ރާއްޖޭގެ އެކި ހިސާބުތަކަށް މިހާރު ކުރަމުންދާ ވިއްސާރައިގައި ކެލާގައި ބޮޑުވި ފެން ހިންދުމަށް އެ ރަށުގެ މީހަކު ކޯރު ކަނޑަނީ (ފޮޓޯ/ ކެލާ ކައުންސިލް)
ކެލާ މީހުން މިވަރުގެ ވިއްސާރައެއް އަދި ނުދެކޭ
މި ހަފުތާގައި ވިއްސާރަ ކުރާނެ ކަމަށް މޫސުމާ ބެހޭ ގައުމީ އިދާރާއިން އަންގާފައި އޮތް ނަމަވެސް، އެހެން ގިނަ ބައެކޭ އެއްގޮތަށް ހއ. ކެލާގެ މީހުން ވެސް އުއްމީދުކޮށްގެން ތިބީ އާދައިގެ ކެރިގަނޑަކަށެވެ. އެކަމަކު މޫސުމީ މި ވިއްސާރައިގައި އެ ރަށު ބޯމަތީގައި އިއްޔެ އޮތީ، މިއިން ޒަމާނަކު ނުދެކޭވަރުގެ ބޯވިލާގަނޑެކެވެ.
"އަޅުގަނޑުގެ އުމުރުން 71 މިވީ. ސަހާދެއް އަދި މިވަރުގެ ވިއްސާރަގަނޑެއް ނުދެކެން،" އެ ރަށު އިބްރާހިމް ވަހީދު ބުންޏެވެ.
އޭނާ ބުނި ގޮތުގައި، ވަރަށް ބޮޑަށް ބަނަކޮށްލާފައި އޮތުމަށް ފަހު ކެލައަށް ވާރޭ ވެހެން ފެށީ އިއްޔެ ނޫން ކުރީ ދުވަހު އަސުރުން ތިރިވި ފަހުންނެވެ. އޭގެ ފަހުން އިއްޔެ ހަވީރު ވަންދެން ހުއްޓުމެއް ނެތި އެ ރަށަށް ވާރޭ ވެހުނެވެ. ބައެއް ވަގުތުތަކުގައި ހިސާބަކަށް ތުނިކޮށްލި ނަމަވެސް އާއްމުކޮށް ބޯކޮށް ވެހުނު މި ވާރޭ، 24 ގަޑިއިރު ފަހުން ހުއްޓާލި އިރު ރަށުގެ ބޮޑު ބައެއް އޮތީ ފެނު އަޑީގަ އެވެ.
މެޓު އޮފީހުން ވެސް އިއްޔެ ބުނި ގޮތުގައި، ކެލައަށް އިއްޔެ މި ވެހުނީ، ރާއްޖޭގެ ތާރީހުގައި ވެސް ވެހުނު އެންމެ ގިނަ ވާރޭ އެވެ. އެގޮތުން:
-
24 ގަޑިއިރު ތެރޭ ކެލައަށް 231.5 މިލިމީޓަރުގެ ވެހުނު
-
މީގެ ކުރިން 24 ގަޑިއިރު ތެރޭ ރާއްޖެއަށް އެންމެ ގިނައިން ވާރޭ ވެހުނު ކަމަށް ރިކޯޑު ކުރެވިފައިވަނީ 2015ގައި އައްޑޫ ގަމަށް 228 މިލިމީޓަރުގެ ވާރޭ
އިއްޔެ ކެލައަށް ވެހުނު ވާރޭގެ ގިނަމިން، އިބްރާހިމް ވަހީދު ސިފަކޮށްދިނީ އޭނާގެ ގޭ ކުރިމަތީގައި އޮންނަ ބޯޅަދަނޑުންނެވެ. އާއްމު ކެރިގަނޑުތަކުގައި ވެސް ހިސާބަކަށް ފެންބޮޑުވާ އެތަން އިއްޔެ ވާރޭ ހުއްޓާލި އިރު އޮތީ، ވަހީދުގެ ބަހުން ނަމަ، "ކުޅިއަކަށް" ވެފަ އެވެ.
"ބުޅާ ވަންނާތީ އެތަނުގައި ހުރޭ ރަތް ކުލަ ގިރުވާފައި ހުންނަ 5 ލީޓަރުގެ ފެންފުޅި ބަހައްޓާފައި. އެ ފުޅިތަކުގެ ތުނބާހަމައަށް، އެއޮތް ބޮޑު ބޯޅަދަނޑުގައި އޮތީ ފެންބޮޑުވެފައި،" އޭނާ ބުންޏެވެ.
ރާއްޖޭގެ ގިނަ ރަށްތަކާ ހިލާފަށް މަގުތައް ފުޅާ މި ރަށުގެ ހުރިހާ ދިމާއެއްގައި ވެސް އޮތީ، ބޭރަށް ނުކުމެ ނޫޅެވޭ ވަރަށް ފެންބޮޑުވެފަ އެވެ.
އާދަޔާހިލާފު މި ވިއްސާރައިގެ ސަބަބުން ކެލާ މީހުންނަށް އެތައް ދަތިތަކަކާ ކުރިމަތިވި އެވެ. ސްކޫލުތައް ބަންދުކޮށް، އާއްމު ހިިދުމަތްތައް ހޯދަން ބޭރަށް ނުނިކުމެވި ތިބެން ޖެހުނެވެ. މަގުމަތީގައި ވަރަށް ބޮޑަށް ފެންބޮޑުުވުމުގެ ސަބަބުން، ސައިކަލު ފަދަ އުޅަނދުތަކެއް ނުދުއްވުނެވެ. ގިނަ ބަޔަކު 24 ގަޑިއިރު ތިބެން ޖެހުނީ ގޭބަންދު ވެގެންނެވެ.
ވޭނެއްގައި ޓެކްސީގެ ހިދުމަތް ދޭ އިބްރާހިމް ވަހީދަށް އިއްޔެ އަކީ ބުރަ ދުވަހެކެވެ. ވިއްސާރައިގައި 15 ވަރަކަށް ގެއަށް ފެންވަދެ، ގެއްލުންތައް ލިބުނު އިރު ބައެއް ގެތަކުން މީހުން ހުސް ކުރުމުގެ މަސައްކަތް އޭނާގެ ވޭނުގައި ކުރި އެވެ. އެ މަސައްކަތުގައި އިއްޔެ ކެލާގެ ކައުންސިލަރުން އަވަދިނެތި އުޅުނީ ތެމިގެންނެވެ.
ކެލައަކީ ގުދުރަތީ ގޮތުން، އަތިރިމައްޗަށް ވުރެ މީހުން އުޅޭ ސަރަހައްދު އަޑިކޮށް އޮންނަ ރަށެކެވެ. ހާއްސަކޮށް އެ ރަށުގެ ދެކުނު ފަރާތް އަޑިއެވެ. އެހެންވެ، އާއްމުކޮށް ވެހޭ ވާރޭގައި ވެސް އެ ސަރަހައްދުގައި ފެންބޮޑުވެ އެވެ. އެކަމަކު އިއްޔެ ވެހުނު ބޯ ވާރޭއަށް ފަހު އެ ސަރަހައްދުގައި އެއްގޮތަކަށް ވެސް ހިނގާބިނގާވެ ނޫޅެވެ އެވެ. މީހުން ބަދަލު ކުރަން ޖެހުނީ ވެސް އެ ސަރަހައްދުގައި ހުރި ބައެއް ގެތަކުންނެވެ.
އިއްޔެ ވެހުނު ވާރޭ ދިގުލައިގެން ދިޔަ ނަމަވެސް، އެ ވަގުތު ރަށުގެ އެއްވެސް މީހަކު އެކަމާ މާ ހާހެއް ނުވެ އެވެ. އެކަމަކު 'ދައުރު'ން ވާހަކަ ދައްކާލި ބައެއް މީހުން ބުނާ ގޮތުގައި، މިފަދަ ކެރިގަނޑުތައް މާގިނައިން އަންނަން ވެއްޖެ ނަމަ، އެފަދަ ނާޒުކު ރަށްތައް މާގިނަ ދުވަހު އޮންނާނެ ކަމުގެ ބިރު އެބައޮތެވެ.
"މިއީ ބޮޑު ރަށެއް. އެކަމަކު އިއްޔެ އައި ވިލާގަނޑުގައި މުޅި ރަށް މިއޮތީ އަޑީގައި. ދެން ވިސްނާލާ މާގިނައިން މި ގޮތަށް ވާރޭވެހޭ ނަމަ ކަންތައްތައް ވާނެ ގޮތް،" އެ ރަށުން ވާހަކަ ދެއްކި އެހެން މީހަކު ބުންޏެވެ.
އިއްޔެ ކެލާގައި ބޮޑުވި ފެންގަނޑުތައް ހިންދީ، ރަށުގައި ކޯރުކަނޑައި މޫދަށް ގުޅައިގެންނެވެ.