އިގްތިސާދީ ދަތިތަކުން އަރައިގަންނާނެ ގޮތް ރައްޔިތުންނަށް ސާފުކޮށްދޭން ޖެހޭ: ނަޝީދު

ރާއްޖޭގެ މާލީ ހާލަތު މި ހިސާބަށް ދިޔަ ގޮތާއި ދެން ވެދާނެ ކަމަށް ލަފާކުރެވޭ ގޮތް އަދި މި ހާލަތުން އަރައިގަތުމަށް ސަރުކާރުން ރާވާފައިވާ ގޮތް ރައްޔިތުންނަށް ސާފުކޮށްދޭން ޖެހޭ ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

ވީ ކިހިނެއް؟ - ގައުމީ ބޭންކު، ބޭންކް އޮފް މޯލްޑިވްސް (ބީއެމްއެލް) އިން މިއަދު ވަނީ ޑޮލަރު ލިބުން ދަތިވެ، ބީއެމްއެލްގެ ރުފިޔާ އެކައުންޓުތަކަށް ދޫކޮށްފައިވާ ޑެބިޓް ކާޑްތަކާއި އާ ކްރެޑިޓް ކާޑުތަކުން ރާއްޖެއިން ބޭރުގައި މުއާމަލާތް ނުކުރެވޭ ގޮތް ހަދާފަ އެވެ.

ތަފްސީލް - އެކަމާ ގުޅިގެން ނަޝީދު 'އެކްސް'ގައި ކުރެއްވި ޕޯސްޓެއްގައި ވިދާޅުވީ މިވަގުތު ރާއްޖޭގެ ހުރިހާ ސިޔާސީ ލީޑަރުންގެ ޒިންމާ ވަރަށް ބޮޑު ކަމަށާއި މިހާލަތު ވަރަށް ރަނގަޅަށް ރައްޔިތުންނަށް ސާފުކޮށްދޭން ޖެހޭ ކަމަށެވެ.

ބީއެމްއެލުން ގެނައި ބަދަލާ އެކު ގިނަ ބަޔަކު އަންނަނީ ސޯޝަލް މީޑިއާގައި ކަންބޮޑުވުން ފާޅުކުރަމުންނެވެ.

ކާޑު ލިމިޓަށް ގެނައި ބަދަލާ ގުޅޭ ގޮތުން ބޭންކުން ނެރުނު ނޫސްބަޔާނުގައި ބުނީ ބޭންކު ކާޑުތަކުން ކުރާ ޑޮލަރުގެ މުއާމަލާތްތައް ބޭންކަށް ލިބުނު ޑޮލަރު އާމްދަނީއަށް ވުރެ ތިން ގުނަ ބޮޑު ކަމަށެވެ.

އެނގުން މުހިންމު - ރުފިޔާ އެކައުންޓްތަކަށް ދޫކޮށްފައިވާ ޑެބިޓް ކާޑުތަކަށް ރާއްޖެއިން ބޭރުގައި މުއާމަލާތްކުރަން މަހަކު 250 ޑޮލަރު ކުރިން އައީ ދެމުންނެވެ.

ބީއެމްއެލުން ކާޑް ލިމިޓްތަކަށް ގެނައި ބަދަލުތައް މިއަދު ނެރުނު ނޫސް ބަޔާނެއްގައި އިއުލާންކޮށްފަ އެވެ. އެގޮތުން ގެނައި ބަދަލުތަކަކީ: 

ފާހަގަ ކުރެވޭ - ބީއެމްއެލްގެ ރުފިޔާ ޑެބިޓު ކާޑުން ޑޮލަރުގެ މުއާމަލާތް ކުރެވޭ މިންވަރު ކަނޑާލާ އަދި އާ ކްރެޑިޓް ކާޑުތަކުން ޑޮލަރު މުއާމަލާތް ކުރެވޭ އަދަދު 100 ޑޮލަރަށް ލިމިޓުކޮށްފައި ވާއިރު، ރާއްޖޭން ބޭރުގައި ކިޔަވާ ދަރިވަރުންނަށް ވެސް އެ ބަދަލު އަންނާނެ އެވެ. މީގެ ކުރިން ރާއްޖެއިން ބޭރުގައި ކިޔަވާ ކުދިންނަށް 750 ޑޮލަރާއި ހަމައަށް ބޭންކުގެ ރުފިޔާ ޑެބިޓު ކާޑުން މުއާމަލާތް ކުރެވެ އެވެ.