މާނިއު ވަކިކޮށް ކަސްޓަމްސްގެ ކޮމިޝަނަރަކަށް ދިޔާނާ އައްޔަންކޮށްފި

ކަސްޓަމްސްގެ ކޮމިޝަނަރުކަމުގައި ހުންނެވި ޔޫސުފް މާނިއު މުހައްމަދު ސްޓޭޓް މިނިސްޓަރަކަށް ބަދަލުކޮށް ކަސްޓަމްސްގެ ކޮމިޝަނަރު ކަމަށް ޑެޕިއުޓީ ކޮމިޝަނަރަކަށް ހުންނެވި ފާތިމަތު ދިޔާނާ އައްޔަންކޮށްފި އެވެ. 

ފާހަގަކޮށްލެވޭ - މިއީ ރާއްޖޭގެ ކަސްޓަމްސްގެ ކޮމިޝަނަރަކަށް އަންހެން ބޭފުޅަކު އައްޔަންކުރި ފުރަތަމަ ފަހަރެވެ. 

ވީ ކިހިނެއް؟ - ރައީސް އޮފީހުން މިއަދު ވަނީ ކަސްޓަމްސްގެ ކޮމިޝަނަރު ކަމަށް ދިޔާނާ އައްޔަންކޮށް މަގާމުގެ ލިޔުން އޭނާއާ ހަވާލުކޮށްފައިވާކަން ހާމަކޮށްފަ އެވެ. އެ ރަސްމިއްޔާތު އޮތީ މިއަދު މެންދުރުފަހު ރައީސް އޮފީހުގަ އެވެ. 

ތަފްސީލް - ދިޔާނާ ކޮމިޝަނަރު ކަމަށް އައްޔަންކުރީ ސްޓޭޓް މިނިސްޓަރު ފެންވަރުގައި ކަމަށް ރައީސް އޮފީހުން ބުންޏެވެ. 

މީގެ އިތުރަށް ރައީސް އޮފީހުން ބުނީ ކަސްޓަމްސްގެ ކޮމިޝަނަރަކަށް ހުންނެވި މާނިއު ހޯމްލޭންޑް މިނިސްޓްރީގެ ސްޓޭޓް މިނިސްޓަރަކަށް މިއަދު އައްޔަންކޮށްފައިވާ ކަމަށެވެ. 

މި ބަދަލު ގެނައި ސަބަބެއް ސާފެއް ނުވެ އެވެ. 

ކަސްޓަމްސްގެ ކޮމިޝަނަރަކަށް ފުރަތަމަ ފަހަރަށް އަންހެން ބޭފުޅަކު އައްޔަން ކުރުމާ ވިދިގެން ރައީސް އޮފީހުގެ ތަރުޖަމާން ހީނާ ވަލީދު އެކްސްގައި ކުރެއްވި ޕޯސްޓެއްގައި ވިދާޅުވީ މިކަމުން ދޭހަކޮށްދެނީ ރައީސް މުއިއްޒު އަންހެނުންގެ ކުރިއެރުމަށް ދެއްވާ އަހައްމިއްޔަތުކަން ކަމަށެވެ.

"ގައުމު ހިންގުމާއި ސިޔާސަތުތައް ނިންމުމުގައި އަންހެނުންގެ ޝާމިލްވުން އިތުރުކުރުމަށް [ރައީސް] ދެއްވާ އިސްކަން ހާމަވެގެންދިޔަ ކަމެއް،" ހީނާ ލިޔުއްވާފައިވެ އެވެ.