ފަލަސްތީނަށް ފޮނުވާ މަސްދަޅުތަކުގެ ފުރަތަމަ ޝިޕްމަންޓު އާދިއްތަ ދުވަހު ފޮނުވަނީ

ރާއްޖެއިން ފަލަސްތީނުގެ ރައްޔިތުންނަށް ފޮނުވަން ނިންމާފައިވާ ދެ މިލިއަން މަސްދަޅުގެ ފުރަތަމަ ޝިޕްމަންޓު އަންނަ އާދިއްތަ ދުވަހު ފޮނުވާނެ ކަމަށް ރައީސް އޮފީހުން މިއަދު ބުނެފި އެވެ.

ވީ ކިހިނެއް؟ - ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމެއްގައި އެ އޮފީހުގެ ތަރުޖަމާނު ހީނާ ވަލީދު ވިދާޅުވީ އެ މަސްދަޅުތައް ފޮނުވަން ހަމަޖެހިފައިވަނީ ދެ ޝިޕްމަންޓަކަށް ބަހާލައިގެން ކަމަށެވެ.

ތަފްސީލް - ހީނާ ވިދާޅުވީ އާދިއްތަ ދުވަހު ފޮނުވާ ޝިޕްމަންޓް ފަލަސްތީނަށް ލިބޭނީ 40 ދުވަސް ފަހުން ކަމަށެވެ. 

އެ މަސްދަޅުތައް ފޮނުވާނީ މިސްރުގެ ރެޑް ކްރެސެންޓް މެދުވެރިކޮށެވެ. އޭގެ ފަހުން މިސްރުގެ ރެޑް ކްރެސެންޓުން ފަލަސްތީނުގެ ރެޑްކްރެސެންޓާ ހަވާލުކުރަން ނިންމާފައިވާ ކަމަށް ވެސް ހީނާ ވިދާޅުވި އެވެ.

އެނގުން މުހިންމު - ރާއްޖޭން ފަލަސްތީނަށް ހަދިޔާކުރަން ނިންމާފައިވާ ދެ މިލިއަން މަސްދަޅަކީ މިދިޔަ އޮކްޓޫބަރު މަހު ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ފޮނުވަން ނިންމާފައިވާ މަސްދަޅުތަކެކެވެ.

އެ މަސްދަޅުތައް ފޮނުވުން ލަސްވެގެން ގިނަ ބަޔަކު ކަންބޮޑުވުން ފާޅުކުރުމުން މިދިޔަ ފެބްރުއަރީ މަހު ސަރުކާރުން ބުނީ އެ ގައުމަށް އެއްޗެހި ފޮނުވުމުގައި ދަތިތަކެއް ހުރެގެން ފޮނުވުން ލަސްވަނީ ކަމަށެވެ.

ފާހަގަކޮށްލެވޭ - ފަލަސްތީނު ރައްޔިތުންނަށް އެހީތެރިކަން ފޯރުކޮށްދިނުމަށް ސަރުކާރުން ކުރިއަށް ގެންދިޔަ 'ފަލަސްތީނާ އެކު ދިވެހިން' ޓެލެތޯންއަށް ލިބުނު 19 މިލިއަނަށް ވުރެ ގިނަ ރުފިޔާ، ހާލުގައި ޖެހިފައިވާ ފަލަސްތީނު މީހުންނަށް އެހީވާ އދ.ގެ ޖަމާއަތް ކަމަށްވާ އަންރުވާއަށް ވަނީ ފޮނުވާފަ އެވެ. އެ ފައިސާ ފޮނުވާފައިވަނީ މިދިޔަ މަހުގެ ތެރޭގަ އެވެ.