އެމްޕޮކްސް ކަމަށް ހީކޮށް 2 ކޭސް ރިޕޯޓު ކުރި؛ ޕޮޒިޓިވްވީ ފާނަބަސަންދަށް

ރާއްޖެއިން އެމްޕޮކްސް ފެނުނު ކަމަށް ޝައްކު ކުރެވިގެން ކަމާބެހޭ އިދާރާތަކަށް ދެ ކޭސް ހުށަހަޅާފައިވާ ކަމަށާއި ނަމަވެސް އެ ދެ ކޭސް ވެސް ޕޮޒިޓިވްވެފައި ވަނީ ފާނަބަސަންދަށް (ޗިކަންޕޮކްސް އަށް) ކަމަށް ހެލްތު މިނިސްޓަރު އަބްދުﷲ ހަލީލް ވިދާޅުވެއްޖެ އެވެ.

އެނގުން މުހިއްމު - އެމްޕޮކްސް އަކީ ޕަބްލިކް ހެލްތު އިމަޖެންސީއެއް ނުވަތަ އާންމު ސިއްހަތުގެ ކުއްލި ނުރައްކަލެއްގެ ގޮޮތުގައި ދުނިޔޭގެ ސިއްހަތު ޖަމްއިއްޔާ، ޑަބްލިއުއެޗް އިން ވަނީ މި މަހު އިއުލާނުކޮށްފަ އެވެ.

އެ ބަލި ފެތުރެން ފެށީ ކޮންގޯގަ އެވެ. އެ އިންފެކްޝަން އަވައްޓެރި ގައުމުތަކަށް ފެތުރި، މި ހަފްތާގައި ތައިލެންޑުން ވެސް ވަނީ އެބަލީގެ ކޭސްއެއް ފެނިފަ އެވެ.

ވީ ކިހިނެއް؟ - އޭޝިއާގެ ގައުމުތަކުގައި އެމްޕޮކްސް ފެތުރިދާނެ ކަމުގެ ބިރުވެރިކަން އުފެދިފައިވާ މި ދަނޑިވަޅުގައި ރާއްޖެއިން އެމްޕޮކްސް ފެނިފައިވާކަމުގެ އަޑުތަކެއް މިއަދު ވަނީ އަރާފަ އެވެ. ނަމަވެސް، އެކަން ހެލްތު މިނިސްޓަރު ދޮގު ކުރެއްވި އެވެ.

"އަޅުގަނޑުމެންނަށް މިހާ ހިސާބަށް އައި އިރު އެކަހަލަ [އެމްޕޮކްސްގެ] ކޭހެއް ފެނިފައެއް ނެތް،" ތިން ވުޒާރާއެއް ގުޅިގެން މިއަދު ހަވީރު ބޭއްވި ނޫސްވެރިންގެ ބައްދަލުވުމުގައި 'ދައުރު'އިން ކުރި ސުވާލަކަށް ޖަވާބުދެއްވަމުން ހަލީލް ވިދާޅުވި އެވެ.

"އެހެންނަމަވެސް އަޅުގަނޑުމެންނަށް ރިޕޯޓު ކުރި ދެ ކޭހެއް އަޅުގަނޑުމެން ޓެސްޓު ކޮށްފިން. [އެ ދެ ކޭސް] އެއީ ޗިކަންޕޮކްސް."

މިނިސްޓަރު އިތުރަށް ވިދާޅުވި ގޮތުގައި:

ފާހަގަކޮށްލެވޭ - ޑަބްލިއުއެޗްއޯ އިން އެމްޕޮކްސްގެ ސިއްހީ ކުއްލި ނުރައްކަލެއް އިއުލާނު ކުރުމުން ރާއްޖޭގައި އެ ބަލި ފެތުރިދާނެތޯ ބެލުމަށް ރިސްކު އެސެސްމެންޓެއް ހަދަން ފަށާފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަނީ މިދިޔަ ހަފްތާގައި ބުނެފަ އެވެ.