ކުރީ ސަރުކާރުން 'ގައުމީ ސަލާމަތަށް ނުރައްކާވާ ގޮތަށް ކޮޮށްފައި ހުރި، ކަންތައްތަކުގެ އިންކުއަރީއެއް ހަދަނީ

ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ރާއްޖޭގެ "މިނިވަންކަމާއި އިސްތިގުލާލަށް އުނިކަން އަންނަ ގޮތަށް ކޮށްފައި ހުރި" ކަންކަން ބަލަން މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީ (241 ކޮމިޓީ) އިން ޕާލިމަންޓަރީ އިންކުއަރީއެއް ހަދަން ނިންމައިފި އެވެ.

ވީ ކިހިނެއް؟ - ޕާލިމަންޓަރީ އިންކުއަރީ ހަދަން ހުށަހެޅުއްވީ، މިއަދު ބޭއްވި 241 ކޮމިޓީގެ ތިންވަނަ ބައްދަލުވުމުގައި، ހިތަދޫ މެދު ދާއިރާގެ މެމްބަރު އަހުމަދު އަޒާން މަރުޒޫގް އެވެެ. މިދިޔަ ސަރުކާރުގައި ނޫސްވެރިއެއްގެ ހައިސިއްޔަތުން އިންޑިއާއާ އެކު ވެފައިވާ އެއްބަސްވުންތަކާ ބެހޭ ހަބަރުތައް ގެނެސްދިނުމުގައި ފުޅާ ދާއިރާއެއްގައި މަސައްކަތް ކޮށްފައިވާ އަޒާންގެ ހުށަހެޅުން ވަނީ ކޮމިޓީން ފާސްވެފަ އެވެ.

ތަފްސީލް - އެގޮތުން، 2018 ވަނަ އަހަރުން ފެށިގެން 2023 ވަނަ އަހަރަށް ރާއްޖޭގެ މިނިވަންކަމާ އިސްތިގުލާލަށް އުނިކަން އަންނަ ގޮތަށް އޭރުގެ ސަރުކާރާއި އެކިއެކި އިދާރާތަކުގެ އިސް ވެރިން އަމަލުކޮށްފައި ވާކަމަށް ވިދާޅުވެ، އަޒާން ހުށަހަޅުއްވާފައިވަނީ:

އެއާ އެކު، އިންކުއަރީ ހިންގަން ބޭނުންވާ ވަކި ކަންތައްތަކެއް ބަޔާންކޮށްދެއްވުމަށް ކޮމިޓީގެ ބައެއް މެމްބަރުން އެދިވަޑައިގެންނެވި އެވެ. އެހެންކަމުން، އެ ސަބް-ކޮމިޓީން އެންމެ ބޮޑު އިސްކަމެއް ދީގެން ބަލަން އެދިވަޑައިގަންނަވާ ބައެއް މައްސަލަތައް އަޒާން ތަފްސީލްކޮށްދެއްވާފައިވެ އެވެ. އެގޮތުން އޭނާ ފާހަގަކުރެއްވި ތިން މައްސަލަ އަކީ:

1. ރާއްޖެ އާއި އިންޑިއާއާ ދެމެދު ސޮއިކުރެވުނު ހައިޑްރޯގްރަފީ އެއްބަސްވުން:

2. އުތުރު ތިލަފަޅު (ޔޫޓީއެފް)ގައި ބިނާކުރަމުންދާ ޑޮކްޔާޑްގެ އެއްބަސްވުން:

3. ރާއްޖޭގައި ޑޯނިއާ މަތިންދާބޯޓު އޮޕަރޭޓް ކުރަން އިންޑިއާއާ އެކު ވެފައިވާ އެއްބަސްވުން

މިވަގުތަށް އަޒާން ހުށަހެޅުއްވީ މި ތިން އެއްބަސްވުމުގައި ސޮއި ކުރުމާ ހަމައަށް، އެކަމުގެ މަރުހަލާތައް ކުރިއަށް ގެންދިޔަ ގޮތާއި، އެކަމާ ގުޅިގެން ވަށައިގެންވާ އިތުރު ކަންތައްތައް ބެލުމެވެ. ނަމަވެސް، މި ތިން އެއްބަސްވުމުގެ އިތުރުން އިންކުއަރީއަށް ހަދާ ސަބް-ކޮމިޓީއަށް އިތުރު ކަންކަން ފާހަގަކުރެވޭ ނަމަ، އެކަންތައްތައް ބަލަން ވެސް އަޒާން ހުށަހެޅުއްވި އެވެ.

"މީގެ ބޭނުމަކީ އެއްގޮތަކަށް ވެސް ކުރިން [ވެރިކަމުގައި] ތިބި ބައެއްގެ މައްސަލަތައް ހޯދާ އެމީހުން ފަލީހަތް ކޮށް، މިކަހަލަ ކަންތައްތަކެއް ކުރުމެއް ނޫން. އަޅުގަނޑުމެންގެ އެންމެ ބޮޑު ޒިންމާއަކަށް ވާނީ ފަހުންވެެސް މިފަދަ އެއްބަސްވުންތަކެއް ހެދިގެން އަންނަ އިރު، އެކަންތައްތައް ކުރެވެނީ ރާއްޖޭގެ އެންމެ މަތީ މަސްލަހަތު އިސްކޮށްގެން، އެންމެ މަތީ މަސްލަހަތު ރައްކާތެރިކުރެވޭނެ ގޮތަށްކަން ކަށަވަރު ކުރުން،" އަޒާން ވިދާޅުވި އެވެ.

ފާހަގަކޮށްލެވޭ - އަޒާންގެ ހުށަހެޅުންތަކަށް ފަހު، މާމިގިލީ ދާއިރާގެ މެމްބަރު ގާސިމް އިބްރާހިމް ވަނީ، ރާއްޖެ އާއި މޮރިޝަސްއާ ދެމެދު ރާއްޖޭގެ ދެކުނުން އިން ކަނޑައެޅުމުގެ މައްސަލާގައި މިދިޔަ ސަރުކާރުން އަމަލުކުރި ގޮތާ ބެހޭ މައުލޫމާތު ދިނުމަށް ވެސް ހުށަހަޅުއްވައިފަ އެވެ.

އެނގުން މުހިއްމު - އެ ދެ މެމްބަރުންގެ ހުށަހެޅުންތައް ބެލުމަށް ހަތަރު މެމްބަރުންގެ ސަބް-ކޮމިޓީއެއް އެކުލަވާލަން މިއަދުގެ 241 ކޮމިޓީގެ ބައްދަލުވުމުގައި ވަނީ ފާސްކޮށްފަ އެވެ. އެ ސަބް-ކޮމިޓީގައި ތިއްބަވަނީ:

241 ކޮމިޓީގެ މުގައްރިރު އަދި އޭދަފުށީ ދާއިރާގެ މެމްބަރު އަހުމަދު ސަލީމް (ރެޑްވޭވް ސަލީމް) ވިދާޅުވީ، މި ހަފްތާގެ ތެރޭގައި ކަމާބެހޭ އެއްވެސް ވުޒާރާއެއް ހާޒިރު ކުރެވޭ ނަމަ، ކޮމިޓީއަށް ހާޒިރު ކުރުމުގެ މަސައްކަތް ކުރައްވާނެ ކަމަށް ވިދާޅުވި އެވެ.