ވަކިކުރުމުގެ ކުރިން އިސްތިއުފާ ދެއްވާނެ ކަމުގެ އިޝާރާތެއް ޕީޖީ ޝަމީމް ދެއްވައިފި

ޕްރޮސިކިއުޓާ ޖެނެރަލް (ޕީޖީ)ގެ މަގާމުން ވަކިކުރުމުގެ ކުރިން އިސްތިއުފާ ދެއްވާނެ ކަމުގެ އިޝާރާތެއް ހުސެއިން ޝަމީމް މިއަދު ދެއްވައިފި އެވެ.

ވީ ކިހިނެއް؟ -  މަގާމުން ވަކިކުރަން ހުށަހަޅާފައިވާ މައްސަލާގައި ޖަވާބު ދާރީވުމަށް ރައްޔިތުންގެ މަޖިލީހުގެ ޖުޑީޝަރީ ކޮމިޓީއަށް ޝަމީމް ހާޒިރުކުރުމަށް ފަހު މިއަދުގެ ބައްދަލުވުމުގައި އޭނާ ވަކިކުރަން ކޮމިޓީން ވަނީ ފާސްކޮށްފަ އެވެ. 

ޝަމީމް މަގާމުން ވަކިވާނީ މަޖިލީހުގެ ތަޅުމަށް ކޮމިޓީގެ ނިންމުން ހުށަހަޅައި، މުޅި މަޖިލީހުގެ ވޯޓުން އެގޮތަށް ފާސްވުމުންނެވެ. އޭނާ މަގާމުން ވަކިކުރުމާ ގުޅޭގޮތުން މަޖިލީހުގެ ތަޅުމުގައި ވޯޓަށް އެހުން މިރޭ 9 ޖަހާއިރަށް ވަނީ ތާވަލުކޮށްފަ އެވެ.

ވަކިކުރަން ކޮމިޓީން ފާސްކޮށްފައިވަނިކޮށް މިއަދު ޕީޖީ އޮފީހުގައި ބޭއްވި ނޫސްވެރިންގެ ބައްދަލުވުމުގައި އިސްތިއުފާ ދެއްވުމާ ގުޅޭގޮތުން ސުވާލުކުރުމުން ޝަމީމް އެކަމަށް ސީދާ ޖަވާބެއް ނުދެއްވި އެވެ.

ވިދާޅުވީ އެކަންކަން ހިނގާގޮތް ނޫސްވެރިންނަށް ވެސް އެނގޭނެ ކަމަށާއި އޭނާ ދަރިވަރުވީ ކުރީގެ ޕީޖީ އަހްމަދު މުއިއްޒުގެ އަރިހުން ކަމަށާއި ކަންކުރައްވާނީ އެބޭފުޅާ ކަންކުރެއްވި ގޮތަށް ކަމަށެވެ.

"އަޅުގަނޑު މި މަސައްކަތް ފެށީ ކުރީގެ ޕީޖީ އަހްމަދު މުއިއްޒުގެ އަރިހުން. އެބޭފުޅާގެ އަރިހުން އަޅުގަނޑު ދަސްކުރީ މި މަސައްކަތްކުރާ ގޮތާއި މިކަން ކުރާގޮތް. އެބޭފުޅާ ކުރެއްވި ގޮތަށް އަޅުގަނޑު ވެސް [ކަން] ކުރާނީ،" ޝަމީމް ވިދާޅުވި އެވެ.

އެނގުން މުހިންމު - ޝަމީމް މަގާމުން ވަކިކުރަން މަޖިލީހަށް މައްސަލަ ހުށަހެޅުއްވީ ސަރުކާރު ހިންގާ ޕީއެންސީއަށް ނިސްބަތްވާ ހުޅުދޫ ދާއިރާގެ މެންބަރު މުހައްމަދު ޝާހިދު އެވެ. އޭނާ ވަނީ ޝަމީމް ވަކިކުރަން ޖެހޭ އަށް ސަބަބެއް ބަޔާންކުރައްވައިފަ އެވެ.

ކުރީގެ ޕީޖީ މުއިއްޒުގެ މައްޗަށް ވެސް 2013 ވަނަ އަހަރު ނުފޫޒުގެ ތުހުމަތުތަކެއްކޮށް، މަގާމުން ވަކިކުރުމުގެ މަސައްކަތް އޭރުގެ މަޖިލީހުން ކުރި އެވެ. މަގާމުން ވަކިކުރަން ވޯޓަށް އެހުމުގެ ކުރިން މުއިއްޒު ވަނީ އިސްތިއުފާ ދެއްވައިފަ އެވެ.

ޖުޑިޝަރީ ކޮމިޓީގައި މިއަދު ބޭއްވި ބައްދަލުވުން އާންމުންނަށް ހުޅުވާލައިގެން ކުރިއަށް ގެންގޮސްދޭން ޝަމީމް އެދިވަޑައިގެންނެވި ނަމަވެސް، ޖަވާބުދާރީވުމަށް އޭނާ ހާޒިރުކުރި ކޮމިޓީ ކުރިއަށް ގެންދިޔައީ ސިއްރުކޮށްގެންނެވެ. 

އެ ކޮމިޓީގައި ދެކެވުނު ވާހަކަތަކާ ގުޅޭގޮތުން މިއަދުގެ ނޫސްވެރިންގެ ބައްދަލުވުމުގައި 'ދައުރު' އިން ސުވާލުކުރުމުން ޝަމީމް ވިދާޅުވީ:

ޝަމީމް ވިދާޅުވީ އޭނާއަށް ކުރާ ހުރިހާ ތުހުމަތުތަަކަށް އިންކާރު ކުރައްވާ ކަމަށާއި މަގާމުން ވަކިކުރަން ނިންމާފައިވަނީ މީގެ ކުރިން ވެސް ޖަވާބުދީ "ބާވެފައިވާ ކަންކަމެއް އަލުން ނަންގަވައިގެން" ކަމަށެވެ.

އެނގުން މުހިންމު - ޝަމީމް ވަކިކުރަން ޖެހޭ މައިގަނޑު ސަަބަބުތަކުގެ ގޮތުގައި ބުނެފައި ވަނީ ޖިނާއީ އަދުލުގައި ގާއިމްވެފައިވާ އުސޫލުތަކާ ހިލާފަށް ކުރީގެ ސަރުކާރުގެ ވެރިންނާ ގުޅޭ ބައެއް ބޮޑެތި މައްސަލަތައް އޭނާ އަނބުރާ ގެންދެވުމެވެ.