ވިޔަފާރިތަކަށް ލިބޭ ޑޮލަރު ބޭންކަށް މާރުކުރަން ޖެހޭ ގޮތަށް ގަވައިދު ބަދަލުކުރާނަން: ރައީސް

ރާއްޖޭގައި ހިންގާ ވިޔަފާރިތަކަށް ބޭރު ފައިސާއިން ނުވަތަ ޑޮލަރުން އަމްދަނީ ލިބޭ ކުންފުނިތަކުން ބްލެކް މާކެޓްގައި އެ ފައިސާ މާރުކުރުން ހުއްޓުވައި، ބޭންކަށް މާރުކުރަން މަޖުބޫރުވާ ގޮތަށް އެމްއެމްއޭގެ ގަވައިދުތައް ބަދަލުކުރާނެ ކަމަށް ރައީސް މުހައްމަދު މުއިއްޒު މިރޭ ވިދާޅުވެއްޖެ އެވެ.

ވީ ކިހިނެއް؟ - ރައީސް މިގޮތަށް ވިދާޅުވީ މިރޭ ޕީއެންސީގެ ރަސްމީ ހަރުގޭގައި ބޭއްވި ޖަގަހަ ޖަލްސާގައި ޑޮލަރުގެ ތާށިކަން ހައްލުކުރަން އަޅަން އިއްޔެ ކެބިނެޓުން ނިންމި ބައެއް ނިންމުންތަކުގެ ތަފްސީލު ދެއްވަމުންނެވެ.

އެ ނިންމުންތަކާ ގުޅޭ ބައެއް ކަންކަން އިއްޔެ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ހާމަކޮށްފައިވާއިރު، ރައީސް ވިދާޅުވި ގޮތުގައި ޑޮލަރު މައްސަލަ ހައްލު ކުރުމަށް އެމްއެމްއޭގެ ބައެއް ގަވައިދުތަކަށް ބަދަލު ގެންނަން އެ އިދާރާއަށް މިހާރު ލަފާދެއްވާފައިވާ ކަމަށެވެ.

ރައީސް ވިދާޅުވި ގޮތުން އިސްލާހުކުރަން ނިންމި ގަވައިދުތަކުގެ ތެރޭގައި ހިމެނެނީ:

 ބުނީ ކީކޭ؟ - "އަޅުގަނޑުމެންގެ ރާއްޖޭގައި ބޭރު ފައިސާއިން އާމްދަނީ ލިބޭ ވަރަށް ގިނަ ވިޔަފާރިތައް އެބަ ހިންގާ. މަނީ ޗޭންޖާސް ރެގިއުލޭޝަންއަށް ގެނެވޭ ބަދަލުގެ ސަބަބުން އެ ފައިސާ ބްލެކް މާކެޓްގައި މި މާރުކުރާ މާރުކުރުން ނިމުމަކަށް އައިސް، ބޭންކަށް މާރުކުރުން މަޖުބޫރުވާނެ،" ރައީސް ވިދާޅުވި އެވެ.

ތަފްސީލު - ރައީސް ވިދާޅުވީ އެމްއެމްއޭގެ ގަވައިދުތަކަށް މި ގެންނަ އިސްލާހުތަކުގެ ސަބަބުން "ވަރަށް ގިނަ މީހުން ރުޅި އަތުވެދާނެ" ކަމަށެވެ. ނަމަވެސް އެމަނިކުފާނު ހުންނެވީ "ރައްޔިތުންގެ ފަޅީގައި" ކަމަށް ވިދާޅުވި އެވެ.

އިތުރަށް ގެންނަން ނިންމާފައިވާ އިސްލާހުތަކާ ގުޅޭ ގޮތުން ރައީސް ވިދާޅުވީ:

ރައީސް ވިދާޅުވި ގޮތުގައި މި ނިންމުންތަކުގެ ފައިދާކުރަން ވަގުތު ނަގާނެ އެވެ. މިކަންކަމުގައި ރައްޔިތުންގެ އެއްބާރުލުމަށް ވެސް އެދިވަޑައިގެންނެވި އެވެ.

"ގިނައިން ބޭރު މީހުން މަނީ އެކްސްޗޭންޖްތައް ހިންގަނީ ވެސް. މި ތަންތަނުން މި ދެންނެވި ބަދަލުތައް ގެނައިމަ، ބޭންކުން އިއުލާންކުރާ ބޭންޑުތަކަށް ވުރެ މަތިން ޑޮލަރު މާރުކުރަން އުޅޭ ނަމަ، ރައްޔިތުން އެތަންތަނަށް ނުދިޔައިމަ ނިމުނީ. އެއަށް ވުރެ މާ ރަނގަޅަށް ރެގިއުލޭޓް ވެގެން އޭރަށް ޑޮލަރު ލިބޭނެ،" ރައީސް ވިދާޅުވި އެވެ.

"އެހެންވީމަ، ހުރިހާ އެންމެންގެ އެއްބާރުލުން ލިބޭ ނަމަ، އެންމެން އެކަކު އަނެއްކަކަށް ކޮށްދޭ ކަމެއް މިއީ. ވިޔަފާރިވެރިންނާއި އާންމު ފަރާތްތަކުގެ އެއްބާރުލުން ދޭކަމުގައިވާ ނަމަ، ޑޮލަރުގެ ބެލެކް މާކެޓް ވަރަށް ބޮޑު ތަނުން ހަމައަކަށް އެޅުވި، ޑޮލަރު ރޭޓް ހިފަހެއްޓި، ކުޑަކުރެވި، ބޭންކް ތެރޭގައި ޑޮލަރުގެ ރިޒާވް ގިނަކުރެވި، ކަންތައްތަކެއް ވާނެ."

ކެބިނެޓްގެ ބައްދަލުވުމަށް ފަހު އިއްޔެ ބޭއްވި ނޫސްވެރިންގެ ބައްދަލުވުމުގައި ހާމަކުރި ނިންމުންތައް ވެސް ރައީސް މިރޭ ތަކުރާރުކުރެއްވި އެވެ. އޭގެ ތެރޭގައި ހިމެނެނީ:

"މިއީ ޑޮލަރުގެ އާމްދަނީ ލިބޭ ފަރާތްތަކަށް [އަޅާ ފިޔަވަޅުތައް]. އާންމު ރައްޔިތުންނަށް އެއްވެސް ދައްޗެއް ނުވާނެ. ޑޮލަރުގެ އާމްދަނީ ލިބޭ، ޑޮލަރުން ވިޔަފާރިކުރާ ފަރާތްތަކަށް ވެސް ލިބޭ ފަސޭހައެއް އެއީ. މާކެޓަށް ގޮސް ބޮޑު ރޭޓުން މާރުކޮށް ރުފިޔާ ހޯދައިގެން ދައްކަން ޖެހޭ ދެއްކުމަށް ވެސް ފަސޭހަވާނެ،" ރައީސް ވިދާޅުވި އެވެ.

ގުޅުން ހުރި - މިރޭގެ ޖަލްސާގައި ރައީސް ވަނީ ބީއެމްއެލްއިން ރުފިޔާ ކާޑުން ޑޮލަރުން  ނުކެނޑޭ ގޮތަށް އިއްޔެ ހެނދުނު ނިންމައި، އެއާ އެކު ހިނގައިދިޔަ ކަންކަމަކީ 'މާލީ ބަގާވާތެއް' ކަމަށް ސިފަކުރައްވައިފަ އެވެ. އެމަނިކުފާނު ވިދާޅުވި ގޮތުގައި "ހަމަ ބުއްދިން ވިސްނާލި ކޮންމެ މީހަކަށް ވެސް އެއީ ގެންނަން އުޅުނު ބަގާވާތެއްކަން އެނގެނޭ" އެވެ.