މި ދައުރުގައި ޗައިނާގެ ލޯނުތައް ދައްކަން ނުޖެހޭނެ ކަމުގެ ފެހި ސިގްނަލް ލިބިއްޖެ: ރައީސް

ރާއްޖެއިން ޗައިނާއަށް ދައްކަން ޖެހޭ ދަރަންޏާއި އެ ދަރަންޏަށް އަރާ އިންޓްރެސްޓް ކުރިއަށް އޮތް ފަސް އަހަރުގެ ތެރޭގައި ދައްކަން ނުޖެހޭ ގޮތަށް ނިންމައިދޭނެ ކަމުގެ ފެހި ސިގްނަލް ޗައިނާ ސަރުކާރުން ދީފައިވާ ކަމަށް ރައީސް މުހައްމަދު މުއިއްޒު ރޭ ވިދާޅުވެއްޖެ އެވެ.

ވީ ކިހިނެއް؟ - އެމަނިކުފާނު މިހެން ވިދާޅުވީ، މިނިވަން ދުވަހުގެ މުނާސަބަތުގައި ސޯޝަލް ސެންޓަރުގައި ބޭއްވި ރަސްމީ ޖަލްސާގައި ވާހަކަ ދައްކަވަމުންނެވެ. 

އެނގުން މުހިއްމު - ސަރުކާރުގެ ސޮވެރިން ގެެރެންޓީ ހިމެނޭ ގޮތަށް ރާއްޖެއިން ޗައިނާއަށް ދައްކަން ޖެހޭ ދަރަނީގެ އަދަދު 1.37 ބިލިއަން ޑޮލަރަށް އަރާ ކަމަށް ވޯލްޑް ބޭންކުގެ ތަފާސްހިސާބުތައް ދައްކަ އެވެ. މިއީ ރާއްޖޭގެ ބޭރު ދަރަނީގެ %20 އެވެ.  

 ތަފްސީލް - ރާއްޖޭގެ އިގްތިސޯދީ ހާލަތު ރަނގަޅު ކުރުމަށްޓަކައި ސަރުކާރުން ކުރަމުންދާ ބައެއް މަސައްކަތްތަކަށް އަލިއަޅުވާލައްވައި ބޭރުގެ ދަރަނި މެނޭޖު ކުރުމާ ބެހޭގޮތުން ވާހަކަ ދައްކަވަމުން ރައީސް ވިދާޅުވި ގޮތުގައި:

ބުނީ ކީކޭ؟ ".... އަޅުގަނޑުމެން އެކި ކަންކަމުގައި ނަގާފައި ހުރި ލޯނުތައް ލުއި ގޮތަކަށް ބަހާލައިގެން، ކުރިއަށް އޮތް ފަސް އަހަރު އިގްތިސޯދު މެނޭޖުކުރުމަށްޓަކައި، މި ދެންނެވި އިގްތިސޯދީ ސިޔާދަތު ޔަގީން ކުރުމަށްޓަކައި، ރޭވިފައި އޮތް ގޮތަށް ކަންކަން ތަންފީޒު ކުރުމުގެ މަސައްކަތް ކުރަމުން މިދަނީ،" ރައީސް ވިދާޅުވި އެވެ.

އެމަނިކުފާނު އިތުރަށް ވިދާޅުވި ގޮތުގައި، އެއާ އެކު ވެސް، މިދިޔަ އަށް މަސް ދުވަހުގެ ތެރޭގައި ބޭރުގެ ދަރަންޏާއި އިންޓްރެސްޓް މެނޭޖު ކުރުމަށްޓަކައި:

ފާހަގަކޮށްލެވޭ - ޗައިނާ އިން ދަރަނި ފަސް ކޮށްދޭނެކަމުގެ ފެހި ސިގްނަލް ލިބިފައިވާ ކަމަށް ރައީސް ރޭ ވިދާޅުވި އިރު، ޗައިނާ އިން ރާއްޖެއަށް ކަނޑައަޅާފައި ހުންނަވާ ސަފީރު ވަންގް ލީޝިން މިދިޔަ މޭ މަހު ވިދާޅުވެފައި ވަނީ އެ ދަރަނިތައް ދެއްކުން ފަސްކުރުމުގެ ވިސްނުމެއް ނުގެންގުޅޭ ކަމަށެވެ. ސަފީރު އޭރު ވިދާޅުވެފައިވާ ގޮތުގައި:

ފަސްމަންޒަރު - ޗައިނާގެ ދަރަނިތައް ދެއްކުން ކުރިއަށް އޮތް ފަސް އަހަރަށް ފަސްކޮށްދޭން ނުވަތަ ވީހާ ވެސް ލުއި ގޮތްތަކެއް ހަމަޖައްސައިދޭނެ ކަމުގެ ފެހި ސިގްނަލް ލިބިފައިވާ ކަމަށާއި އެކަމާ ގުޅޭ މަޝްވަރާތައް ފަށަން ދެ ގައުމުން އެއްބަސްވެފައިވާ ކަމަށް މިދިޔަ ޖެނުއަރީ މަހު ޗައިނާއަށް ކުރެއްވި ދަތުރުފުޅަށް ފަހު މާލެވަޑައިގެން ވެސް ރައީސް މުހައްމަދު މުއިއްޒު ވިދާޅުވެފައިވެ އެވެ.

ނަމަވެސް، ރާއްޖޭގެ މަރުކަޒީ ބޭންކު އެމްއެމްއޭ އިން މާޗު މަހު ބުނީ، ޗައިނާއަށް ދައްކަން ހުރި ލޯނުތައް ރީސްޓަރަކްޗާ ކޮށްފައި ހުރި ކަމުގެ އެއްވެސް މައުލޫމާތެއް ނުލިބޭ ކަމަށެވެ.

ގުޅުންހުރި - ޗައިނާގެ ފޮރިން މިނިސްޓަރު ވަންގް ޔީގެ ދައުވަތަކަށް ފޮރިން މިނިސްޓަރު މޫސާ ޒަމީރު އެ ގައުމަށް މިދިޔަ ހަފްތާގައި ކުރެއްވި ދަތުރުގައި އޭނާ ވަނީ ޗައިނާގެ އެގްޒިމް ބޭންކާ ބައްދަލުކުރައްވާފަ އެވެ.

އެ ބޭންކުގެ ޗެއާމަން ވޫ ފޫލިންއާ އެކު ބޭއްވި އެ ބައްދަލުވުމުގައި ރާއްޖޭގެ އެންމެ ފަހުގެ އިގްތިސާދީ އަދި މާލީ މައުލޫމާތު ޒަމީރު ދެއްވި އެވެ. އަދި ރައީސް މުއިއްޒުގެ އިސްލާހީ ޕްރޮގްރާމާއި މުސްތަގުބަލުގައި އެ ބޭންކާ ގުޅިގެން މަސައްކަތް ކުރެވޭނެ ގޮތްތަކާ ބެހޭ ގޮތުން ދެ ބޭފުޅުން މަޝްވަރާކުރެއްވި އެވެ.