ޕީޖީ ހުސެން ޝަމީމް މީގެ ކުރިން ބޭއްވި ނޫސްވެރިންނާ ބައްދަލުވުމެއްގެ ތެރެއިން (ޓޯ/އަބްދުﷲ އަނޫފް ޖުނައިދު)
ޝަމީމު ވަކިކުރަން މިރޭ މަޖިލީހުގެ ޖަލްސާއެއް ބާއްވަނީ
ޕްރޮސެކުއުޓާ ޖެނެރަލް ހުސައިން ޝަމީމް، ޕީޖީ ކަމުން ވަކިކުރަން މަޖިލީހުގެ ޖުޑީޝަރީ ކޮމިޓީން މިއަދު ނިންމާފައިވާ ނިންމުމާ މެދު ގޮތެއް ނިންމުމަށް މިރޭ މަޖިލީހުގެ ޖަލްސާއެއް ބޭއްވުމަށް ނިންމައިފި އެވެ.
ވީ ކިިހިނެއް؟ - މިއަދު ބޭއްވި މަޖިލީހުގެ ޖަލްސާ ނިންމާލައްވަމުން ރިޔާސަތުގައި އިންނެވި މަޖިލީހުގެ ނައިބު ރައީސް، ދިއްގަރު ދާއިރާގެ މެންބަރު އަހުމަދު ނާޒިމް ވިދާޅުވީ މަޖިލީހުގެ މި ދައުރުގެ ފަހު ޖަލްސާ މިރޭ ބޭއްވުމަށް ހަމަޖެހިފައިވާ ކަމަށެވެ. އެއާއެކު މަޖިލިސް މި ދައުރު ނިންމާ ދަނީ ޗުއްޓީއަށްކަން ވެސް އޭނާ ފާހަގަ ކުރެއްވި އެވެ.
އެ ޖަލްސާގެ އެޖެންޑާ އަދި މަޖިލީހުން އަދި ޝާއިއެއް ނުކުރެ އެވެ. ނަމަވެސް ބައެއް މެންބަރުން 'ދައުރު'އަށް ކަށަވަރުކޮށްދެއްވި ގޮތުގައި މިރޭ ޖަލްސާ ބާއްވަނީ ޝަމީމު ވަކިކުރަން ކޮމިޓީން ނިންމާފައިވާ ނިންމުމާ މެދު ގޮތެއް ނިންމުމަށެވެ.
ގުޅުން ހުރި - މިދިޔަ ހަފްތާ އަންގާރަ ދުވަހު ޖުޑީޝަރީ ކޮމިޓީއަށް ވެރިކަން ކުރާ ޕީއެންސީގެ ފަރާތުން ހުށަހެޅި މި މައްސަލައަށް ޖަވާބުދާރީވުމަށް ޝަމީމު މިއަދު އެ ކޮމިޓީއަށް ހާޒިރުކޮށްފައިވެ އެވެ.
އެެ ބައްދަލުވުން ހުޅުވާލައިގެން ކުރިއަށް ގެންދިޔުމަށް ޝަމީމު އެދިފައި ވަނިކޮށް، ކޮމިޓީން މައްސަލަ ކުރިއަށް ގެންގޮސް އޭނާ ވަކިކުރަން ނިންމީ ސިއްރުކޮށްގެން މިއަދު ބޭއްވި ބައްދަލުވުމެއްގަ އެވެ.
އެނގު މުހިންމު - އެމްޑީޕީގެ ސުޕަ މެޖޯރިޓީ އޮތް 19 ވަނަ މަޖިލީހުން ޑިސެމްބަރު 2019ގައި ޝަމީމް އެ މަގާމަށް އައްޔަންކުރަން ފާސްކޮށްފައި ވަނީ 74 މެންބަރުންގެ ވޯޓާ އެކު އެވެ. ފަސް އަހަރު ދުވަހަށް އައްޔަން ކުރާ އެ މަގާމުގައި ޝަމީމުގެ ދައުރު ހަމަވާން ދެން ބާކީ އޮތީ ތިން މަހެއްހާ ދުވަހެވެ.
ޝަމީމު ވަކިކުރަން ހުށަހެޅި ސަބަބުތައް:
-
ރޭޕްގެ ތުހުމަތުކޮށް ދައުވާ އުފުލި ކުރީގެ ޓޫރިޒަމް މިނިސްޓަރު އަލީ ވަހީދުގެ މައްސަލަ އެކަށީގެންވާ ސަބަބެއް ނެތި ދައުވާ ނުކުރަން ނިންމައި ފައިލްކުރުން
-
މަގާމުގައި ދެމިހުރުމަށް ޖިނާއީ އަދުލުގެ ނިޒާމުގައި ގާއިމްވެފައިވާ އުސޫލުތަކާ ހިލާފަށް ކުރީގެ ޔޫތު މިނިސްޓަރު އަހުމަދު މަހުލޫފްގެ މައްޗަށް ކުރި އެމްއެމްޕީއާރުސީގެ ކޮރަޕްޝަންގެ ދައުވާގެ މައްސަލަ ފައިލްކުރުން
-
ސަފާރީގައި އަންހެނަކު ރޭޕްކުރި މައްސަލައިގައި ދަށު ކޯޓުގެ ނިންމުން ޕީޖީ ޝަމީމް އިސްތިއުނާފު ނުކުރަން ނިންމެވުން
-
މިލަންދޫ ދާއިރާގެ ކުރީގެ މެންބަރު އަލީ ރިޒާގެ މައްޗަށް ކުރިމިނަލް ކޯޓަށް ހުށަހެޅި މީހުން ޓްރެފިކް ކުރުމުގެ ދައުވާ އަނބުރާ ގެނައުން
-
އިސްލާމް ދީނުގައި ހައްދު ކަނޑައެޅިފައިވާ ބަނގުރާ ބުއިމުގެ މައްސަލަތަކުގެ ދައުވާތައް އަނބުރާ ގެނައުން
-
ކޮވިޑް ތެރޭގައި ވެންޓީލޭޓަރުތަކެއް ގަތުމަށް ކުރި މުއާމަލާތުގެ ތެރޭގައި ހިމެނޭ ކޮރަޕްޝަންގެ މައްސަލައިގައި ދައުވާނުކުރުން
-
ޕީޖީ އޮފީހުގެ މުވައްޒަފުންގެ މެދުގައި ތަފާތުތައް ގެންގުޅުން
-
ޕީޖީ އޮފީހުގެ ޕްރޮސިކިއުޓާ އަދި ތަރުޖަމާން އަހުމަދު ޝަފީއު އެއް ޖިންސުން ގުޅުން ހިންގައި އިސްލާމް ދީނަށް ފުރައްސާކުރި ކަމަށް ތުހުމަތުވާ މައްސަލަ ފެންމަތިވުމުން އެކަމަށް ފިޔަވަޅު ނޭޅުން
އެ ހުރިހާ ތުހުމަތުތަކަށް ޝަމީމު ވަނީ އިންކާރުކޮށް، އެ ތުހުމަތު ކުރި ނިޔާތާ މެދު އޭނާ ވަނީ ސުވާލު އުފައްދަވައިފަ އެވެ. މިއަދު އޭނާ ބޭއްވި ނޫސްވެރިންގެ ބައްދަލުވުމުގައި ވިދާޅުވި ގޮތުގައި ވޭތުވެދިޔަ ހަތަރު އަހަރު އެ މަގާމުގައި ހުންނަވައިގެން މަސައްކަތް ކޮށްފައި ވަނީ، މިނިވަންކަމާއެކު ވަކި ފަރާތެއް ނުފޫޒަކަށް ބޯނުލަބައި، ގާނޫނީ އިމުގެ ތެރޭންނެވެ.
ކޮމެންޓް (1)
އާދަނުގޯތީ ކަމަނަ