ޔާމީނަކަށް ވެސް އަޅުގަނޑާ އެއްވަރަށް ސިޔާސީ ކުޅިބައި އަތުރާކަށް ނޭނގޭނެ: އަބްދުއްރަހީމް

ކުރީގެ ރައީސް އަބްދުﷲ ޔާމީން އާއި އެމަނިކުފާނުގެ އަރިހުގައި މިހާރު ތިއްބެވި ޑރ. މުހައްމަދު ޖަމީލު އަދި މުހައްމަދު މަލީހު ޖަމާލަކަށް ވެސް "ސިޔާސީ ކުޅިބައި އަޅުގަނޑާ އެއްވަރަށް އަތުރާކަށް ނޭނގޭނެ" ކަމަށް ރައްޔިތުންެގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ ރޭ ވިދާޅުވެއްޖެ އެވެ.

ތަފްސީލް - ޕީއެންސީން ރޭ ބޭއްވި ޖަލްސާގައި ވާހަކަދައްކަވަމުން އަބްދުއްރަހީމް ވިދާޅުވީ އޭގެ އެއް މިސާލަކީ ރައީސް މުހައްމަދު މުއިއްޒު ވެރިކަމަށް އިންތިހާބުކޮށްދިނުން ކަމަށެވެ.

ބުނީ ކީކޭ؟ - "ކޮން ސިޔާސީ ޕާޓީއަކަށް، ފަސް އަހަރު ދުވަސް ވާންދެން އެ ޕާޓީގެ ލީޑަރު ޖަލުގައި އޮއްވައި އެ ޕާޓީގެ ލީޑަރުގެ އަގު ހިފަހައްޓައިގެން ޕާޓީ ވަރުގަދަކޮށްގެން ވެރިކަމަށް އާދެވުނު އެއްވެސް ޕާޓީއެއް މި ރާއްޖޭގައި ނޯންނާނޭ. އެކަން ކުރީ އަޅުގަނޑުމެން. މި އޮތީ އެ ޓީމު. ޕީޕީއެމް ޕީއެންސީގެ ލީޑާޝިޕާއި ދެ ޕާޓީގެ އާންމު މެންބަރުންނާ ގުޅިގެން އެކަން ކުރީ. އިސްވެ ހުރީ އެ ބުނާ ނުކިޔަވާ އަބްދުއްރަހީމް،" ޕީއެންސީގައި ތިއްބެވި ބޭފުޅުން ވަރަށް ޔާމީނަށް އިހުލާސްތެރިވާނެ އެހެން ބަޔަކު ނުވާނެ ކަމަށް ވިދާޅުވަމުން އަބްދުއްރަހީމް ވިދާޅުވި އެވެ.

"އަޅުގަނޑު މި ދަންނަވަނީ ޖަމީލަކަށް ވެސް، މަލީހަކަށް ވެސް، ރައީސް ޔާމީނަކަށް ވެސް، ސިޔާސީ ކުޅިބައި އަޅުގަނޑާ އެއްވަރަށް އަތުރާކަށް ނޭނގޭނެ."

އަބްދުއްރަހީމް ވިދާޅުވީ މިހާރު ކިތަންމެ ބޮޑަށް އަބްދުއްރަހީމަށް ޔާމީން ފާޑުވިދާޅުވި ނަމަވެސް ޔާމީން ނެތް ހާލަތެއްގައި ޕީޕީއެމް-ޕީއެންސީ ހިންގޭނެ މީހަކީ އަބްދުއްރަހީމް ކަމަށް ރައީސް ޔާމީން ވިދާޅުވެފައިވާ ކަމަށެވެ. އަދި ޔާމީން ފުރަތަމަ ފަހަރު ޖަލުން މިނިވަން ވެވަޑައިގަތުމާ އެކު ކާނިވަލުގައި ބޭއްވި ޖަލްސާގައި އަބްދުއްރަހީމަށް ވަރަށް ބޮޑަށް ތައުރީފްކުރައްވައި ވާހަކަ ދައްކަވާފައިވާކަން ފާހަގަކުރެއްވި އެވެ.

އެމަނިކުފާނު ވިދާޅުވީ ޔާމީން އެންގެވި ގޮތަށް، ޕީޕީއެމް-ޕީއެންސީ އިން ނިމިދިޔަ ރިޔާސީ އިންތިހާބު ބޮއިކޮޓްކުރި ނަމަ އެ ތައުރީފްތައް އަދިވެސް ކުރައްވާނެ ކަމަށެވެ.

އަބްދުއްރަހީމް ވިދާޅުވި ގޮތުގައި ޔާމީނަށް މި ސަރުކާރު ކަމުނުގޮސް ރައީސް މުއިއްޒާ ދޭތެރޭ ވެސް ހިތްހަމަޖެހިވަޑައިނުގަތީ ރައީސްގެ މައްޗަށް އެހެން މީހެއްގެ ބާރު ނުފޯރުވޭނެ ކަމަށް ވިދާޅުވުމުންނެވެ. އަދި ރައީސްއާ މެދު ޔާމީން އެންމެ ފުރަތަމަ ނުރުހުނީ އެމަނިކުފާނު އިންތިހާބުވެވަޑައިގެން ރައްޔިތުންނަށް ޝުކުރު އަދާކުރަން ބޭއްވި ޖަލްސާ، ޔާމީން މިނިވަންވުމުގެ ކުރިން ބޭއްވުމުން ކަމަށް ވެސް އަބްދުއްރަހީމް ވިދާޅުވި އެވެ.

"މި ދަންނަވަނީ ރައީސް ޔާމީން ރައީސް މުއިއްޒު ދޫކުރައްވާ ވަޑައިގެންނެވި ސަބަބު އަދި އެކަން ނިންމެވި ރޭ، އެރޭ [ރައްޔިތުންނަށް ޝުކުރު އަދާކުރަން ޖަލްސާ ބޭއްވި ރޭ] ގައުމާ މުހާތަބުކުރައްވާ ވާހަކަފުޅު ދައްކަވަމުން ރައީސް މުއިއްޒު ވިދާޅުވީ ތިމަންނަގެ މައްޗަށް އެހެން އެއްވެސް މީހެއްގެ ބާރެއް ނުހިނގާނެއޭ، ތިމަންނަގެ މައްޗަށް ހިނގާނީ ރައްޔިތުންގެ ބާރޭ. އެއީ މައިގަނޑު ސަބަބަކީ،" އަބްދުއްރަހީމް ވިދާޅުވި އެވެ. އެމަނިކުފާނު ވިދާޅުވީ އެހެން މީހަކު ގައުމުގެ ވެރިކަން ކުރާތަން ބަލަން ޔާމީންގެ "ލަގޮނޑިއަށް" ކެތްނުވީ ކަމަށެވެ.

އަބްދުއްރަހީމް ވަނީ ރައީސް މުއިއްޒަށް ކޮރަޕްޝަންގެ މައްސަލަތައް ބަލަން ނުކެރޭނެ ކަމަށް ވިދާޅުވެ ޔާމީން ކުރެއްވި ޗެލެންޖަށް ވެސް ރައްދު ދެއްވާފަ އެވެ. އެގޮތުން، ވީ އެންމެ އަވަހަކަށް އަބްދުއްރަހީމްގެ މައްސަލަތައް ބަލަން މިނިވަން ކޮމެޓީއެއް ހަދަން ރައީސް މުއިއްޒަށް ގޮވާލެއްވި އެވެ.

"ކޮމެޓީއެއް ހައްދަވާފައި އަޅުގަނޑުގެ މައްސަލަ ބަލަން ޗެއާއަކަށް ލާން ވާނީ ރައީސް ޔާމީނޭ. ޑެޕިއުޓީންގެ ގޮތުގައި ތިއްބަވަންވާނީ ޑރ. ޖަމީލާއި މަލީހާ. މެންބަރުންގެ ގޮތުގައި ތިއްބަވަންވާނީ ހުސެން ވަހީދާއި ޕާޕާއާ. އަޅުގަނޑު މި ހުރީ ޖަވާބުދާރީވާން ދާން ތައްޔާރަށް،" އަބްދުއްރަހީމް ވިދާޅުވި އެވެ. 

އެމަނިކުފާނުގެ މައްސަލަ ބަލަން އުފައްދާ ކޮމިޝަނާ އެކު އެމްއެމްޕީއާރްސީގެ މައްސަލަ ބަލާނެ ކޮމިޝަނެއް އުފައްދަންޖެހޭނެ ކަމަށްެ ވެސް އަބްދުއްރަހީމް ވިދާޅުވި އެވެ.

"އެ ކޮމިޝަނުގެ ޗެއާއަކަށް ލާން ވާނީ އަޅުގަނޑު. ދެން މެންބަރުންނަށް ލާންވާނީ އަޅުގަނޑު ބުނާ ބައެއް. އޭރުން އަޅުގަނޑު އެމްއެމްޕީއާރްސީގެ މައްސަލަ ބަލައިދޭނަން. ބަލައިފިއްޔާ ދެން ވާގޮތް އެނގިވަޑައިގަންނަވާނެ،" އަބްދުއްރަހީމް ވިދާޅުވި އެވެ.

އަބްދުއްރަހީމް ވަނީ ޔާމީންގެ ވެރިކަން ނިމުނު އިރު ޔާމީންގެ އެކައުންޓުގައި 500 މިލިއަން ހުރި ކަމަށާއި އަދި އެ ފައިސާ ހޯދި ގޮތާމެދު ސުވާލު އުފައްދަވާފަ އެވެ.

އެނގުން މުހިއްމު - ޔާމީންގެ ވެރިކަމުގައި ހިންގި އެމްއެމްޕީއާރުސީގެ ހިޔާނާތް ބެލުމަށް، ކެރިވަޑައިގަންނަވާ ކަމުގައިވާ ނަމަ، ހާއްސަ މިނިވަން ރިޔާސީ ކޮމިޝަނެއް އުފެއްދެވުމަށް ގޮވާލައްވައި ޔާމީން ވަނީ ޗެލެންޖު ކުރައްވާފަ އެވެ.

ޔާމީން ވިދާޅުވެފައިވަނީ މި ސަރުކާރުގެ އިސް މަގާމުތަކުގައި ތިއްބެވި ބައެއް ބޭފުޅުންނަކީ އެ ފައިސާގައި ޖެހިފައި ތިބި ބޭފުޅުން ކަމަށެވެ. އެހެންކަމުން އެ މައްސަލަ ބަލަން މި ސަރުކާރަކަށް ނުކެރޭނެ ކަމަށް ވެސް އެމަނިކުފާނު ވިދާޅުވި އެވެ.

ފަސްމަންޒަރު - ޔާމީންގެ ސަރުކާރުގައި ހިންގި އެމްއެމްޕީއާރުސީގެ ހިޔާނާތާ ގުޅިގެން އެމަނިކުފާނާ ދެކޮޅަށް އުފުލާފައިވާ ބައެއް ދައުވާތަކުގެ ޝަރީއަތްތައް އަދިވެސް ކޯޓުގައި އެބަ ހިނގަ އެވެ. ޔާމީނަށް ރިޔާސީ އިންތިހާބުގައި ވާދަ ކުރެއްވުމަށް ދޮރު ބަންދުވި ވޮޑަމުލާ މައްސަލައިގައި ހައި ކޯޓުން ވަނީ އެމަނިކުފާނުގެ މައްޗަށް ދަށު ކޯޓުން އިއްވާފައިވާ 11 އަހަރުގެ ޖަލު ހުކުމް ބާތިލުކޮށްފަ އެވެ. އެ ހުކުމްގެ ބައެއް މި ހަފްތާ ތެރޭގައި ދައުލަތުން ސުޕްރީމް ކޯޓުގައި ވަނީ އިސްތިއުފާން ކޮށްފަ އެވެ.