13 އަހަރުގެ ކުއްޖާގެ ރޭޕް މައްސަލަ: ތުހުމަތުކުރެވޭ މީހާ ފިލައިގެން އުޅެނިކޮށް ހައްޔަރުކޮށްފި

އުމުރުން 13 އަހަރުގެ އަންހެން ކުއްޖަކަށް މަސްތުވާތަކެތި ދީ، ރޭޕް ކުރި މައްސަލައިގައި މީހަކު ހައްޔަރުކޮށްފައިވާ ކަމަށް ފުލުހުން މިއަދު ބުނެފި އެވެ.

ވީ ކިހިނެއް؟ - ރާއްޖޭގެ އުތުރު ރަށެއްގައި މިކަން ހިނގިކަން ފުލުހުންނަށް މިދިޔަ އާދިއްތަ ދުވަހު ހުށަހަޅައި، އާންމުންނަށް މިކަން ތިލަވީ އިއްޔެ އެވެ. 

ބުނީ ކީކޭ؟ - ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނީ، އެ މައްސަލައާ ގުޅިގެން 27 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށެވެ.

ފާހަގަކޮށްލެވޭ - އޭނާ ފިލައިގެން އުޅޭތީ، މިދިޔަ ހޯމަ ދުވަހުން ފެށިގެން ފުލުހުން އައީ އޭނާ ހޯދުމުގެ މަސައްކަތް ކުރަމުންނެވެ. އަދި މިއަދު ހައްޔަރުކޮށްފައި މި ވަނީ، އޭނާ ހޯދަން އާންމުކޮށް އިއުލާންކުރި ފަހުންނެވެ.