ޒުހޫރު އެޗްޑީސީގެ ޗެއާމަންކަމުން ވަކިކޮށްފި

ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ޗެއާމަންކަމުގައި ހުންނެވި އަހުމަދު ޒުހޫރު އެ މަގާމުން ވަކިކޮށްފި އެވެ.

ވީ ކިހިނެއް؟ - ޒުހޫރު މަގާމުން ވަކިކޮށްފައިވާ ކަން އިއުލާނުކޮށް، ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ވަނީ މިއަދު 'އެކްސް'ގައި ޕޯސްޓެއް ކުރައްވާފަ އެވެ.

އެ ޕޯސްޓުގައި ވާގޮތުން، އެޗްޑީސީގެ ޗެއާމަންގެ މަގާމުގެ އިތުރުން، އެޗްޑީސީގެ ބޯޑުގެ ޑިރެކްޓަރު ކަމުން ވެސް ޒުހޫރު ވަނީ ވަކިކޮށްފަ އެވެ.

ނަމަވެސް، އޭނާ މަގާމުން ވަކިކޮށްފައިވާ ސަބަބެއް ޕީސީބީން ހާމައެއް ނުކުރެ އެވެ. މަގާމުން ވަކިކުރި އިރު ޒުހޫރުގެ އެއްވެސް މައްސަލައެއް އޮތް ކަމަށް އަޑުފެތުރިފަ އެއް ވެސް ނުވެ އެވެ.

އެނގުން މުހިއްމު - ފެބްރުއަރީ މަހު އެޗްޑީސީގެ ޗެއާމަން ކަމަށް އައްޔަންކޮށްފައިވާ ޒުހޫރު އަކީ ޔާމީންގެ ސަރުކާރުގައި މިނިސްޓަރުގެ މަގާމުގެ އިތުރުން ސްޓެލްކޯގެ މެނޭޖިން ޑިރެކްޓަރު ކަމާއި ކަސްޓަމްސްގެ ކޮމިޝަނާ ޖެނެރަލްކަން ވެސް ކުރައްވާފައިވާ ބޭފުޅެކެވެ.

ފާހަގަކޮށްލެވޭ - ޒުހޫރު މަގާމުން ވަކި ކުރެއްވި އިރު، އެމްއެމްޕީއާރުސީގެ މެނޭޖިން ޑިރެކްޓަރު ކަމުގައި ހުންނެވި ފާތިމަތު ތައުފީގު (ކުޑީ) ވެސް ވަނީ މިއަދު މަގާމުން ވަކިކޮށްފަ އެވެ.

އެމްއެމްޕީއާރުސީގެ މެނޭޖިން ޑިރެކްޓަރުގެ މަގާމުން ފާތިމަތު ތައުފީގް މިއަދު ވަކިކުރި އިރު، އެ ކުންފުނީގެ ހިންގުން ބޮއްސުންލާފައިވާކަމުގެ އަޑުތައް ވަނީ ފެތުރިފަ އެވެ.

އެ ކުންފުނީގެ އެތެރޭގެ ހިންގުމުގައި މައްސަލަތަކެއް އުޅޭކަމަށް އަޑުތައް ފެތުރިފައިވާއިރު ކުންފުނީގެ ޗެއާޕާސަންގެ މަގާމުގައި ހުންނެވި އާއިޝާ ނޫރައިން ޖަނާހު ވަނީ އިއްޔެ މަގާމުން އިސްތިއުފާ ދެއްވައިފަ އެވެ.