ޑޮލަރު ލިބޭ ކުންފުނިތަކުން ދައުލަތަށް ޑޮލަރު ދައްކަން ލާޒިމްކުރަނީ

ރާއްޖެއަށް މިހާރު ކުރިމަތިވެފައިވާ ޑޮލަރުގެ ދަތިކަން ހައްލުކުރުމަށް، ކަމާ ގުޅޭ ބައެއް ގާނޫނުތަކަށް ބަދަލު ގެނެސް، ޑޮލަރުން އާމްދަނީ ލިބޭ ކުންފުނިތަކުން ދައުލަތަށް ދައްކަން ޖެހޭ ފައިސާ ޑޮލަރުން ދައްކާ ގޮތަށް ހެދުމަށް ނިންމާފައިވާ ކަމަށް ބަންޑާރަނައިބު އަހްމަދު އުޝާމް މިއަދު ވިދާޅުވެއްޖެ އެވެ.

ވީ ކިހިނެއް؟ - ބޭންކް އޮފް މޯލްޑިވްސް (ބީއެމްްއެލް) އިން މިއަދު ވަނީ، ޑޮލަރު ލިބުން ދަތިވެ ބޭރުގައި ވިޔަފާރިކުރަން ދީފައިވާ ކާޑް ލިމިޓްތަކަށް ބަދަލުތަކެއް ގެނެސްފަ އެވެ. އެގޮތުން ބީއެމްއެލްގެ ރުފިޔާ އެކައުންޓުތަކަށް ދޫކޮށްފައިވާ ޑެބިޓް ކާޑްތަކާއި އާ ކްރެޑިޓް ކާޑުތަކުން ރާއްޖެއިން ބޭރުގެ މުއާމަލާތްތައް ނުކުރެވޭ ގޮތަށް ހަމަޖެއްސުމަށް ފަހު، ފަހުން ވަނީ އެ ބަދަލު އަނބުރާ ގެނެސްފަ އެވެ.

ތަފްސީލް - ރައީސް އޮފީހުގައި މިއަދު ބޭއްވި ދިގު ކެބިނެޓް ބައްދަލުވުމަށް ފަހު ނޫސްވެރިންނާ ވާހަކަ ދައްކަވަމުން އުޝާމް ވިދާޅުވީ، އެ ބައްދަލުވުމުގައި، ރާއްޖެއަށް ދިމާވެފައިވާ ޑޮލަރުގެ ދަތިކަމަށް ހައްލެއް ގެނައުމަށް ބައެއް ގާނޫނުތަކަށް ގެންނަން ޖެހޭ އިސްލާހުތަކާ ގުޅޭ ގޮތުން މަޝްވަރާކޮށް، ބައެއް ބަދަލުތައް ގެންނެވި ކަމަށެވެ.

އެގޮތަށް ނިންމީ، އުޝާމް ވިދާޅުވި ގޮތުގައި، ޑޮލަރުން އާމްދަނީ ލިބޭ ބައެއް ކުންފުނިތަކުން ދައުލަތަށް ފައިސާ ދައްކާއިރު އަދި މީރާއަށް ޓެކްސް ކުންފުނިތަކުން ދައްކާއިރު ރުފިޔާއިން އެ މުއާމަލާތްތައް ހިންގާތީ އެވެ.

މިއަދުގެ ކެބިނެޓް ބައްދަލުވުމުގައި ގެންނަން ނިންމި ބަދަލުތަކުގެ ތެރޭގައި ހިމެނެނީ، އުޝާމް ވިދާޅުވި ގޮތުގައި:

އުޝާމް ވިދާޅުވި ގޮތުގައި، ޑޮލަރުން މުސާރަ ދޭ ބައެއް ކުންފުނިތައް، ޕެންޝަނަށް ފައިސާ ދައްކަނީ ރުފިޔާއިންނެވެ. އަދި މި މުއާމަލާތް ހިންގާ ގޮތަށް ބޮޑު ބަދަލެއް ގެންނަން ނިންމީ، ދައުލަތަށް ދައްކަން ޖެހޭ ފައިސާ ރުފިޔާއިން ދެއްކުމަށް، އެ ކުންފުނިތަކުން ކަޅު ބާޒާރުގައި ޑޮލަރު މާރުކުރާ ޝަކުވާ ވެސް ވަރަށް ގިނައިން ލިބޭތީ ކަމަށް އޭނާ ވިދާޅުވި އެވެ.

އުޝާމް ވިދާޅުވީ ޑޮލަރުގެ މައްސަލައަށް ހައްލު ގެނައުމަށް، އެ ބަދަލުތައް ގެނައުމަށް ގާނޫނުތަކަށް ބަދަލު ގެންނަން ޖެހޭ ނަމަ، ރައްޔިތުންގެ މަޖިލީހަށް ހުށަހަޅައިގެން ކުރިއަށް އޮތް ހަފުތާއެއް ނުވަތަ ދެ ހަފުތާ ތެރޭގައި އެކަން ނިންމަވާނެ ކަމަށެވެ.