ކްލިކް އާއި އެވިޑް ކޮލެޖުން ގަވާއިދާ ހިލާފަށް ކޯސް ހިންގާތީ ފިޔަވަޅު އަޅައިފި

ގަވާއިދާ ހިލާފަށް ކޯސް ހިންގަމުންދާތީ މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)އިން ކްލިކް ކޮލެޖާއި އެވިޑު ކޮލެޖަށް ފިޔަވަޅު އަޅައިފި އެވެ.

ވީ ކިހިނެއް؟ - އެމްކިއުއޭއިން އެ ދެ ކޮލެޖުގެ މައްސަލަ ބަލަން ފެށީ، އެ ތަންތަނުގައި ހިންގާ ކޯސްތަކާ ގުޅޭ ގޮތުން އެ އޮތޯރިޓީއަށް ޝަކުވާތަކެއް ލިބުމުންނެވެ. އަދި އެ ދެ ކޮލެޖަށް ފިޔަވަޅު އެޅީ އެ ޝަކުވާތައް ބެލުމަށް ފަހު ޕްރޮގްރާމް އެކްރެޑިޓޭޝަން ގަވާއިދުގެ ދަށުންނެވެ.

ތަފްސީލު - ކްލިކް އަދި އެވިޑް ކޮލެޖަށް އެމްކިއުއޭއިން އެޅި ފިޔަވަޅުތަކުގެ ތަފްސީލު މިއަދު ސަރުކާރުގެ ގެޒެޓުގައި ވަނީ ޝާއިއުކޮށްފަ އެވެ. އެ ދެ ކޮލެޖާ ބެހޭ ގޮތުން ވެސް ގިނަ އަދި ބޮޑެތި މައްސަލަތަކެއް އެމްކިއުއޭއިން ހެދި އޮޑިޓުން ވަނީ ފާހަގަވެފަ އެވެ.

އެވިޑް ކޮލެޖާ ބެހޭ ގޮތުން މައިގަނޑު ގޮތެއްގައި ހުށަހެޅި ޝަކުވާއަކީ ލެކްޗަރާއިންނަށް ދޭން ޖެހޭ މުސާރަ ނުދޭތީ ދަރިވަރުންގެ އިމްތިހާން ކަރުދާސްތައް ބައެއް ލެކްޗަރާއިން މާކު ނުކުރުމެވެ. އޭގެ ސަބަބުން ޕްރޮގްރާމްގެ މުއްދަތު އިތުރުވެ، އެ މުއްދަތަށް ދަރިވަރުންނަށް އިތުރަށް ފައިސާ ދައްކަން ޖެހުމުގެ ޝަކުވާ އެވެ.

އެ ޝަކުވާއާ ގުޅިގެން އެމްކިއުއޭއިން އެވިޑް ކޮލެޖުގެ ހަތް ޕްރޮގްރާމެއްގެ 'ރެންޑަމް ބެޗް އޮޑިޓް'އެއް ކުރިއަށް ގެންދިއުމުން ޕްރޮގްރާމް އެކްރެޑިޓޭޝަން ގަވާއިދާއި ގައިޑްލައިނާ ހިލާފު ގިނަ ކަންތައްތަކެއް ކޮށްފައިވާކަން ވަނީ ފާހަގަކުރެވިފަ އެވެ. އޭގެ ތެރޭގައި ހިމެނެނީ:

އެމްކިއުއޭއިން ވަނީ މިދިޔަ 5 މެއިގައި އެވިޑް ކޮލެޖުގެ މެނޭޖްމަންޓާ ބައްދަލުކޮށް މި ކަންކަމާ ބެހޭ މައުލޫމާތު ދީފަ އެވެ. އެ ކަންކަމުގެ އިތުރަށް 2017 އިން ފެށިގެން އެކި އަހަރު މަތިން އެވިޑް ކޮލެޖަށް އެކި ކަންކަން ރަނގަޅު ކުރުމަށް އެމްކިއުއޭއިން ލިޔުމުން އަންގާފައިވާތީ، އެމްކިއުއޭއިން ނިންމީ ގައުމީ ސަަދުތަކުގެ އޮނިގަނޑާއި ޕްރޮގްރާމް އެކްރެޑިޓޭޝަނާ ހިލާފަށް ހިންގާ ކަންކަން ރަނގަޅު ކުރުމަށް އެ ކޮލެޖަށް އެންގުމަށެވެ.

ހަމަ އެއާ އެކު، އެވިޑް ކޮލެޖަށް އިތުރު ޕްރޮގްރާމްތަކަށް އެކްރެޑިޓޭޝަނާއި ހިންގުމުގެ ހުއްދަ ނުދިނުމަށް ވެސް އެ އޮތޯރިޓީން ވަނީ ނިންމާފަ އެވެ.

އެ ފިޔަވަޅުތަކާ އެކު އީ-ލާނިން މޮޑަލިޓީގައި އެކްރެޑިޓޭޝަން ދީފައިވާ ޕްރޮގްރާމްތަކުގެ ސްޓޭޓަސް ހަ މަސްދުވަހަށް (މިއަދުން ފެށިގެން އަންނަ 28 ޖެނުއަރީ)އަށް 'ކޮންޑިޝަނަލީ އެކްރެޑިޓް'އަށް ވަނީ ބަދަލުކޮށްފަ އެވެ. އަދި އީ-ލާނިން މޮޑަލިޓީގެ ދަށުން ހުއްދަދީފައިވާ އެއްވެސް ޕްރޮގްރާމެއް އިޝްތިހާރުކޮށްގެން އިތުރަށް ހިންގޭނީ އަލުން 'ފުލީ އެކްރެޑިޓޭޝަން ސްޓޭޓަސް'އަށް ހުއްދި ދިނުމުންނެވެ.

"ފިޔަވަޅުތައް އެޅިފައިވީ ނަމަވެސް، މިހާރު އެވިޑް ކޮލެޖުން ކުރިއަށްދާ ބެޗުތައް ކުރިއަށް ގެންދެވޭނެ ކަމާއި މި ފިޔަވަޅުތަކުގެ ސަބަބުން ކިޔަވަމުން އަންނަ ދަރިވަރުންނަށް އެއްވެސް އަސަރެއް ނުކުރާނެ ވާހަކަ ދަންނަވަމެވެ،" އެމްކިއުއޭގެ އިއުލާނުގައިވެ އެވެ.

އެމްކިއުއޭއިން ބުނީ ކްލިކް ކޮލެޖަށް އީ-ލާނިން ޑެލިވަރީ މޮޑަލިޓީގެ ދަށުން އެއްވެސް ޕްރޮގްރާމެއް ހިންގުމުގެ ހުއްދަ އެ އޮތޯރިޓީން ނުދޭ ކަމަށެވެ.

ނަމަވެސް، ކޮވިޑް-19ގެ ބަލިމަޑުކަމުގެ ދުވަސްވަރު، ރާއްޖޭގައި މަތީ ތައުލީމު ދޭ ހުރިހާ މަރުކަޒުތަކުން ފާސްކޮށްފައިވާ ޕްރޮގްރާމްތަކަށް ހިންގުމަށް އެފަދަ އާންމު ހުއްދައެއް އެމްކިއުއޭއިން ދިނެވެ. ކޮވިޑްގެ ހާލަތު ބަދަލުވުމުން 28 އޭޕްރީލް 2022ގައި އެ ހުއްދަ ވަނީ ބާތިލުކޮށްފަ އެވެ.

އޭގެ ކުރިން ވެސް އޮންލައިންކޮށް ކޯސްތައް ހިންގުމަށް އެއްވެސް ޕްރޮގްރާމަކަށް ކްލިކް ކޮލެޖުން ހުއްދަ ނަގާފައި ނުވުމާއި ކޮވިޑް ދުވަސްވަރު ދިން ހާއްސަ ހުއްދަ ވެސް ބާތިލުކޮށްފައިވުމާ އެކު ކްލިކް ކޮލެޖަށް އެއްވެސް ޕްރޮގްރާމެއް އެގޮތަކަށް ނުހިންގޭނެ އެވެ.

އެ ކޮލެޖުން ހިންގަމުން އަންނަ 'ބެޗެލާ އޮފް ބިޒްނަސް މެނޭޖްމަންޓް' ޕްރޮގްރާމަކީ 2019ގައި ދަރިވަރުން ކޮލެޖަށް ގެންގޮސްގެން ހިންގަން ހުއްދަ ދީ، މި އަހަރު އެގޮތަށް އެކްރެޑިޓޭޝަން ވެސް ދިން ޕްރޮގްރާމެއް ނަމަވެސް، މިހާތަނަށް ވެސް އެ ޕްރޮގްރާމް ހިންގަމުން އަންނަނީ އީ-ލާނިން މޮޑަލިޓީގައިކަން ދަރިވަރުން ވަނީ އެމްކިއުއޭއަށް ޝަކުވާ ހުށަހަޅާފަ އެވެ.

ބައެއް އިތުރު ޕްރޮގްރާމްތައް ވެސް އެގޮތަށް ހިންގުމަށް ކްލިކް ކޮލެޖުން އިޝްތިހާރުކޮށްފައިވާއިރު، އެ މައްސަލަތައް މި މަހުގެ 18ގައި އެ ކޮލެޖުގެ އިސް ވެރިންނާ އެކު ބޭއްވި ބައްދަލުވުމުގައި އެމްކިއުއޭއިން ވަނީ ފާހަގަކޮށްފަ އެވެ.

އެ މައްސަލަތަކާ ގުޅިގެން ކްލިކް ކޮލެޖަށް އެޅި ފިޔަވަޅުތަކަކީ:

އެ ފިޔަވަޅުތައް އެކްރެޑިޓޭޝަން ހުއްދައާ ނުލައި ހިންގާފައިވާ ހުރިހާ ޕްރޮގްރާމަކަށް ވެސް އަޅާނެ ކަމަށާއި އެ ޕްރޮގްރާމްތަކުގައި ކިޔަވާ ދަރިވަރުންނަށް ލިބޭ ގެއްލުމުގެ ޒިންމާ އުފުލަން ޖެހޭނީ ކްލިކް ކޮލެޖުން ކަމަށް ވެސް އެމްކިއުއޭގެ އިއުލާނުގައިވެ އެވެ.