އަޝްފާގު މަޖިލިސް ރައީސްގެ ގޭގެ އިސް މަގާމަކަށް ހަމަޖައްސައިފި

ރައްޔިތުންގެ މަޖިލީހުގެ ރައީސްގެ ރަސްމީ ގެ، މުރައިދޫގޭގެ އިސް މަގާމަކަށް ރާއްޖޭގެ އެންމެ މޮޅު ފުޓްބޯޅަ ޝަހުސިއްޔަތު އަލީ އަޝްފާގު (ދަގަޑޭ) ހަމަޖައްސައިފި އެވެ.

ވީ ކިހިނެއް؟ - އިތުބާރުހުރި މަސްދަރަކުން 'ދައުރު'އަށް ކަށަވަރުވެފައިވާ ގޮތުގައި އަޝްފާގު ހަމަޖައްސާފައި ވަނީ މުރައިދޫ ގޭގެ ޑިރެކްޓާ ޖެނެރަލްގެ މަގާމަށެވެ. 

ތަފްސީލް - އަޝްފާގު އެ ގޭގައި ކުރައްވާނެ މަސައްކަތަކީ މަޖިލީހުގެ ރައީސްގެ ގެއާ ގުޅުންހުރި ޕްރޮޓޯކޯލްގެ މަސައްކަތްތައް ކަމަށް ވެސް 'ދައުރު'އަށް އެނގިފައިވެ އެވެ. އޭނާ އެ މަގާމަށް ހަމަޖެއްސީ މިދިޔަ މަހުގެ ކުރީކޮޅުގަ އެވެ. 

އަޝްފާގަށް އެ މަގާމުގެ މުސާރަ އާއި އެލަވަންސުގެ ގޮތުގައި ދޭ އަދަދެއް އަދި ސާފުވާގޮތެއް ނުވެ އެވެ. 

ފާހަގަކޮށްލެވޭ - މި ސަރުކާރު އައިފަހުން ރާއްޖޭގެ ޓޫރިޒަމް ޕްރޮމޯޓް ކުރަން އެމްބެސެޑަރެއްގެ ގޮތުގައި ވެސް އަޝްފާގު ވަނީ ހަމަޖައްސައިފަ އެވެ. އެމްބެސެޑަރަކަށް އޭނާ ހަމަޖައްސާފައި ވަނީ މަހަކު 30،000ރ. ރުފިޔާގެ ފީއެއްގަ އެވެ. 

ގުޅުންހުރި - މުރައިދޫގޭގެ ވެރިޔާ ނުވަތަ ޗީފް އޮފް ސްޓާފަކަށް ތަޖުރިބާކާރު ނޫސްވެރިޔާ އާދަމް ހަލީމް (މުންޑޫ އާދަމް ހަލީމް) ވެސް މިދިޔަ ޖުލައި މަހުގެ ފަހުކޮޅު ހަމަޖައްސާފައިވެ އެވެ. 

އެނގުން މުހިންމު - މުރައިދޫ ގެއަށް މަޖިލިސް ރައީސް، އަބްދުއްރަހީމް އަބްދުﷲ ބަދަލުވެވަޑައިގެންފައި ވަނީ މިދިޔަ ޖުލައި 25ގަ އެވެ. 

މަޖިލީހުގެ ރައީސް ހުންނަވަން ހާއްސަ ގެއެއް ދައުލަތުން ކަނޑައަޅާ ގޮތަށް ހަމަޖެއްސީ މަޖިލީހުގެ ރައީސްއަކަށް ހުންނަވަނިކޮށް ކުރީގެ ރައީސް މުހައްމަދު ނަޝީދު އަވަހާރަކޮށްލަން 9 މޭ 2021ގައި ދިން ބޮމުގެ ހަމަލާއަށް ފަހު އެވެ. 

މުރައިދޫ ގޭގައި ނަޝީދު ދުވަސްކޮޅަކަށް ހުންނެވި ނަމަވެސް ފަހުން އެގެއިން ބަދަލުވެ ވަޑައިގެންނެވި އެވެ. އަދި އެއަށް ފަހު މަޖިލީހުގެ ރައީސްކަން ކުރެއްވި ހިތަދޫ އުތުރު ދާއިރާގެ މެންބަރު މުހައްމަދު އަސްލަމް އެ ގޭގައި ދިރިނޫޅުއްވަ އެވެ.