ބަންގްލަދޭޝްގެ ޗިޓަގޮންގް މެޑިކަލް ކޮލެޖް ހޮސްޕިޓަލް (ސީއެމްސީއެޗް).
ބަންގަލްދޭޝްގައި 2 ދިވެހި ޑޮކްޓަރުންނަށް ހަމަލާ ދީފި
ބަންގްލަދޭޝްގެ ޗިޓަގޮންގް މެޑިކަލް ކޮލެޖު ހޮސްޕިޓަލް (ސީއެމްސީއެޗް)ގައި އިންޓާންޝިޕް ހަދަމުން ދިޔަ ދެ ދިވެހި ޑޮކްޓަރަކަށް ބަޔަކު އިއްޔެ ހަމަލާދީފި އެވެ.
ވީ ކިހިނެއް؟ - އެތަނުން އެއް ޑޮކްޓަރުގެ އާއިލާގެ މެމްބަރެއްގެ ފަރާތުން އެނގިފައިވާ ގޮތުގައި، އެ ހާދިސާ ހިނގާފައިވަނީ، ދެ ޑޮކްޓަރުން ވެސް ވޯޑުގައި ޑިއުޓީގައި ތިބި ވަގުތެއްގަ އެވެ. އެގޮތުން:
-
ދެ ޑޮކްޓަރުން އެކުގައި ދިޔައީ މަރުވެފައިވާ ބަލިމީހެއްގެ އައިޑީ ކާޑު ހޯދުމަށް
-
ވޯޑާ ދިމާލަށް ހިނގާފައި ދަނިކޮށް، މަރުވެފައިވާ މީހާގެ އާއިލާގެ ފަސް ވަރަކަށް މެމްބަރުން އައިސް، އޭނާ މަރުވީ އެތަނުން އެއް ޑޮކްޓަރު ގޯސް އިންޖެކްޝަނެއް ޖެހުމުން ކަމަށް ތުހުމަތުކޮށް ހަޅޭއްލަވަން ފެށި
-
ނަމަވެސް، އެ ޕޭޝަންޓު ގަޔަށް އެތަނުން އެއްވެސް ޑޮކްޓަރެއް އިންޖެކްޝަނެއް ޖަހާފައެއް ނުވޭ؛ އާއިލާ މީހުން ކައިރި ވެސް އެހެން ބުނެ، ހޮސްޕިޓަލުގައި ތިބި ސީނިއާ ޑޮކްޓަރުންނާ ވާހަކަ ދައްކަން އެދުނު
-
ނަމަވެސް އާއިލާގެ މީހުން އިތުރަށް ރުޅި ގަދަވެ، އެތަނުގައި ހުރި އަންހެނަކު އެއް ޑޮކްޓަރުގެ ގައިގައި ތަކުރާރުކޮށް ޖަހާފައިވޭ؛ އަނެއް ޑޮކްޓަރުގެ އަތުގައި ހިފާ ގަދަކަމުން ދަމާފައި ގެންދަން މަސައްކަތް ކޮށްފައި ވެސް ވޭ
-
އެ މަންޒަރު ސީނިއާ ޑޮކްޓަރުންނަށް ފެނުމުން ދެ ޑޮކްޓަރުންގެ ރައްކާތެރިކަމަށްޓަކައި ސްޓޯރޫމަށް ގެންދިޔަ؛ ކަންކަން ހަމައަކަށް އެޅެންދެން ދެ ޑޮކްޓަރުން ވެސް ތިބީ އެތަނުގައި
-
ޑޮކްޓަރުންނަށް ހަމަލާ ދިން އަންހެން މީހާ ވަނީ ފަހުން އެކަމަށް އިންކާރުކޮށް، ޑޮކްޓަރުން ދޮގު ހަދަނީ ކަމަށް ބުނެ ވަރަށް ހުތުރު ބަހުން ވާހަކަ ދައްކާފައި
ފާހަގަކޮށްލެވޭ - މި ހާދިސާ ހިނގާ ދިޔަ އިރު ހޮސްޕިޓަލުގެ ސެކިއުރިޓީ ސްޓާފުން ތިބީ ހަޅުތާލުގަ އެވެ. އެހެންކަމުން، ސެކިއުރިޓީ ފޯރުކޮށްދޭނެ ބަޔަކު އެވަގުތު ނެތެވެ.
ބުނީ ކީކޭ؟ - އެ ހާދިސާއާ ގުޅިގެން ސުވާލު ކުރުމުން ފޮރިން މިނިސްޓްރީގެ މީޑިއާ އޮފިޝަލް 'ދައުރު'އަށް ވިދާޅުވީ، އެކަން މިނިސްޓްރީގެ ސަމާލުކަމަށް އައިސްފައިވާ ކަމަށާއި ދެ ޑޮކްޓަރުންގެ ހާލު ވެސް ރަނގަޅު ކަމަށެވެ. އެ ހާދިސާއާ ގުޅިގެން ކަންކަން ހިނގަމުންދާ ގޮތް މިނިސްޓްރީން ދަނީ މޮނިޓާ ކުރަމުންނެވެ.
އަދި ދަރިވަރުންނަށް ސެކިއުރިޓީ ފޯރުކޮށްދިނުމަށް ހައި ކޮމިޝަން މެދުވެރިކޮށް ހޮސްޕިޓަލުގައި މިހާރު އެދިފައިވާ ކަމަށް ވެސް މިނިސްޓްރީގެ ފަރާތުން ބުންޏެވެ.
'މިކަން ސިޔާސީ ނުކުރައްވާ'
މި ހާދިސާގެ ވާހަކަ ސޯޝަލް މީޑިއާ އާއި ހަބަރުތަކުގައި އެކި ގޮތަށް ދެކެވެމުންދާތީ، މިކަން ސިޔާސީ ނުކުރުމަށް ސީއެމްސީއެޗްގައި އިންޓާންޝިޕް ހަދަމުންދާ ޑޮކްޓަރުން ވަނީ އެދިފަ އެވެ. އެ ޑޮކްޓަރުންގެ ފަރާތުން މިއަދު ނެރެފައިވާ ބަޔާނެއްގައި ބުނެފައިވާ ގޮތުގައި:
-
މި ހާދިސާ އަކީ ރާއްޖެއިން ބަންގްލަދޭޝް މަސައްކަތްތެރިން ޑީޕޯޓު ކުރަމުން ދިޔުމާ އެއްވެސް ގުޅުމެއް އޮތް ކަމެއް ނޫން؛ މި ހާދިސާއާ ގުޅުވައިގެން ނަސްލީ ތަފާތު ކުރުމާއި ޒެނޮފޯބިކް ވާހަކަ ނުދައްކަން އެދުނު
-
ޑިއުޓީގައި އެވަގުތު ބަންގްލަދޭޝް ޑޮކްޓަރުން ތިބި ނަމަ އެމީހުންނަށް ވެސް ހަމަ އެ ހާދިސާ ކުރިމަތިވާނެ؛ އެގަޑީގައި ދިވެހި ޑޮކްޓަރުންތަކެއް ޑިއުޓީގައި ތިބުމަކީ އިއްތިފާގުން ވީކަމެއް
-
މި މައްސަލަ ދިމާވެފައިވަނީ ވޯޑުގައި އެކަށީގެންވާ ވަރަށް ސެކިއުރިޓީ ނެތުމުން؛ ކުރިއަށް އޮތް ދުވަސްތަކުގައި ސެކިއުރިޓީ ސްޓާފުން އިތުރުކޮށްދޭނެ ކަމަށް ހޮސްޕިޓަލުގެ ޑިރެކްޓަރު ވަނީ ބުނެފައި