ހދ. ހިރިމަރަދޫ ކައުންސިލަރުންނާއި ކައުންސިލްގެ މުވައްޒަފުން ލޯކަލް ގަވަނަންސް މިނިސްޓްރީގައި. (ފޮޓޯ/ލޯކަލް ގަވަނަންސް މިނިސްޓްރީ)
ހދ. ހިރިމަރަދޫ މީހުން ކ. ތުލުސްދުއަށް ބަދަލުކޮށްދޭން އެދިއްޖެ
ހދ. ހިރިމަރަދޫގައި ދިރިއުޅޭ މީހުން އެ ރަށުން ކ. ތުލުސްދުއަށް ބަދަލުކޮށްދިނުމަށް އެދި ލޯކަލް ގަވަނަންސް މިނިސްޓްރީއާ މަޝްވަރާކޮށްފި އެވެ.
ވީ ކިހިނެއް؟ - ލޯކަލް ގަވަނަންސް މިނިސްޓަރު އާދަމް ޝަރީފް އާއި ހިރިމަރަދޫ ކައުންސިލްގެ މެންބަރުންނާ މިއަދު މާލޭގައި ބައްދަލުކުރެއްވި އެވެ.
ތަފްސީލް - އެ ބައްދަލުވުމުގެ ފޮޓޯތަކާ އެކު މިނިސްޓަރު ވަނީ ކައުންސިލުން ބޭނުންވާ ގޮތް 'އެކްސް'ގައި ޕޯސްޓްކުރައްވައިފަ އެވެ. އެ ގޮތުން:
-
އެއީ ހިރިމަރަދޫގައި ދިރިއުޅޭ މީހުންގެ ނިންމުމެއް ކަމަށް ކައުންސިލާ ހަވާލާދެއްވައި މިނިސްޓަރު ވިދާޅުވި
-
ރަށު މީހުންގެ ނިންމުމަކީ ކ. އަތޮޅުގެ ވެރިރަށް ތުލުސްދުއަށް ބަދަލުކޮށްދިނުން ކަމަށް ވެސް މިނިސްޓަރު ވިދާޅުވި
އެނގުން މުހިންމު - ހިރިމަރަދުއަކީ ހދ. އަތޮޅުގައި މީހުން މަދު އެއް ރަށެވެ. އެ ގޮތުން:
-
އެންމެ ފަހުން ނެގި 2022ގެ ބޯހިމެނުމުން ދައްކާ ގޮތުގައި ރަށުގައި ދިރިއުޅެނީ 293 މީހުން
-
ދިރިއުޅޭ މީހުންގެ ތެރެއިން ދިވެހިންގެ އަދަދަކީ 260 މީހުން
-
ހިރިމަރަދޫ ރަޖިސްޓްރީގައި ހިމެނޭ މީހުންގެ އާބާދީއަކީ 584 މީހުން
HDh Hirimaradhoo rayyithun ehen rashakah badhaluvumah rayyithun nimmaafaivaakamah miadhuge badhdhaluvumugai council ge members vidhaalhuvi. Adhi, Rayyithun beynunvanee K.Thulusdhoo ah kan faahaga kurevvi. pic.twitter.com/0CVIQ0qZOj
— Adam Shareef Umar (@Adamshareefz) September 9, 2024
ފާހަގަކޮށްލެވޭ - ހދ. އަތޮޅުގައި މި ގޮތަށް އާބާދީ ކުޑަ ރަށްރަށުން މީހުން އެންމެ ފަހުން ފޭބީ 2011ގަ އެވެ. އޭރުގެ ސަރުކާރުގެ ނިންމުމެއްގެ ދަށުން، އެ އަތޮޅު މާވައިދޫ، ކުނބުރުދޫ އަދި ފަރިދޫ މީހުން ބަދަލުކުރީ އެ އަތޮޅު ނޮޅިވަރަންފަރަށެވެ.