މިއަދު ވެސް މޫސުން ގޯސް؛ އުދަ އަރާފާނެތީ ސަމާލުވާން އަންގައިފި

މިއަދު ވެސް ރާއްޖޭގެ އެކި ހިސާބުތަކަށް ބޯކޮށް ވާރޭވެހި މޫސުން ގޯސްވާނެތީއާ، ބައެއް ރަށްތަކަށް އުދައިގެ އަސަރުކުރުން އެކަށީގެންވާތީ ސަމާލުވާން ރާއްޖޭގެ މޫސުމާ ބެހޭ ގައުމީ އިދާރާ (މެޓް) އިން މިއަދު އިލްތިމާސްކޮށްފި އެވެ.

ވީ ކިހިނެއް؟ - ރާއްޖެއަށް މިހާރު ކުރަމުންދާ ވިއްސާރާގައި އެންމެ ގަދައަށް ވިއްސާރަކޮށްފައިވަނީ މިދިޔަ ހޯމަ ދުވަހު އެވެ. އެދުވަހުގެ 24 ގަޑިއިރުތެރޭ ވެހުނު ވާރެއަކީ ރާއްޖޭގެ ތާރީހުގައި މިހާތަނަށް އެންމެ ގިނައިން ވެހުނު ވާރޭކަމަށް މެޓްގެ ރިކޯޑުތަކުން ދައްކަ އެވެ. 

ތަފްސީލް - މިއަދުގެ އިރުއޮއްސި 6:00އާ ހަމަޔަށް މޫސުން ލަފާކޮށްފައިވާ ގޮތުގައި ރާއްޖޭގެ އެކި ހިސާބަށް ގުގުރުމާ އެކު ވިއްސާރަކުރާނެ އެވެ. އަދި ބައެއް ރަށްތަކަށް ބޯކޮށް ވާރޭވެހުން އެކަށީގެންވެ އެވެ.

މެޓުން ބުނީ ކަނޑުތައް ވެސް ގަދަވެފައި ރާޅުގެ އުސްމިން މިއަދު ހުންނާނީ އަށް ފޫޓާއި 11 ފޫޓުގައި ކަމަށެވެ.

"ދިޔަވަރު ބޮޑުވާ ވަގުތުތަކުގައި ބައެއް ރަށްތަކަށް އުދައިގެ އަސަރު ކުރުން އެކަށީގެންވޭ. ހުރިހާ ފަރާތްތަކުން ވެސް މޫސުމަށް ސަމާލުވުމަށް ދަންނަވަން،" މެޓުން ނެރުނު ސަމާލުގައި ބުންޏެވެ.

ވިލާގަނޑުގައި ގަޑިއަކު ގާތްގަނޑަކަށް 50 މޭލު ބާރުމިނަށް ވައި ގަދަވުން އެކަށީގެންވާ ކަމަށް ވެސް މެޓުން ބުންޏެވެ.

އެގޮތުން ވައި ޖެހޭނީ:

ބޯކޮށް ވާރޭވެހި، ވައިގަދަވުމާ އެކު ކަނޑުތައް ވެސް ގަދަވާނެ ކަމަށް ލަފާކޮށް ހއ. އަތޮޅުން ފެށިގެން ތ. އަތޮޅާ ދެމެދަށް މިއަދު ވަނީ ޔެލޯ އެލާޓް ނެރެފަ އެވެ. އަދި ވ. އަތޮޅުން ފެށިގެން އައްޑޫ ސިޓީއަށް ވައިޓް އެލާޓް ވެސް ވަނީ ނެރެފަ އެވެ.

ފާހަަގަކޮށްލެވޭ ކަމެއް - އިއްޔެ އެންމެ ގިނައިން ވާރޭ ވެހުނު ރަށްތަކުގެ ގޮތުގައި މެޓުގެ ރިކޯޑުތަކުން ދައްކަނީ ހއ. ކެލާ އަދި ރ. އިފުރު އެވެ. ކެލައަށް 63.5 މިލިމީޓަރުގެ ވާރޭ ވެހިފައިވާއިރު، އިފުރަށް 51.5 މިލިމީޓަރުގެ ވާރޭ ވެހުނެވެ. 

ކެލައަކީ މިހާރު ރާއްޖެއަށް ކުރަމުންދާ ވިއްސާރާގައި އެންމެ ގަދައަށް ވިއްސާރަކުރި އެއް ރަށެވެ. އެގޮތުން މިދިޔަ ހޯމަ ދުވަހު އެރަށަށް 231.5 މިލިމީޓަރުގެ ވާރޭ ވެހުނެވެ. މިއީ ރާއްޖޭގެ ރެކޯޑެކެވެ.

މި ވިއްސާރާގައި މާލެއަށް ވެސް ވަރަށް ބޮޑަށް ވާރޭ ވެހުނެވެ. މާލޭގެ 183 ގެއަކަށް ފެން ވަދެ 43 ގެއެއްގައި ވެލި ބަސްތާ ޖަހަން ޖެހުނެވެ.