އައްޑޫ ފެން ޕްލާންޓުގެ މައްސަލަ ހައްލުކޮށްފި

އައްޑޫގެ ގުޅިފައިވާ ރަށްތަކަށް ފެން ފޯރުކޮށްދިނުމަށް ފެން އުފައްދާ ޕްލާންޓަށް ދިމާވި މައްސަލަ ހައްލުވެއްޖެ ކަމަށް ފެނަކަ އިން މިއަދު ބުނެފި އެވެ.

ވީ ކިހިނެއް؟ - ފެނަކަ އިން މިއަދު ހެނދުނު ބުނީ އައްޑޫގެ ގުޅިފައިވާާ ރަށްތަކަށް ފެން ފޯރުކޮށްދިނުމަށް ފެން އުފައްދާ އާރުއޯ ޕްލާންޓުގެ ބޯހޯލް ޕަމްޕަށް މައްސަލައެއް ދިމާވެ ޕްލާންޓު ހުއްޓިފައިވާ ކަމަށެވެ. ފެން އުފެއްދުން ހުއްޓިފައިވާތީ ފެނުގެ ހިދުމަތް މެދުކެނޑިދާނެ ކަމަށް ވެސް އެ ކުންފުނިން ބުންޏެވެ.

ތަފްސީލް - ފެނަކަ އިން ދެންމެ ބުނީ އާރުއޯ ޕްލާންޓަށް ދިމާވި މައްސަލަ ހައްލުކޮށް، ޕްލާންޓު ހިންގަން ފަށާފައިވާ ކަމަށެވެ.

އެ މައްސަލަ ހައްލު ކުރުމަށް ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީ އާއި އެމްޑަބްލިއުއެސްސީގެ ފަރާތުން އަވަސް އެހީތެރިކަން ލިބުނުކަން އެ ކުންފުނިން ފާހަގަކުރި އެވެ.

ފާހަގަ ކުރެވޭ - އައްޑޫގެ ފެން ޕްލާންޓަށް މިއަދު މައްސަލަ ދިމާވި އިރު، އެ ސިޓީއަށް ފެނަކަ އިން ފޯރުކޮށްދޭ ކަރަންޓުގެ ހިދުމަތަށް ވެސް ދޭތެރެ ދޭތެރެއިން ބުރޫ އަރަ އެވެ. އެގޮތުން، މިދިޔަ ހަފްތާގައި ވެސް ގުޅިފައިވާ ރަށްތަކުން ދޭތެރެ ދޭތެރެއިން ކަރަންޓު ކެނޑުމުގެ މައްސަލަ ކުރިމަތިވި އެވެ.

ކަރަންޓު މައްސަލައަށް ވަގުތީ ހައްލެއް ގެނެސްފައި ވާއިރު، އެ މައްސަލައަށް ދާއިމީ ހައްލެއް ލިބޭނީ ހައިވޯލްޓޭޖު ސިސްޓަމް އަޕްގްރޭޑުކޮށްގެން ކަމަށް ފެނަކަ އިން ބުންޏެވެ.