ތ. ދިޔަމިގިލި: އެ ރަށު ކައުންސިިލުން ފައިސާގެ ކަންކަން ބެލެހެއްޓުން ދޯދިޔާ (ފައިލް ފޮޓޯ)
ދިޔަމިގިލި ކައުންސިލް ތިޖޫރީން ހަ ލައްކަ ރުފިޔާ މަދު: އޮޑިޓް ރިޕޯޓް
ތ. ދިޔަމިގިލި ކައުންސިލް އިދާރާގެ ތިޖޫރީގައި ހުންނަން ޖެހޭ ފައިސާގެ ތެރެއިން ހަ ލައްކަ ރުފިޔާ މަދުވެފައިވާ ކަމަށް އެ އިދާރާގެ އޮޑިޓް ރިޕޯޓުން ދައްކައިފި އެވެ.
ވީ ކިހިނެއް؟ - އެކަން ހާމަވީ އޮޑިޓާ ޖެނެރަލްގެ އޮފީހުގެ 2022 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުންނެވެ.
ތަފްސީލް - އެ ރިޕޯޓުން ދައްކާ ގޮތުގައި މިދިޔަ އަހަރުގެ 10 އޮކްޓޫބަރުގެ ނިޔަލަށް ކައުންސިލްގެ ތިޖޫރީގައި ހުންނަން ޖެހޭ ފައިސާގެ ތެރެއިން 605،438 ރުފިޔާ މަދު ކަމަށެވެ.
އެ ރިޕޯޓުގައިވާ ގޮތުން 2020 އިން ފެށިގެން މިދިޔަ 10 އޮކްޓޫބަރު 2023ގެ ނިޔަލަށް:
-
2020 ފެށުނުއިރު ބޭންކް އެކައުންޓަށް ޖަމާނުކޮށް ހުރި ފައިސާގެ އަދަދު 468،004 ރުފިޔާއަށް އަރާ
-
ކައުންސިލްގެ އިދާރާއަށް ނަގުދު ފައިސާއިން ބަަލައިގެންފައިވާ އާމްދަނީގެ އަދަދު 397،052 ރުފިޔާ ހުރި
-
ހަރަދު ކުރުމަށް ކައުންސިލްގެ އިދާރާގެ ބޭންކު އެކައުންޓުން 1 މިލިއަނަށް ވުރެ ގިނަ ރުފިޔާ ނެގި
-
ކައުންސިލްގެ އިދާރާގައި ބަހައްޓައިގެން 2 މިލިއަނަށް ވުރެ ގިނަ ރުފިޔާ ރޯލްކުރި
-
ކައުންސިލްގެ އިދާރާގެ ބޭންކް އެކައުންޓަށް ކައުންސިލްގެ އިދާރާއިން 455،174ރ ޖަމާކުރި
-
ނަގުދު ފައިސާއިން ކައުންސިލްގެ އިދާރާއިން 1.7 މިލިއަން ރުފިޔާ ހަރަދުކުރި
-
ތިޖޫރީގައި ހުންނަން ޖެހޭ ފައިސާގެ ތެރެއިން 605،438ރ ގެއްލިފައިވޭ
އެ ރަށު ތިޖޫރީން ގެއްލުނު ފައިސާގެ މައްސަލަ ބަލައި ތަހުގީގުކޮށް ޒިންމާވާ ފަރާތްތަކާ މެދު ފިޔަވަޅު އަޅަން ވެސް ވަނީ އެދިފަ އެވެ.
އޭގެ އިތުުރުން އެ ރިޕޯޓުގައި:
-
ކައުންސިލްގެ އިދާރާއަށް ބަލައިގަންނަ ނަގުދު ފައިސާ ގަވާއިދުން ޖަމާކޮށްފައި ނުވާކަން ފާހަގަކުރި
-
ބޮޑެތި އަދަދުތަކުން ކައުންސިލްގެ ބޭންކް އެކައުންޓުން ފައިސާ ނަގައިގެން ކައުންސިލް އިދާރާގައި ބެެހެއްޓުމަކީ ފައިސާ ގެއްލެން މަގުފަހިވެ އެ ފައިސާ ނަހަމަ ގޮތުގައި ބޭނުންކުރުމަށް ފުރުސަތު ހުޅުވިގެންދާނެ ކަމަށް ފާހަގަކުރި
-
ހަރަދުކޮށްފައިވާ ފައިސާގެ ތަފްސީލް ލިޔެކިޔުމުން ބަލަަހައްޓާފައި ނުވާކަން ފާހަގަކުރި
-
އެހެންވެ އެ މައްސަލަ ވެސް ބަލައި ޒިންމާވާ ފަރާތްތަކާ މެދު ފިޔަވަޅު އަޅަން އެދިފައިވޭ
-
އެ ކައުންސިލްގެ ފައިސާއާ ގުޅޭ އެހެން ވެސް ގިނަ މައްސަލަތަކެއް ހުރިކަން ފާހަގަކުރި