ވައިކަރަދޫ ކައުންސިލާއި އެ ރަށު އަންހެނުންގެ ކޮމެޓީ އަދި އެޓްމޮސްފިއާ ފައުންޑޭޝަން ގުޅިގެން ކުރިއަށް ގެންދިޔަ ބެމްބޫ އިންދުމުގެ ޕްރޮގްރާމްގައި ހދ. އަތޮޅު މަދަރުސާގެ ކުދިންތަކެއް ބެމްބޫ އިންދަނީ. (ފޮޓޯ/ ހދ. އަތޮޅު ސްކައުޓް ގްރޫޕް)
ވައިކަރަދޫގައި ތިމާވެށީގެ ދުވަސް އެޓްމޮސްފިއާއާ އެކު ފާހަަގަކުރަނީ
ރާއްޖޭގައި ގިނަ އަދަދެއްގެ ރިސޯޓް ހިންގާ އެޓްމޮސްފިއާ ކުންފުނިން މުޖުތަމައުއަށް ފައިދާ ހުރި އެކި ކަންކަމަށް އެހީ ދިނުމަށް ގާއިމްކޮށްފައިވާ އެޓްމޮސްފިއާ ފައުންޑޭޝަނުގެ އެހީގައި ހދ. ވައިކަރަދޫގައި ތިމާވެށީގެ ދުވަސް ކުލަގަދަކޮށް ފާހަގަކުރަން ނިންމައިފި އެވެ.
ވީ ކިހިނެއް؟ - ތިމާވެށީގެ ދުވަސް ފާހަގަކުރަން އެ ރަށު ކައުންސިލުން ވަނީ އެޓްމޮސްފިއާ ފައުންޑޭޝަނާ ގުޅިގެން ގިނަ ކަންތައްތަކެއް ރާވާފަ އެވެ.
ތަފްސީލް - ވައިކަރަދޫ ކައުންސިލްގެ ނައިބު ރައީސް މުހައްމަދު ނުހާމް 'ދައުރު'އަަށް ވިދާޅުވީ ރަށު ފެންވަރުގައި ކުރެވޭނެ ގިނަ ކަންތައްތަކެއް ކުރަން ނިންމާފައިވާ ކަމަށެވެ. ތިމާވެށީގެ ދުވަސް ފާހަގަކުރަނީ އަންނަ މަހުގެ 8ގަ އެވެ.
ކައުންސިލާއި އެ ރަށު އަންހެނުންގެ ކޮމެޓީ އާއި އެޓްމޮސްފިއާ ފައުންޑޭޝަން ގުޅިގެން ރަށުގައި ބެމްބޫ (އޮނު ގަސް) އާލާކުރުމަށް މިދިޔަ އޮކްޓޯބަރު މަހު 83 އޮނު ގަސް އިންދާފައިވާ ކަމަށް އޭނާ ވިދާޅުވި އެވެ.
"ބެމްބޫ ޕާކުގައި ދިވެހި އޮނު ހިމެނޭހެން 13 ވައްތަރެއްގެ އޮނު މިހާރު އިންދާފައި ވަނީ. ގަސްތައް ވަރަށް ބޮޑަށް ހެދެން ފަށާފައި މިިހާރު ހުރީ، މިހާރު އެންމެ ގިނަ ބާވަތުގެ އޮނު ހުރި ރަށަކަށް ވާނެ މިރަށް،" ނުހާމް ވިދާޅުވި އެވެ.
އޭގެ އިތުރުން ވެސް ގިނަ ކަންތައްތަކެއް ކުރަން ނިންމާފައިވާކަމަށް ނުހާމް ވިދާޅުވި އެވެ. އޭގެ ތެރޭގައި ހިމެނެނީ:
-
އުމުރުން 15 އަހަރުން މަތީގެ އެންމެންނަށް ހުޅުވާލައިގެން މަޒުމޫނު މުބާރާތެއް
-
ލީފްލެޓް ހެދުމުގެ މުބާރާތެއް
-
ޕޯސްޓަރު ކުރެހުމުގެ މުބާރާތް
-
ފޯޓޯ ނެގުމުގެ މުބާރާތް
-
އޮނުން ތަކެތި ހެދުމުގެ މުބާރާތެއް
-
ބެމްބޫ ހަވީރު
-
ތިމާވެއްޓާ ގުޅޭ މައުލޫމާތު ސޯޝަލްމީޑީއާ މެދުވެރިކޮށް އާންމުކުރުން