ވެލާނާ އިންޓަނޭޝަނަލް އެއާޕޯޓުގެ ވެލްކަމް މޮނިއުމަންޓް. (ފޮޓޯ/އެމްއޭސީއެލް)
އަންނަ އަހަރު ޖެނުއަރީގެ ނިޔަލަށް އެމްއޭސީއެލް އާއި އާރުއޭސީއެލް އެއްކޮށްލެވޭނެ: ސަރުކާރު
ސަރުކާރުގެ ހަރަދު ކުޑަކުރުމުގެ ސިޔާސަތުގެ ދަށުން އަންނަ އަހަރުގެ ޖެނުއަރީ މަހުގެ ނިޔަލަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއި ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރުއޭސީއެލް) އެއްކޮށްލެވޭނެ ކަމަށް ސަރުކާރުން މިއަދު ބުނެފި އެވެ.
ވީ ކިހިނެއް؟ - އެކަމަށް ޓާގެޓުކޮށްފައިވާ ތާރީހު ވިދާޅުވީ، ސަރުކާރުގެ މަސައްކަތްތަކާ ބެހޭ ގޮތުން މައުލޫމާތު ދިނުމަށް މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން، އިކޮނޮމިކް މިނިސްޓަރު މުހައްމަދު ސައީދު އެވެ.
އޭނާ ވިދާޅުވީ ހަރަދު ކުޑަކޮށް ހިންގުން ހަރުދަނާ ކުރުމުގެ ގޮތުން އެމްއޭސީއެލް އާއި އާރުއޭސީއެލް އެއްކޮށްލުމަށް ނިންމާ، އެކަން ކުރާނެ ތާރީހު ވެސް މިއަދުގެ ކެބިނެޓް ބައްދަލުވުމުގައި ނިންމާފައިވާ ކަމަށެވެ.
"އެހެންވީމާ 31 ޖެނުއަރީ 2025 އަށް ދާއިރުގައި މި މަސައްކަތް އިރާދަކުރެއްވިއްޔާ ނިމިފައި އޮންނާނީ ކޯޕަރޭޓް ގަވަނެންސްގެ އުސޫލުން، ދެ ކުންފުނިން ނިންމަންޖެހޭ ނިންމުންތަކާއި އެޑްމިނިސްޓްރޭޓިވް މަސައްކަތްތައް،" އޭނާ ވިދާޅުވި އެވެ.
ސައީދު ވިދާޅުވީ އެކަމުގެ ސަބަބުން ވަރަށް ގިނަ ފައިސާ ސަލާމަތް ކުރެވޭނެ ކަމަށާއި ދެ ކުންފުންޏަށް ވެސް ބޮޑެތި ކުރިއެރުންތަކެއް އަންނާނެ ކަމަށެވެ. އެގޮތުން، އެ މަސައްކަތުގެ ތެރެއިން ހދ. ހަނިމާދޫ އިންޓަނޭޝަނަލް އެއާޕޯޓު ހިމެނޭހެން މުޅިއެކު އަށް އެއާޕޯޓު އެއްކޮށްލެވިގެން ދާނެ ކަން ވެސް ފާހަގަކުރެއްވި އެވެ.
އެނގުން މުހިއްމު - އެމްއޭސީއެލް އިން މިވަގުތު ބަލަހައްޓަމުންދަނީ ހަމައެކަނި ވެލާނާ އިންޓަނޭޝަނަލް އެއާޕޯޓެވެ. ރާއްޖޭގެ ހަ އެއާޕޯޓެއް ހިންގަނީ އާރުއޭސީއެލް އިންނެވެ.
ފާހަގަކޮށްލެވޭ - އެމްއޭސީއެލް އާއި އާރުއޭސީއެލްގެ އިތުރުން ވެސް ސަރުކާރުގެ ކުންފުނިތައް އިސްލާހު ކުރުމަށް އަޅާ ފިޔަވަޅުތަކުގެ ތެރެއިން އިތުރު ކުންފުނިތަކެއް ވެސް އެއްކޮށްލަން މިއަދުގެ ކެބިނެޓު ބައްދަލުވުމުގައި ވަނީ ނިންމާފަ އެވެ. އޭގެތެރޭގައި:
-
ބިޒްނަސް ސެންޓާ ކޯޕަރޭޝަން (ބީސީސީ) އާއި ފަންޑް މެނޭޖްމަންޓް ކޯޕަރޭޝަން އެއްކޮށްލަން
-
ފްލެޓްތައް އިމާރާތް ކުރުމުގެ މަސައްކަތް ކުރާ ފަހި ދިރިއުޅުން ކޯޕަރޭޝަން (އެފްޑީސީ) ހުޅުމާލެ ބަލަހައްޓާ އެޗްޑީސީގެ ދަށަށް ބަދަލުކުރަން