އެފްއޭއެމްގެ ނޯމަލައިޒޭޝަން ކޮމިޓީއަށް އެއްބާރުލުން ދެން: ރާފިއު

ބޮއްސުންލާފައިވާ ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ކަންކަން ހަމައަކަށް އަޅުވައި، އާ އިންތިހާބެއް ބާއްވަން ފީފާ އިން އެކުލަވާލާފައިވާ ނޯމަލައިޒޭޝަން ކޮމިޓީއަށް ސަރުކާރުގެ ފަރާތުން އެއްބާރުލުން ދެމުންދާ ކަމަށް ސްޕޯޓްސް މިނިސްޓަރު އަބްދުﷲ ރާފިއު ވިދާޅުވެއްޖެ އެވެ.

ވީ ކިހިނެއް؟ - އޭނާ މިހެން ވިދާޅުވީ މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގެ ތެރެއިން އަމާޒުވި ސުވާލަކަށް ޖަވާބުދެއްވަމުންނެވެ.

ބުނީ ކީކޭ؟ - ރާފިއު ވިދާޅުވި ގޮތުގައި، މިނިސްޓްރީން ގެންދަނީ ނޯމަލައިޒޭޝަން ކޮމިޓީއާ އެކު މަޝްވަރާކޮށް، ކޮމިޓީގެ މަސައްކަތްތަކަށް ފުރިހަމަ އެއްބާރުލުން ދެމުންނެވެ. އޭނާ ފާހަގަކުރެއްވި ގޮތުގައި:

"ނޯމަލައިޒިން ކޮމިޓީން އެދޭ އެދުން، ހާއްސަކޮށް ކްލަބްތަކާ ގުޅުންހުރި ކަންތައްތަކުގައި އަޅުގަނޑުމެންނާ ވާހަކަދެކެވެމުން އެބަދޭ. ކްލަބްތަކުގެ ފައިނޭންސް މައްސަލަ ހައްލުކުރުމަށްޓަކައި މިނިސްޓްރީން ކުރެވެން އޮތް ކަމެއް މިނިސްޓްރީން ކޮށްދެމުން ގެންދާނެ،" ރާފިއު ވިދާޅުވި އެވެ.

ފާހަގަކޮށްލެވޭ - އެފްއޭއެމް އިންތިހާބު ނުބޭއްވި މައްސަލަގަނޑެއްގެ ތެރެއަށް ދިއުމުން ފީފާއިން ނިންމީ ނޯމަލައިޒޭޝަން ކޮމިޓީއެއްގެ ބެލުމުގެ ދަށުން ވަގުތީ ގޮތުން އެތަން ހިންގާށެވެ. މި ކޮމިޓީގެ މައިގަނޑު ޒިންމާއަކީ އާ އިންތިހާބެއް ބޭއްވުމެވެ.

ފީފާއިން ނެގި ފަސް މެމްބަރުންގެ ނޯމަލައިޒޭޝަން ކޮމިޓީގައި ޒުހޫރުގެ އިތުރުން ހިމެނެނީ ގާނޫނީ ވަކީލް އަހުމަދު މުއިއްޒު، ފަރީހާ ޝަރީފް، އިސްމާއިލް ސައިމަން އަދި އަހުމަދު އަލީ އެވެ.

ފީފާއިން ކުރިން ބުނި ގޮތުގައި އެފްއޭއެމްގެ އަސާސީ ގަވާއިދު އިސްލާހުކޮށް، އާ އިންތިހާބެއް 31 ޖުލައި 2025ގެ ކުރިން ބޭއްވުމަކީ ނޯމަލައިޒޭޝަން ކޮމިޓީގެ ޒިންމާއެކެވެ.

އެފްއޭއެމްގައި ކުރީގެ މެނޭޖްމަންޓުން ހިންގި ކަމަށް ތުހުމަތުކުރެވޭ ހިޔާނާތުގައި ގެއްލުނު ފައިސާ ހޯދުމުގެ މަސައްކަތް ވެސް އާ ކޮމިޓީން ކުރަން ޖެހެ އެވެ.