން ޝަކުވާ ހުށަހެޅުމަށް ވަނީ ހުޅުވާލައިފަ އެވެ. އެއީ އާ ޕީޖީ އައްބާސް ޝަރީފްގެ އިސް ނެންގެވުމުގެ މަތިން ދިން ފުރުސަތެކެވެ. އެ ޝަކުވާތައް ބަލައި ގޮތެއް ނިންމަން ކޮމިޓީއެއް އެކުލަވާލާނެ ކަމަށް ވެސް އައްބާސް ވިދާޅުވެފައިވެ އެވެ.